VONZA: Nkanda mia mawu ye ngungu, * i lekwa yantete yasonekena, yasadilwanga kwa Asoneki a Nkand’a Nzambi ye awana babandula wo. (2 Timoteo 4:13) Aweyi e lekwa yayi yasila Nkand’a Nzambi mu vonza?

Mawu sazu mefwanga ye ke mekalanga ngolo ko. Richard Parkinson ye Stephen Quirke, belongokanga kisi nsi kia wantu a nz’ankulu, bavova vo: “Nkanda mia mawu sazu mifusanga yo kituka se ntoto. Avo misilu muna lundilu, mibakanga e mbumbu yo diwa kwa nselele ye nsumi.” Vava kiasololwanga nkanda mia mawu, miasiwanga vana fulu kina ye mvutu, ediadi diafusisanga e nkanda miami mu sazu.

Ngungu mvu miayingi yazingilanga ke mu nkanda mia mawu ko. E ngungu fusa zifusanga avo zibakidi e mbumbu ye mbangazi yasaka. * Ngungu zidiwanga mpe kwa nselele. Kana una i wau, muna nkanda Everyday Writing in the Graeco-Roman East, mwasonama vo, “e nkanda mu sazu miafusanga.” Kele vo Nkand’a Nzambi wafusa, e nsangu zandi mpe vila zadi vila.

UNA NKAND’A NZAMBI WAVULUKILA: Muna nsiku wa Ayuda, diasikidiswa vo konso ntinu ovuanda vana kunda “kayibandulwila Nsiku wau,” i sia vo, nkanda tanu miantete muna Nkand’a Nzambi. (Nsiku 17:18) Diakiese mu zaya vo muna tandu kiantete, vakala yo wantu bavewa e salu kia bandula e sono yayingi mu moko. Masambilu mawonso muna Isaele makalanga ye Sono, kana nkutu kuna Makedonia yakala kwanda. (Luka 4:16, 17; Mavangu 17:11) Aweyi e sono yankulu yabandulwa mu moko yatoma lundilwa yamu unu kiaki?

Philip Comfort, nkwa ngangu olongokanga Luwawanu Lwampa, wavova vo: “Ayuda bakala ye fu kia lundila e ngungu za Sono muna nkela yovo muna mvungu kimana zalembi beba.” Akristu mpe balandanga e fu kiaki. I dianu e ngungu zayingi za Sono yankulu zasololwa muna mvungu, muna fulu ya tombe, muna nduka ye muna zunga ina ye mbangazi yayingi.

NLUTA: Vena ye mafunda ye mafunda ma ngungu za Sono yankulu, zivangidi kala 2.000 ma mvu, ye zakinu lundwa yamu una kiaki. Ke vena nkanda wankaka ko wa nz’ankulu wabandulwa nkumbu miayingi tuka kolo.