Mini e’dozu o’azu tualu mi aje ma azi be ria, e’yo ewaru ndu ndu yi nga yi e’da. Eyi nga efu emi alu alu ni e’yo egazu, etrumu zu, azini e’yo idri ma alea ri nezu geri ndu ndu si risi. Kaniku e’yo ewaru ’diyi eco efu engazu amveleru azini e’yo eyi ’yepi nikokoru ’diyi si.

E’yo ada i’yepi ’bori onazu ri eco e’da ama milia onyiru, te Biblia fe amani egaza e’yo ewaru ’diyi otuzu ri. (Matayo 5:23, 24) Mi nga geri kilili e’yo ewaru ’diyi otuzu ri isu mini imbata Bibliani ’diyi ayuzu risi.

E’YO BIBLIA NI ’YORI: ‘Etu . . . E’yo nzezu ri’ ci. (Eklesiaste 3:1, 7) Emi ma ’du sa e’yo nzezu e’yo ewaru ri ma dria. Mi ma fe mi aje ma azi ma ni mi trumu azini egata adari e’yo emini oturi ma dria. Sa driasi “mi ma ’yo e’yo ada” mi aje ma azi be. (’Ba Efesoa ’Diyi 4:25) Aoko angiri ka enga ra ti, mi ma co aco ku. E’yo omvizu e’yere ri eco e’yo otuza were ri atri erini ecazu awata ru risi ra.—E’yo O’beza 15:4; 26:20.

Emi ka tro emi eri ku ti, mi ai ’dani, mi avi leta azini ruta e’dazu mi aje ma azi ni ku. (’Ba Kolosaia ’Diyi 4:6) Emi o’bi e’yo otu mbeleru, azini emi ma ku e’yo nzeza emi eselea ri ku.—’Ba Efesoa ’Diyi 4:26.

AFA MINI ECO ’YERI:

• Emi ma pe sa e’yo ewaru ri otuzu

• Sa mini e’yo erizu ria, le mi ma atri agu e’yo nzepi ri ku. Sa mini e’yo nzezu ri ni nga eca ra

E’YO BIBLIA NI ’YORI: “Emi ma le emi avasi; emi ma inzi emi ma agyi ma e’yo oko.” (’Ba Rumia ’Diyi 12:10) Geri mini e’yo erizu ri e’yo angiri tu ni. Le mi o’bi geri mi aje ma azi ni e’yo nzezu ri va ‘yikisi azini afu kokoru.’ (1 Petero 3:8; Yakobo 1:19) Le e’yo eriza lokirisi ri ma ovu yo. Mi ka eco ra si, mi ma ku afa mini ’yeri mini ecozu bile cozu kilili mi aje ma azi vu, kaniku mi ma zi eri ecozu e’yo ’da otuzu sa azini si. Mi ka e’yo ega mi aje ma azi ma dria ’ba azi ngapi mi be ri ru ovuni ’ba a’di ’dipi mi be ri ru ku, mi nga “fe mi asini ovuzu adrasi mbele mbele ku.”—Eklesiaste 7:9.

AFA MINI ECO ’YERI:

• Mi eri e’yo omi be mgboru, e’yo mini eri ri ka tro mini ayiko fe ku ti

• Mi ’ba asi e’yo nzeleri ma efi ma dria. Mi ma ne mi aje ma azi ma e’data azini o’duko e’yo nzezu ri

E’YO BIBLIA NI ’YORI: “Azi dria ma alea orodri indi, te e’yo ’yole tisi tokori eri ’ba ji kiri alio vu a’dule.” (E’yo O’beza 14:23) E’yo emini otu kilili ’bo ri a’izu ri cani ku. Le emi ma ’ba e’yo emini otu iritro tualu ri ’yeta si. ’Di ni nga azi ngaza azini okpo ’baza angiri ri le, te mi nga orodri ni isu ra. (E’yo O’beza 10:4) Emi ka azi nga tualu, emi nga “orodri onyiruri” isu azi emini okporu ri si.—Eklesiaste 4:9.

AFA MINI ECO ’YERI:

• Emi ma pe afa emi alu alu ni eco ’yeri e’yo ewaru ri otuzu

• Sa vusi sa vusi, emi ma one otuta emini ni azi nga ngoni’ari