SOMO 01
Biblia ká ka ndi kó ni tsotso ngbaribbai?
Ko adi riji ko chulo bbo shinga djo, nzadha djo, dhe djo, ndirigoti gosi ná ddo djo. Ko adi riji ko tsotso koni ndiro ko hwini ko bani na ná kpakpalo tso ró d’e, lorojina ko adi riji ko ba mbø, ko gba kodhó lotso ndirigoti koe hwè na maisha nǎ. Bí kʉ ná nrŭ rarie ri utso d’i nari kʉ Biblia ka ndi ngʉ le dhú le tso maisha nǎ nalo goti ngʉ ndirigoti ri bbʉ ná shauri ka ndi kó ko tsotso maisha nǎ. Ni ká riddi Biblia ka ndi kó ni chu ná nrŭ tsotso ko?
1. Biblia ká ngʉ ngba logoti?
Biblia ngʉ bbo nǎ mana kʉ ná i logoti: Shinga tso ká ngani ngbaribbai? Shi ká le di addudho? Nzá nji kosa ná nrŭ ká nzani addudho? Dhedhe ná nrŭ dho lo ká adi ngba? Krʉ kʉ ná nrŭ jirie ngoi, nde lɨ ká adi ngaba addudho? Dz’ djó lo kasi di ngbaribbai gosi ná saa na? Biblia ko li kpakpa nja ko ne fø logoti d’e ndirigoti bí kʉ ná nrŭ barie ndima dhó logoti ngbathonga naribbai b’lo.
2. Biblia ká ka ndi kó ko tsotso ngbaribbai ndiro koe hwè na maisha nǎ d’e?
Biblia adi bblo kʉ ná shauri bbʉ ko dho. Lorojina, ri adi ngbaribbai ma familia nǎ nrŭ ka ndima e hwè na nari ddi. Ri adi addu ma ko ka konji nari d’ra rie njedha na ko thí kʉ ri ró ndirigoti ngbaribbai ma ni ka ninji nidhó njí hwè nari. Ni si lochu bbo Biblia ddi fø lo djo nalo djo ri nǎ lo ko chu ná saa na. Ni si ri u nari kʉ “krʉ andiko [Biblia nǎ krʉ kʉ nalo] si Mungu dhó ro ndirigoti ri kʉ . . . faida na.”—2 Timotheo 3:16.
I broshua nga kʉ Biblia ri. Ro ri ni ronga cho ni ne Biblia nǎ longa ni ni ro. Føri dho ko rinzi ni zø i broshua nǎ njonjo somo nǎ kʉ ná andiko ndirigoti ni nja ngbaribbai ma ritso nju ni chu nalo na nari.
ANE LONANGA BBO
Anja ngbaribbai ma Biblia kongʉe nja nrŭ tsotso nari, ngbaribbai ma ni ka ni ba hwè ri zødha dho nari, ndirigoti addudho ma ri kʉ bblo ni ne ni tsotso kodha nja ni famu ri nari.
3. Biblia ka ndi ddá chutso ko dho
Biblia kʉ kadha bbai. Ri ka ndi kó ko tsotso ko vʉ lonanga bblo ndirigoti ko chu gosi ná saa na si njini nalo.
Anizø Zaburi 119:105, ndirigoti anitilo i ngadhudha djo:
-
I Zaburi ndi ná ke ká ngʉ Biblia nja ngbaribbai?
-
Ni ká adi Biblia nja ngbaribbai?
4. Biblia ka ndi ngʉ kodhó logoti ngʉ
Ddikpa le njari nari kʉ Biblia ngʉ ndi ngʉ adi dhu ndi tso cho bí kana nalo goti. Aninja VIDEO, ndirigoti anitilo i ngadhudha djo.
-
I video nǎ ká fø isɨle ngʉ ngba lo dhu ndi tso?
-
Biblia le zø nari ká kongʉe le tsotso ngbaribbai?
Biblia ko li kpakpa ko di ngadhu. Anizø Matayo 7:7, ndirigoti anitilo i lo djo:
-
Ni adi dhú nitso nalo kana ro ká Biblia ka ndi ngʉ ngba logoti?
5. Ni ka ni ba hwè Biblia ni zø nari dho
Bí kʉ ná nrŭ adi hwè ba Biblia ndima zø nari dho ndirigoti kpa adi faida ba ri nǎ ro. Aninja VIDEO, ndirigoti anitilo i ngadhudha djo.
-
I video nǎ, jadda kpa ká adi ndima mbu ngba nga le zø nari djo?
-
Nzɨ mai kpa adi riji ndima zønga bbo ro, Biblia ká kpa adi ji ndima zø addudho?
Biblia ka ndi ddi longa ko dho ndiro koe kpakpa ndirigoti koe ngab’odha na d’e. Anizø Waroma 15:4, ndirigoti anitilo i ngadhudha djo:
-
Biblia ka ndi bbʉ kpakpanga ndirigoti ngab’odha ni dho. Føri dho ká ni nanga jini nzá?
6. Nja nrŭ ka ndima kó ni tsotso ndiro ni famu Biblia d’e
Ri kʉ bblo le zø Biblia le le ro. Ro njakpa adi ri nja nari kʉ Biblia ndima zø nja nrŭ ma na nari adi ndima tsotso ko bbo. Anizø Matendo 8:26-31, ndirigoti anitilo i lo djo:
-
Ko ká ka ko famu Biblia ngbaribbai?—Anja verse 30 ndirigoti 31.
Etiopia nǎ ke dhó lo jingʉeri le kó ndi tsotso nja ndi famu maandiko bblo d’e. I ddoro bí kʉ ná nrŭ adi rinja ri kʉ bblo ndima tilo Biblia nǎ lo djo nja nrŭ ma na
NJA NRŬ ADI RIPO: “Biblia le zø nari kʉ pa le ledhó saa vi ri.”
-
Ni ká ka ni poeri ngba? Ká addudho?
LODZA DɄNGA
Biblia adi shauri bbʉ ko dho maisha nǎ, ri adi bbo na mana kʉ ná logoti ngʉ, ri adi kpakpanga ndirigoti ngab’odha bbʉ nrŭ dho.
Lo djolu le ngʉ nari
-
Biblia nǎ ká ko ka ko ba ngbadi ná shauri?
-
Biblia ká ngʉ ngba logoti?
-
Ni ká ka ni jiri ni chu ngba lo Biblia nǎ ro?
NI KA NI CHU NÁ NJA LO
Biblia bbʉ ko dho njʉ ná shauri ka ndi kó ko tsotso ko.
“Mafundisho ya Biblia—Ni Yenye Hekima Siku Zote” (Dzamu dhi Munara, Swahili Congo Na. 1 2018)
Anja ngbaribbai ma Biblia kongʉe ddikpa ke tsotso sese nga djó ro ke ngʉ hwini na ná kpakpalo tso ró nari.
Aneri ni chu dza nǎ nrŭ tsotso ka ndi kó ná shauri Biblia nǎ ro.
“Siri 12 ili Kuwa na Familia Yenye Furaha” (Amuka! Na. 2 2018)
Anja ngbaribbai ma Biblia adi bí kʉ ná nrŭ dhó che kʉ ná ngaddidha thika le dz’ djo pinyo ná ke djo nari.
Ni dho ká ringani ni chu Biblia nǎ lo addudho?—Da ri (3:14)
