Ab’emikwano bawuliziganya basobole okuba n’enkolagana ennungi. Mu ngeri y’emu, Katonda ayagala twogere naye tusobole okuba n’enkolagana ennungi naye. Agamba nti: ‘Mulinkaabira, era mulinsaba, nange ndibawulira.’ (Yeremiya 29:12) Gy’onookoma okusaba Katonda, gy’ojja okukoma okuba n’enkolagana ennungi naye. (Yakobo 4:8) Bayibuli etukakasa nti: “Yakuwa ali kumpi n’abo bonna abamukoowoola.” (Zabbuli 145:18, NW) Gye tukoma okusaba Katonda, gye tukoma okuba mikwano gye egy’oku lusegere.

Yesu yagamba nti: “Ani ku mmwe awa omwana we ejjinja ng’amusabye omugaati? Oba amuwa omusota ng’amusabye ekyennyanja? N’olwekyo, oba nga mmwe . . . musobola okuwa abaana bammwe ebirabo ebirungi, Kitammwe ow’omu ggulu talisingawo nnyo okuwa ebintu ebirungi abo abamusaba!” (Matayo 7:9-11) Katonda ayagala omusabe kubanga “akufaako” era ayagala okukuyamba. (1 Peetero 5:7) Ate era ayagala omusabe bw’oba n’ebikweraliikiriza. Bayibuli egamba nti: “Temweraliikiriranga kintu kyonna, naye mu buli nsonga mutegeezenga Katonda bye mwetaaga, nga musabanga, nga mwegayiriranga, era nga mwebazanga.”—Abafiripi 4:6.

Abakugu mu kwekenneenya embeera z’abantu baakizuula nti abantu bukadde na bukadde bawulira nti beetaaga okusaba Katonda. Abantu abatakkiriza nti Katonda gy’ali nabo oluusi basaba. * Ekyo kiraga nti bantu baatondebwa nga balina obwetaavu obw’eby’omwoyo. Yesu yagamba nti: “Balina essanyu abamanyi obwetaavu bwabwe obw’eby’omwoyo.” (Matayo 5:3) Emu ku ngeri gye tuyinza okukola ku bwetaavu obwo, kwe kusaba Katonda buli lunaku.

Bwe tusaba Katonda, miganyulo ki gye tufuna?