Mu mbanza Los Angeles, California, Estados Unidos yasansukila, mbanza itomene zayakana mu kuma kia umpumbulu ye fu kia nua lekwa ya nkolwa (drogas). Sambanu twawutuka, mono i mwana zole muna vumu kieto.

Ngudi ame mu dibundu dia Evangélica katusansila. Kansi vava yakituka se toko, yayantika nata zingu kia disu ku nsi a lukaya. Kina kia lumingu yayendanga mu nzo a nzambi mu yimbila muna buka kia ayimbidi. Muna lumbu yakaka yayendanga mu nkinzi, yakivananga mu ndwa za nkolwa yo tá zumba.

Nkwa lulendo ye nsoki yakala. Vava yanwananga, yasadilanga konso lekwa yamonanga muna wanda kwa muntu kimana yansunda. Mana yalongokanga kuna nzo a nzambi ke mansadisanga ko mu kala ye fu yambote. Yavovanga vo: “O Mfumu i nlandi a kunda, omono isadilwa kiandi!” Vava yatanganga sikola zandá kuna mfoko a mvu mia 1960, yavukumunwa kwa buka kia mbumba Panteras Negras kiazayakana mu kuma kia tanina wete dia nkangu. Yakota mu buka kia wana sikola ana bataninanga wete dia nkangu. Nkumbu miayingi twavaikanga muna nzila mu telamena luyalu, e sikola yakangwanga mu fikolo konso ntangwa twavanganga e diambu diadi.

Kuna kwalanda, yamona vo o telamena luyalu ke dialungisanga zolela yame ko. Muna kuma kiaki yawokesa mavangu mame ma nsoki. Muna bonga e nona, lumbu kimosi twatala filme yasonga e mpasi bamweswa esi Africa ana banatwa ku Estados Unidos se ngamba. Ediadi diatufila mu funga makasi yo yantika wanda mindele miakala muna nzo twatadilanga e filme. I bosi, twavaika yo kwenda vava mindele miakala muna belo kimana twabawanda.

Vitila yalungisa e mvu 20, mono ye mpangi zame mambu mayingi ma nsoki twavanga. Nkanu miayingi twavolanga. Mosi muna abunzi ame mu buka kia yimpumbulu kiatoma zayakana kakala, mono mpe yakota mu buka kiakina. E zingu kiame beba kaka kiabebanga.

Mase ma nkundi ame Mbangi za Yave bakala. Vava bandomba ngienda muna tukutakanu twau, yatambulwila. Tuka kuna lubantiku  yamona vo Mbangi za Yave baswaswana kikilu ye mabundu mankaka. Yau awonso muna lukutakanu basadilanga e Bibila. Kana nkutu aleke, bafilanga malongi muna tukutakanu! Yasivika kibeni vava yazaya vo e nkumbu a Nzambi, Yave. (Nkunga 83:18) Wantu a makanda mayingi bakala mu nkutakani yayina, kana una vo i wau ke mwakala mpambula ko.

Kuna lubantiku, kiakala ye kani dia longoka Bibila ye ko Mbangi za Yave, kansi yayangalelanga tukutakanu twau. Lumbu kimosi, akundi ame bayenda ku nkinzi ekolo yakala muna lukutakanu. Kuna nkinzi wauna, bawanda nleke mosi yavana kafwa wau vo kazola kubavana nzaka andi ko. Muna lumbu kialanda, bayisana mu kuma kia dina bavanga. Basevanga nkutu vava banatwanga kuna mbazi a nkanu. Ayingi muna yau bavewa tumbu kia kala mu pelezo e zingu kiawonso. Kiese kiayingi yamona wau vo kiakala yau kumosi ko. Yabaka e nzengo za soba e zingu kiame, yayantika mpe longoka e Bibila.

Wau vo kiazolanga wantu a makanda makaka ko, mana yamona kwa Mbangi za Yave mansivikisa kibeni. Muna bonga e nona, vava Mbangi a Yave mosi wakala vo mundele kayenda mu nkangalu, wasisa wan’andi kuna nzo ya mpangi wakala vo ndombe. Kuna diak’e sambu, ampangi bakala vo mindele batambula nleke mosi muna nzo au ona wakala ndombe, wavavanga fulu kiazingila. Ediadi diamfila mu kwikila vo Mbangi za Yave ngwizani bezingilanga ye mvovo mia Yesu mina muna Yoane 13:35: “Muna wau i bezayil’o wantu awonso vo nu alongoki ame, ovo nzolani nuna yau.” Yamona vo nsolwele kintwadi kiakieleka kia wan’angudi.

Muna longoka e Bibila, yabakula vo mfwete soba e ngindu zame. Kiasoba kaka ngindu zame ko mu kala nkwa luvuvamu, kansi yabakula vo i wau ndenda kadila ye zingu kiakiese. (Roma 12:2) Yanungunuka muna mwanda, yavubwa muna mvu wa 1974 yo kituka Mbangi a Yave.

Kana nkutu kuna nima luvubu lwame, diavavanga vo yakwamanana vanga e nsobani muna fu yame. Muna bonga e nona, lumbu kimosi vava twasilanga umbangi mu nzo ke nzo, yalanda o mwivi wayiya e radio muna kalu diame. Vava yamfinama, waloza e radio yo tina. Vava yazayisa ampangi una yabakila e radio ame, nkuluntu mosi muna buka wangiuvula: “E Stephen, adieyi wadi kumvanga kele vo umbaka?” E kiuvu kiaki kiamfila mu bakula vo mfwete kwamanana vanga ngolo mu kala nkwa luvuvamu.

Muna ngonde a Okutoba ya mvu wa 1974, yakota mu salu kia ntangwa ke ntangwa, ola 100 yasalanga konso ngonde muna salu kia longa wantu e Bibila. I bosi, yavewa e lau dia sadila kuna vula dia Mbangi za Yave kuna Brooklyn, Nova York. Muna mvu wa 1978, yavutuka kuna Los Angeles mu lunga-lunga ngudi ame wayelanga. Vava kiavioka mvu miole, yakazala yo Aarhonda. Nkaz’ame watoma kunsadisanga mu lunga-lunga ngudi ame yavana kafwa. Kuna kwalanda, mono yo Aarhonda twakota Sikola ya Ngiladi. I bosi, twafilwa kuna Panama, i kuna tusadilanga se misionario yamu wau.

Tuka yavubilwa yamu wau, iwanananga ye mambu mayingi malenda kumfila mu nwana. Kansi, awana bekuntontanga kikubalandanga ko. Wantu ayingi kumosi yo nkaz’ame, bekunsanisinanga mu mpila mvengelanga e ntonta. Mono kibeni mpe isivikanga. Ke mu ngolo za mono kibeni ko yasobela kiwuntu kiame. Kansi, nkwikilanga vo nkum’a Diambu dia Nzambi wansadisa.—Ayibere 4:12.

Diambu dia Nzambi diansadisa mu kala ye kani muna zingu yo kituka nkwa luvuvamu. Vana fulu kia wanda wantu, ikubalonganga e Diambu dia Nzambi. Muna bonga e nona, mosi mun’awana yalongoka yau Nkand’a Nzambi mbeni ame kakala kuna sikola. Vava kavubwa, twazingila nzo mosi mu fikolo. Yamu wau tu akundi akieleka. Mono yo nkaz’ame tusadisi kala vioka 80 lwa wantu mu kituka Mbangi za Yave.

Ivutulanga matondo kwa Yave wau kansadisa mu kala ye zingu kiakiese muna kintwadi kia wan’angudi.