ESELE 9
Emi Inzi Yehovani ’Ba Akua ’Diyiru Dria
‘Emi ma inzi ’ba ’bu pi ’bapi nyaku be ri.’
Mini onizu brocua ’di ma alea ’bo rile, Biblia ma alea Imbata ecopi mi ma aza kopi ’ba akua ’diyi be ’diyi karakara. Yehova le mi ovu ayikosi. So oyo kini mi ka inzita iniri ’ba oko, “afa ’diyi dria nga ovu fezaru emi dri ereniru.” (Matayo 6:33) Le mi ma ovu ima agyi ru. Mi ma ayu sa ci mini isu ri agyi mini Mungu be ri sizu. ’Di drileba agapi ni ’ba azi ni eco isu ri ’i.
1 MI MA FE AGYI MINI YEHOVA BE RI MA ECA OKPORU
E’YO BIBLIA NI ’YORI: ‘Ma nga ovu emi ma Ataru, emi nga ovu ma anzipiru azini ma ezopiru, Yehova ’yo ra.’ (2 ’Ba Korintoa ’Diyi 6:18) Mungu le mi ma eca ima agyi inyia tu ri ru. Izita eri geri alu ’di yezuri ’i. Yehova omve mi ‘izizu sa driasi.’ (1 ’Ba Tesalonikia ’Diyi 5:17) Eri ava be egaza mini aliru azini e’yo mini asisile drozu drinia ’diyi erizu. (’Ba Filipia ’Diyi 4:6) Mini Mungu ziria ’ba akua ’diyi be, yi nga ne kini mini ria, Munguni ci ada.
O’bazu e’yo nzezu Mungu be ri ma dria, le mi ma eri e’yo eri ma tia. Mi eco ’di ’ye mini e’yo erini azini buku e’yo nzepi Biblia ma dria ’diyi onizu risi. (Zaburi 1:1, 2) Mi ma dro asisile e’yo mini oni ’diyi ma dria. (Zaburi 77:11, 12) E’yo erizu Mungu ma tiari le vini mi ma aci okuta Kristianini ’diyi ma alea indi.
E’yo nzezu ’ba azi ’diyi ni Yehova ma driari geri azi orodriru fezu agyi mini eri be ri ni zozu ri. ’Di ’yezu fudrici ri nga fe mini mi esizu eri vu inyia ogogo.
AFA MINI ECO ’YERI:
-
O’du alu alusi mi ma pe sa Biblia lazu azini Mungu zizu
-
’Ba akua ’diyiru, emi ma ’ba e’yo orindini ’diyi okporu aga mile tiza kaniku ava liza ra
2 EMI MA ISU AYIKO INZITA EMINI AKUA RISI
E’YO BIBLIA NI ’YORI: “Emi ma esi emi ogogo Mungu vu, Munguni nga ani i esi emi vu ogogo.” (Yakobo 4:8) Le mi ma ’ba otuta inzita akua rini azini emi ma obi vutini sabatu alu alusi. (E’doza 18:19) Te ’di ’yezuri cani ku. Le Mungu ma ovu idri emini ma alea o’du alu alusi ci. Mi ma fe agyi ’ba akua ’diyi ni Yehova be ri ma eca okporu mini e’yo nzezu eri ma dria “mini riria jo mini ma alia, mini aciria geria, mini laria va, azini mini engaria uru.” (Azita Amvizu 6:6, 7) Mi ma ’ba eri peta miniru ovuzu ekile Yosua le, ’yo ndra: “Te ma’iruni ’ba ma joa ’diyi be, ama nga azi nga Yehova dri.”
AFA MINI ECO ’YERI:
-
Mi ma ovu sa driasi otuta imbatani i ecipi e’yo ’ba alu alu akua ’diyi ni le ri be
