Ntsiana butawasongela nkumbu Nzo ya Kimfumu, ndongosolo za Bibila zanguri zitumokenaka kuna Kimfumu kia Nzàmbi zitarilaka​—nguri m’samu ya samuna kwa Yezu.​—Like 8:1.

Zena mbuka za nsambululu ya tsieleka ha hata peleko ha kartie. Nikô salu tsia samuna nsangu zambote za Kimfumu tsikubamanaka. (Matie 24:14) Nzo za Kimfumu zazansoni kazibaka bunene bumoshi na ntungulu moshi ko, kâ zazansoni kazena nkakirika ko. Nzo za Kimfumu zazingi zivukananaka bimvuka biole peleko biabingi. Mvula zayokele, mafunda kumi (10 000) ma Nzo za Kimfumu twatungiri (tsishiri ntsiana Nzo tanu mu lumbu) mu bungu ti lukonti lwa bimvuka ni kula kwa lushimbiri. Ngâna bwe tulendelaka e?​—Matie 19:26.

Mu makabu matukaka mu nza yam’kaka tutungilaka zo. Makabu mango ku biro ya filiale tutambikaka mo, mpe bimvuka bio bie na nsatu tunga peleko yirika Nzo ya Kimfumu’awu bilenda defa mbongo zakondo yikila ndandu.

Bampangi ba mpila zazansoni batungaka zo bakabafuti. Bimvuka bia ntungulu za Nzo za Kimfumu bakubika ku ntsi zazingi. Ekipe ya bitungi na bampangi babayikaka moko mu tsimvuka tsimoshi tsimoshi mu tsizunga tsiawu bakweyendeke, ntangu zakana mu ntsi zakaka, mu babakisa mu tunga Nzo za Kimfumu zawu. Ku ntsi zakaka, Mbangi zizebi tsisalu babiekaka mu twarisa ntungulu na ntomosono ya Nzo za Kimfumu mu tsizunga tsimoshi. Ninga bampangi babingi bayukunu mu sala tsisalu tsia tunga batukaka ku mahata na mahata bakwizi salaka ku mbuka zazansoni za ntungulu, kâ tsisalu tsiatsinene bampangi ba tsimvuka tsivwiri Nzo ya Kimfumu babeni basalaka tsio. Mu bungu dia mpeve ya Yehova na ngolo za kanda diandi zitatuka mu luzolo lwa ntima moshi ntsiangu tulendaka mu sala tsisalu tsia mpila yo.​—Mikunga 127:1; Bisi-Kolose 3:23.

• Mubwenabwe mbuka zeto za nsambululu tutaka zo nkumbu Nzo za Kimfumu e?

• Bwe tulendelaka mu tunga Nzo za Kimfumu mu nza yam’kaka e?