Muna mvu wa 1985, mvu kumi kaka yakala miau vava aleke a nsi ya Camboja balwaka kuna sikola yatangilanga kuna Columbus, Ohio, Estados Unidos. Mosi mun’aleke awaya wazaya mvovo miakete mia Kingelezo. Muna lusadisu lwa fwaniswa, wampovesanga mambu mansisi, ma lubangamu, ma wantu bavondwanga ye ma ndonga yatinanga. Yadila muna fuku vava yayindulanga aleke awaya. Yazola kubazayisa e vuvu kia Paradiso ye lufuluku, kansi ke babakulanga ndinga yavovanga ko. Kana una vo kindende yakala, yabaka e nzengo za longoka e nding’a Camboja kimana yazayisanga oma ma Yave kw’akundi ame a sikola. Muna kolo kiakina, kiazayanga ko dina e nzengo zazi zivanga muna zingu kiame kuna kusentu.

O longoka e ndinga Camboja diampasi kikilu diakala. Vakala ye ntangwa yina yazola yambula longoka e ndinga yayi, kansi Yave wankasakesa muna lusadisu lwa mase mame. Kuna kwalanda, alongi ye akundi ame a sikola, bankasakesa mu longoka e salu kifutanga nzimbu zayingi. Kansi, wau vo yazola kota mu salu kia kimviti a nzila, yalongoka e salu kiadi kumpana e ntangwa ya sala ndambu a lumbu kimana yalungisa ekani diame. Vava yatukanga kuna sikola, yawanananga ye aviti a nzila yo sala yau kumosi muna salu kia umbangi. Yakivana kuna mvevo mu sadisa alongoki ana balongokanga Kingelezo. E nzengo zazi, zantwasila nluta muna mvu mialanda.

Vava yakala ye kimbuta kia mvu 16, yawá e nsangu mu kuma kia buka kia nding’a Camboja kiakala kuna Long Beach, California, Estados Unidos. Yayenda kingula e buka kiaki. Kuna kwalanda yalongoka o tanga e nding’a Camboja. Ke vavioka kolo ko vava yafokola tanga sikola, yayantika salu kia kimviti a nzila yo kwamanana sila umbangi kwa esi Camboja bazingilanga lukufi ye nzo eto. Kansi, vava yalungisa e kimbuta kia mvu 18, yakala ye ngindu za kwenda zingila kuna Camboja. Nsi ya vonza kikilu yakala, kansi yazaya wo vo muna mafuku kumi ma wantu bezingilanga kuna Camboja, akete kaka bawidi kala e nsangu zambote za Kintinu. Muna kolo kiakina, nkutakani mosi kaka yakala ko ya ateleki 13 muna nsi yawonso. O nkumbu antete yakingula nsi a Camboja, mvu 19 yakala miau. Vava vavioka mvu miole, yabaka e nzengo za kwenda zingila kuna. Yasolola salu kia ndambu a lumbu kia sekola yo longa Kingelezo muna kuyilunga-lunga ekolo yasalanga e salu kia kimviti a nzila. Kuna kwalanda, yasolola nkento ona wansadisa mu lungisa makani mame ma mwanda. Tukalanga ye kiese kia sadisa wantu ayingi a nsi ya Camboja mu yekola e zingu kiau kwa Nzambi.

Yave olungisanga e ‘zolela ya ntim’ame.’ (Nku. 37:4) O kitula o wantu s’alongoki i salu kisundidi e kiese muna salu yawonso. Muna mvu 16 se ngina kwaku Camboja, e buka yawana kia ateleki 13 kianungunuka yo kituka se nkutakani 12 ye buka 4.—Lusansu lwa Jason Blackwell.