Zasoneka Matai 2:1-23
2 O Yesu vava kawutukidi muna Beteleme+ a Yuda muna lumbu ya Erodi*+ wa Ntinu, afimpi a* ntetembwa batukidi kuna Este bezidi ku Yerusaleme,
2 oku vo: “Akweyi kena o ntinu a Ayuda ona owutukidi?+ Kadi tumwene ntetembw’andi vava tukedi kuna Este, twizidi twamvumbamena.”*
3 Vava kawidi e diambu diadi, Erodi wa Ntinu otelamene o ntima, yandi ye nkangu wawonso wa Yerusaleme;
4 okutakese mbuta za nganga zawonso ye asoneki a nkangu, oyantikidi kubayuvula kana akweyi kewutukila o Kristu.*
5 Bamvovese vo: “Muna Beteleme+ a Yuda, kadi i diau diasonekwa muna ngunza:
6 ‘Ongeye, Beteleme ya nsi a Yuda, ku mbanza isundidi sakalala ko vana vena ayadi a Yuda, kadi omu ngeye mu vaikila nyadi, ona ovungula nkangu ame Isaele.’”+
7 I bosi, Erodi obokele afimpi a ntetembwa kuna kinsweki, otomene kubayuvula kana nkia ntangwa imonekene ntetembwa.
8 Ubatumini kuna Beteleme, oku vo: “Nuenda toma vava e kingiana-ngiana, avo nunsolwele, nuiza kunsamunuina, kimana omono mpe ngienda, yamvumbamena.”
9 Vava bawidi dina kavovele o ntinu, basimbidi e nzila, e ntetembwa ina bamwene vava bakedi kuna Este+ ibavitidi kuna ntwala, yavana yele telama vana vakedi e kingiana-ngiana.
10 Vava bamwene ntetembwa, bayangalele kikilu.
11 Vava bakotele muna nzo, bamwene kingiana-ngiana yo Maria wa ngudi andi, bafukamene, bavumbamene kingiana-ngiana. Bavaikisi tusalu twau yo kumvana tukau—wolo, ndumbu a nti a lebona ye mô.*
12 Kansi, wau balukisu kwa Nzambi muna ndozi+ balembi vutuka kwa Erodi, bavutukidi kuna nsi au mu nzila yankaka.
13 Vava bavutukidi, mbasi a Yave* omonekene kwa Yosefe muna ndozi,+ oku vo: “Telama, bonga e kingiana-ngiana yo ngudi andi yo tinina kuna Engipito, kala kûna yavana ikuvovesa e diambu, kadi Erodi ovavanga kingiana-ngiana kamvonda.”
14 Yosefe otelamene muna fuku, obongele kingiana-ngiana yo ngudi andi, wele kuna Engipito.
15 Okedi kûna yavana kiafwa Erodi. Ediadi dialungisa dina Yave* kavova muna ngunz’andi, oku vo: “Muna Engipito mbokele mwan’ame.”+
16 I bosi, Erodi vava kamwene vo afimpi a ntetembwa bamvunini, ofungidi kikilu makasi, okanikini vo wan’amakala awonso muna Beteleme ye muna mavata mandi mawonso bavondwa, tuka ana bena ye mvu miole ye awana ke balungisi mio ko, mun’owu wa ntangwa ina katoma fimpa kw’afimpi a ntetembwa.+
17 I bosi, dialungana dina diasakulwa muna Yeremiya wa ngunza, ona wavova vo:
18 “Ndinga iwakane muna Rama, dilu ye mbembo. Rakele+ odilanga wan’andi, kazolele fiaulwiswa ko, kadi ke bena diaka ko.”+
19 Vava Erodi kafwidi, mbasi a Yave* omonekene kwa Yosefe muna ndozi+ kuna Engipito,
20 oku vo: “Telama, bong’e kingiana-ngiana yo ngudi andi, wenda kuna nsi ya Isaele, kadi awana bavavanga moyo a kingiana-ngiana, bamene fwa.”
21 Otelamene, obongele kingiana-ngiana yo ngudi andi, bele kuna nsi ya Isaele.
22 Kansi, vava kawidi vo Ankelao oyadidi muna Yuda vana fulu kia Erodi wa se diandi, omwene o wonga wa kwenda ko. Kansi, wau kalukisu kwa Nzambi muna ndozi,+ wele muna zunga kia Ngalili.+
23 Wele zingila muna mbanz’a Nazarete,+ kimana dialungana dina diavovua kwa angunza vo: “Oyikilwa vo musi Nazarete.”*+
Mvovo vana yand'a lukaya
^ Tala Nsas’a Mvovo.
^ Yovo “nganga za.”
^ Mvovo wa sina: “twankunda.”
^ Yovo “Masia; Kuswa.”
^ Ndumbu ye mô i lekwa yansunga.
^ Nanga mu mvovo wa Kiyibere watuka una ye nsasa vo “ntombo.”
