NTU A DIAMBU WA FUKWA | NGA OLENDA BAKULA NKAND’A NZAMBI?
Ekuma Ofwete Bakulwila o Nkand’a Nzambi?
“O Nkand’a Nzambi i nkanda utoma sadilwanga muna mabundu. Kansi kuna kwa esi China, o nkanda wau ke una mfunu ko.”—LIN, CHINA.
“E nkanda miavauka mia dibundu diame dia Hindu nkutu kibakulanga mio ko. Aweyi ndenda bakulwila o Nkand’a Nzambi?”—AMIT, ÍNDIA.
“Ntoma zitisanga Nkand’a Nzambi wau vo nkanda wankulu, wantu bevovanga vo i nkanda usundidi o tekwa mu nza. Kansi, kiasidi wo mona ko muna zingu kiame.”—YUMIKO, JAPÃO.
Wantu ayingi mu nza betoma zitisanga Nkand’a Nzambi. Kansi, ke bazeye diambu ko yovo zaya mayingi mu kuma kia nkanda wau. Ediadi ke divangamanga kaka kwa mafunda ma wantu bezingilanga kuna Ásia ko, kansi kwa awana mpe bezingilanga mu nsi zitoma sadilanga Nkand’a Nzambi.
Kansi nanga olenda kukiyuvula, ‘ekuma mfwete bakulwila o Nkand’a Nzambi?’ Obakula nkanda wau dilenda kusadisa muna:
-
Solola kiese yo luyangalalu
-
Singika mambu muna nzo
-
Sunda ntelekwa moyo
-
Kala ye yikundi yambote
-
Sadila e nzimbu mu mpila yambote
Tala e nona kia Yoshiko kuna Japão. Wavavanga zaya dina Nkand’a Nzambi ulonganga, ediadi diamfila mu baka nzengo za tanga wo. Nkia nluta kabaka? Wavova vo: “Nkand’a Nzambi wansadisa mu solola e nsas’a zingu yo kala ye vuvu mu kuma kia kusentu. Owau, kikendalalanga diaka ko.” Amit ona oyikilu kala, wabaka mpe nzengo za fimpa Nkand’a Nzambi. Wavova vo: “Yasivika kibeni mu mona vo Nkand’a Nzambi uvuidi malongi mamfunu malenda sadisa konso muntu.”
Nkand’a Nzambi usadisanga mafunda ye mafunda ma wantu mu soba e zingu kiau. Ekuma olembi fimpila o Nkand’a Nzambi yo mona una ulenda kusadisila?
