KIUVU 9
Nga Mfwete Kwikila Muna Longi dia Lunungunuku?
ADIEYI WADI VANGA ONGEYE?
Yindula diambu edi: Tuka kolo, Alex okwikilanga muna Nzambi. Okwilanga mpe vo lekwa vangwa yavangwa. Kansi owau se lukatikisu kena lwau. O nlongi au a biologia ovovele vo e longi dia lunungunuku dialudi kikilu, lufimpu lwavanga akwa ngangu lusonganga vo zingu ku kinsalukisa kiayantikila. Alex kazolele fwiswa nsoni ko vana meso ma akwandi a sikola. Oyantikidi kukiyuvula vo: ‘Avo akwa ngangu nkutu bekwikilanga vo longi dia lunungunuku dialudi, mono i nani mu fidisa dio e mpaka?’
Kele vo wakala vana fulu kia Alex, nga wadi yantika kwikila muna longi dia lunungunuku wau vo e nkanda mia sikola mivovanga vo dialudi?
TOMA YINDULA!
O wantu ana befilaziananga e mpaka mu kuma kia longi diadi bazeye dina bekwikilanga, kansi ke bazeye ko e kuma bekwikidilanga dio.
-
Akaka bekwikilanga vo lekwa vangwa yavangwa kadi i wau belongwanga kuna dibundu diau.
-
Akaka bekwikilanga vo zingu ku kinsalukisa kiayantikila kadi i wau belongwanga kuna sikola.
YUVU SAMBANU TUFWETE FIMPA
Nkand’a Nzambi uvovanga vo: “Konso nzo kwa muntu yatungwa, kansi ndiona watunga e lekwa yawonso i Nzambi.” (Ayib. 3:4) Nga diangangu mu kwikila mu mvovo miami?
O vova vo ke vena yo Mvangi ko dia uzowa kikilu kadi diau dimosi kwandi yo vova vo e nzo ke yatungwa kwa muntu ko
DINA BEVOVANGA: E lekwa yawonso yayantika vava ntoto wanikuka mu ngolo.
1. Nani yovo nki kianikuna o ntoto?
2. Adieyi dina ye nsasa: kwikila vo lekwa yawonso mu kinsalukisa yayantikila yovo vangwa yavangwa?
DINA BEVOVANGA: Wantu mu bulu batuka.
3. Avo wantu mu bulu batuka nze nkewa, ekuma dinina vo wantu basundidi e nkewa mu ngangu?
4. Ekuma dikadilanga diampasi mu bakula una wavangilwa kana nkutu lekwa “yakete” yamoyo?
DINA BEVOVANGA: E longi dia lunungunuku dialudi kikilu.
5. Nga muntu ovovanga wo katoma vavulula diambu diadi?
6. Wantu kwa bayantika kwikila muna longi dia lunungunuku vava bawá vo akwa ngangu awonso i diau bekwikilanga?
“Yindula vo mu mfinda wele yo wana nzo yambote-mbote ya mabaya, nga ovova vo: ‘Nzo yambote kikilu! Nti miasotokanga umosi mosi yo kituka se nzo.’ Nanga ke diau ko oyindula. Ke dia ngangu ko. Avo i wau, ekuma tufwete kwikidila vo lekwa yawonso yau mosi yavaika?”—Julia.
“Yindula vo muntu uvovese vo lekwa ibukidi muna nzo, i bosi e tinta ye papela zimwanganene muna nzo yo kituka se disionário yampwena. Nga okwikila dio?”—Gwen.
EKUMA TUFWETE KWIKIDILA MUNA NZAMBI?
Nkand’a Nzambi ukutukasakesanga vo twakala yo “nyindu asikila” yovo umbakuzi. (Roma 12:1) Ediadi disongele vo ke tufwete kwikila kaka ko vo Nzambi una mu kuma kia
-
NGINDU (Edi iyindulanga vo vafwete kala yo mvangi)
-
UMPUKUMUNI WA WANTU ANKAKA (Esi dibundu dieto i diau bekwikilanga)
-
MASE MAKU (mase mame bandonga vo Nzambi una kieleka, kiakala ye dina ndenda vanga ko)
Ngeye kibeni ofwete sadila umbakuzi waku vitila wakwikila konso diambu.
“Vava nlongi kuna sikola kekutulonganga una usadilanga e nitu eto, kikalanga yo lukatikisu ko vo Nzambi una kieleka. Yikwa yawonso ya nitu eto, kana nkutu ina yakete, mfunu ina. Nkumbu miayingi ke tuzayanga wo ko vo mu sala ina. E mpila yavangilwa e nitu eto yasivi kikilu!”—Teresa
“Vava imonanga nzo yandá, masuwa yovo kalu, ikukiyuvulanga vo: ‘Nani wavanga dio?’ Ngangu kikilu divavanga muna vanga e kalu kansi konso sengwa kifwete siwa vana fulu kiandi kimana e kalu diatoma sala. Wau vo e kalu ke dilendi kuyivanga ko, adieyi tuvova mu kuma kia nitu a muntu.”—Richard
“Ekolo yalongoka umbangu wa nza, yamona vo dia uzowa mu kwikila muna longi dia lunungunuku. . . . Kwa mono, ‘lukwikilu’ lwayingi divavanga mu kwikila muna longi dia lunungunuku, ke mu kwikikila mu Mvangi ko.” —Anthony
TOMA YINDULA
Kana una vo akwa ngangu se kolo bayantika vavulula e ziku kia longi dia lunungunuku, yamu wau bakinu filaziana e mpaka. Avo akwa ngangu za nza yau kibeni bakinu filaziana e mpaka, nga diambi mu katikisa longi diadi?
Nanga Oyangalela Mpe Malongi Mama
WHAT YOUR PEERS SAY
Nga Diangangu mu Kwikila Muna Nzambi?
Muna video yayi ozaya toko dimosi ye ndumba imosi basunda lukatikisu yo kumika lukwikilu lwau.
