ວິທະຍາສາດກັບຄຳພີໄບເບິນສອດຄ່ອງລົງຮອຍກັນບໍ?
ຄຳຕອບຈາກຄຳພີໄບເບິນ
ແມ່ນແລ້ວ ເຖິງວ່າຄຳພີໄບເບິນບໍ່ແມ່ນປຶ້ມວິທະຍາສາດ ແຕ່ກໍໃຫ້ຂໍ້ມູນທີ່ຖືກຕ້ອງເມື່ອເວົ້າເຖິງເລື່ອງທາງວິທະຍາສາດ. ລອງເບິ່ງບາງຕົວຢ່າງທີ່ເຮັດໃຫ້ເຫັນວ່າຄຳພີໄບເບິນກັບວິທະຍາສາດສອດຄ່ອງກັນ ແລະຄຳພີໄບເບິນບອກຄວາມຈິງທາງວິທະຍາສາດເຊິ່ງຕ່າງກັນຫຼາຍກັບສິ່ງທີ່ຫຼາຍຄົນເຊື່ອໃນສະໄໝທີ່ຂຽນຄຳພີໄບເບິນ.
ເອກະພົບມີຈຸດເລີ່ມຕົ້ນ. (ຕົ້ນເດີມ 1:1) ກົງກັນຂ້າມ ນິທານບູຮານຫຼາຍເລື່ອງບອກວ່າເອກະພົບບໍ່ໄດ້ຖືກສ້າງ ແຕ່ເກີດຈາກຄວາມຫຍຸ້ງເຫຍີງທີ່ມີຢູ່ແລ້ວ. ຄົນບາບີໂລນເຊື່ອວ່າພວກເທບພະເຈົ້າທີ່ສ້າງເອກະພົບຂຶ້ນມາມາຈາກສອງມະຫາສະໝຸດ. ຕຳນານອື່ນໆບອກວ່າເອກະພົບເກີດຈາກໄຂ່ໜ່ວຍໃຫຍ່.
ໃນແຕ່ລະມື້ເອກະພົບຖືກຄວບຄຸມໂດຍກົດທີ່ເປັນລະບຽບໃນທຳມະຊາດ ບໍ່ໄດ້ຖືກຄວບຄຸມໂດຍຄວາມຄິດແປກໆຂອງເທບພະເຈົ້າ. (ໂຢບ 38:33; ເຢເຣມີ 33:25) ເລື່ອງເລົ່າຈາກທົ່ວໂລກບອກວ່າເທບພະເຈົ້າຕ່າງໆມັກເຮັດສິ່ງທີ່ບໍ່ສາມາດຄາດເດົາໄດ້ແລະໂຫດຮ້າຍເຊິ່ງມະນຸດກໍບໍ່ມີທາງທີ່ຈະລອດໄດ້.
ໂລກລອຍຢູ່ໃນອະວະກາດທີ່ວ່າງເປົ່າ. (ໂຢບ 26:7) ໃນສະໄໝບູຮານຫຼາຍຄົນເຊື່ອວ່າໂລກແບນແລະວາງໄວ້ຢູ່ເທິງຫຼັງຍັກຫຼືສັດໂຕໃຫຍ່ ເຊັ່ນ ຄວາຍຫຼືເຕົ່າ.
ແມ່ນ້ຳແລະນ້ຳພຸເກີດຈາກນ້ຳໃນມະຫາສະໝຸດແລະແຫຼ່ງນ້ຳອື່ນໆທີ່ລະເຫີຍຂຶ້ນໄປໃນອາກາດແລ້ວຕົກລົງມາເປັນຝົນ ຫິມະ ຫຼືໝາກເຫັບ. (ໂຢບ 36:27, 28; ຜູ້ເທສະໜາປ່າວປະກາດ 1:7; ເອຊາອີ 55:10; ອາໂມດ 9:6) ຄົນກຣີກໃນສະໄໝບູຮານເຊື່ອວ່າແມ່ນ້ຳມາຈາກແຫຼ່ງນ້ຳໃຕ້ພື້ນມະຫາສະໝຸດ ແລະພາກັນເຊື່ອຈົນຮອດສະໄໝສະຕະວັດທີ 18.
ພູເຂົາຕ່າງໆສູງຂຶ້ນແລະຍຸບຕ່ຳລົງ ແລະຄັ້ງໜຶ່ງພູເຂົາໃນທຸກມື້ນີ້ເຄີຍຢູ່ໃຕ້ມະຫາສະໝຸດ. (ຄຳເພງ 104:6, 8) ກົງກັນຂ້າມ ເລື່ອງເລົ່າຫຼາຍເລື່ອງບອກວ່າພວກເທບພະເຈົ້າສ້າງພູເຂົາຕ່າງໆໃຫ້ເປັນແບບທີ່ພວກເຮົາເຫັນໃນທຸກມື້ນີ້ຕັ້ງແຕ່ທຳອິດ.
ການຮັກສາຄວາມສະອາດຊ່ວຍໃຫ້ສຸຂະພາບແຂງແຮງ. ກົດໝາຍທີ່ຄົນອິດສະຣາເອນໄດ້ຮັບຈາກພະເຈົ້າມີຂໍ້ກຳນົດທີ່ບອກໃຫ້ລ້າງມືຫຼັງຈາກໄປຈັບສົບຄົນຕາຍ ໃຫ້ກັກໂຕຄົນທີ່ເປັນພະຍາດຕິດຕໍ່ ແລະເມື່ອຖ່າຍໜັກຕ້ອງຂຸດຂຸມຖົມໃຫ້ຮຽບຮ້ອຍ. (ພວກເລວີ 11:28; 13:1-5; ພະບັນຍັດ 23:13) ກົງກັນຂ້າມ ໃນສະໄໝທີ່ພະເຈົ້າໃຫ້ກົດໝາຍນີ້ກັບຊາດອິດສະຣາເອນ ຄົນເອຢິບມີວີທີທີ່ຕ່າງອອກໄປ ເຂົາເຈົ້າຮັກສາບາດແຜສົດໂດຍທາຢາທີ່ມີອາຈົມປະສົມຢູ່ນຳ.
ຄຳພີໄບເບິນມີຂໍ້ຜິດພາດທາງວິທະຍາສາດບໍ?
ການກວດສອບຄຳພີໄບເບິນຢ່າງລະອຽດພົບວ່າບໍ່ມີຂໍ້ຜິດພາດເລີຍ. ຕໍ່ໄປນີ້ແມ່ນຄວາມເຂົ້າໃຈຜິດບາງຢ່າງກ່ຽວກັບຄວາມຖືກຕ້ອງທາງວິທະຍາສາດໃນຄຳພີໄບເບິນ:
ເລື່ອງເລົ່າ: ຄຳພີໄບເບິນບອກວ່າເອກະພົບຖືກສ້າງຂຶ້ນພາຍໃນ 6 ມື້ເຊິ່ງແຕ່ລະມື້ມີ 24 ຊົ່ວໂມງ.
ຄວາມຈິງ: ຄຳພີໄບເບິນບອກວ່າພະເຈົ້າສ້າງເອກະພົບຕັ້ງແຕ່ອະດີດແລ້ວ ແລະບໍ່ໄດ້ບອກເວລາທີ່ແນ່ນອນວ່າສ້າງຂຶ້ນຕອນໃດ. (ຕົ້ນເດີມ 1:1) ມື້ທີ່ສ້າງເຊິ່ງບອກໄວ້ໃນປື້ມຕົ້ນເດີມບົດ 1 ກໍບໍ່ໄດ້ບອກວ່າໃຊ້ເວລາດົນສ່ຳໃດ. ທີ່ຈິງ ຄຳພີໄບເບິນເອີ້ນໄລຍະເວລາທີ່ພະເຈົ້າສ້າງທ້ອງຟ້າແລະໂລກວ່າ “ວັນ.”—ຕົ້ນເດີມ 2:4, ລ.ມ.
ເລື່ອງເລົ່າ: ຄຳພີໄບເບິນບອກວ່າພືດຜັກຖືກສ້າງຂຶ້ນມາກ່ອນຈະມີດວງຕາເວັນມາຊ່ວຍໃນການສັງເຄາະແສງ.—ຕົ້ນເດີມ 1:11, 16
ຄວາມຈິງ: ຄຳພີໄບເບິນບອກວ່າດວງຕາເວັນ ເຊິ່ງຖືວ່າເປັນດາວດວງໜຶ່ງທີ່ຢູ່ເທິງ “ຟ້າ” ຖືກສ້າງກ່ອນພືດຜັກ. (ຕົ້ນເດີມ 1:1) ແສງມົວໆຈາກດວງຕາເວັນສ່ອງມາເຖິງພື້ນໂລກໃນ “ວັນ” ຫຼືໄລຍະທຳອິດຂອງການສ້າງ. ເມື່ອບັນຍາກາດແຈ່ມໃສຂຶ້ນໃນ “ວັນ” ທີ 3 ຂອງການສ້າງ ແສງຕາເວັນກໍແຮງພໍທີ່ຈະໃຫ້ພືດສັງເຄາະແສງໄດ້. (ຕົ້ນເດີມ 1:3-5, 12, 13) ຫຼັງຈາກນັ້ນກໍສາມາດເຫັນດວງຕາເວັນໄດ້ຢ່າງຈະແຈ້ງຈາກພື້ນໂລກ.—ຕົ້ນເດີມ 1:16
ເລື່ອງເລົ່າ: ຄຳພີໄບເບິນບອກວ່າດວງຕາເວັນໝູນອ້ອມໂລກ.
ຄວາມຈິງ: ຜູ້ເທສະໜາປ່າວປະກາດ 1:5, ລ.ມ. ບອກວ່າ: “ດວງຕາເວັນຂຶ້ນແລ້ວກໍຕົກ ແລ້ວມັນກໍຟ້າວກັບໄປຂຶ້ນບ່ອນເກົ່າອີກ.” ແຕ່ຂໍ້ຄວາມນີ້ພຽງແຕ່ອະທິບາຍການໂຄຈອນຂອງດວງຕາເວັນເມື່ອເບິ່ງຈາກໂລກ. ໃນທຸກມື້ນີ້ ເຖິງວ່າຄົນເຮົາຈະໃຊ້ຄຳວ່າ “ດວງຕາເວັນຂຶ້ນ” ແລະ “ດວງຕາເວັນຕົກ” ແຕ່ທຸກຄົນກໍຮູ້ວ່າໂລກໝູນອ້ອມດວງຕາເວັນ.
ເລື່ອງເລົ່າ: ຄຳພີໄບເບິນບອກວ່າໂລກແບນ.
ຄວາມຈິງ: ຄຳພີໄບເບິນໃຊ້ປະໂຫຍກ “ສຸດຂອບໂລກ” ເພື່ອໝາຍເຖິງ “ບໍລິເວນທີ່ໄກທີ່ສຸດຂອງແຜ່ນດິນໂລກ” ນີ້ບໍ່ໄດ້ໝາຍຄວາມວ່າໂລກແບນຫຼືມີຂອບ. (ກິດຈະການ 1:8) ຄືກັບຄຳວ່າ “ສີ່ມຸມໂລກ” ກໍເປັນຄຳປຽບທຽບທີ່ໝາຍເຖິງພື້ນໂລກທັງໝົດ ທຸກມື້ນີ້ເມື່ອຄົນເວົ້າວ່າ ທົ່ວທຸກທິດ ກໍໝາຍເຖິງທົ່ວໂລກ.—ເອຊາອີ 11:12, ລ.ມ; ລູກາ 13:29
ເລື່ອງເລົ່າ: ຄຳພີໄບເບິນບອກວ່າລວງຮອບຂອງວົງມົນມີຄວາມຍາວເປັນສາມເທົ່າຂອງເສັ້ນຜ່າໃຈກາງພໍດີ ແຕ່ຄ່າທີ່ຖືກຕ້ອງແທ້ໆແມ່ນປີ້ (π) ຫຼືປະມານ 3,1416.
ຄວາມຈິງ: ການແທກອ່າງໃຫຍ່ຫຼື “ທະເລທອງແດງ” ໃນ 1 ກະສັດ 7:23, ລ.ມ. ແລະ 2 ຂ່າວຄາວ 4:2, ລ.ມ. ບອກວ່າອ່າງນັ້ນມີເສັ້ນຜ່າໃຈກາງ 10 ສອກແລະ “ແທກໂດຍຮອບໄດ້ 30 ສອກ.” ຄ່າເຫຼົ່ານີ້ອາດເປັນໂຕເລກທີ່ໃກ້ຄຽງທີ່ສຸດ. ເປັນໄປໄດ້ວ່າເປັນການແທກລວງຮອບແລະເສັ້ນຜ່າໃຈກາງຈາກທາງໃນແລະທາງນອກຂອງອ່າງໃຫຍ່ນັ້ນ.