NTU A DIAMBU WA FUKWA | NKAND’A NZAMBI—KE WAFUKISWA KO
Mbeni ke Balenda Fukisa Nkand’a Nzambi Ko
VONZA: Ayadi ayingi ye mfumu za mabundu babaka e nzengo vo Nkand’a Nzambi ufwete fukiswa mu nza yawonso. Basadilanga e wisa kiau muna sima wantu balembi sumba Nkand’a Nzambi, balembi wo nieteka yo lembi wo sekola mu ndinga zankaka. Tala dina bavanga:
-
Muna mvu wa 167 vitila tandu kieto: Ntinu Seleucid Antiochus Epiphanes, ona wakomekenanga Ayuda batambulwila e nsambila ya Mingerekia, wakanikina vo, e Sono ya Luwawanu Lwankulu yafwaswa emvimba. Vava makesa mandi basololanga ngungu za Nsiku “batiazanga yo yoka zo. Bavonda o wantu bakwikilanga vo Nkand’a Nzambi ulenda kubafiaulwisa yo kubakumika.”
-
Muna Tandu Kiantete: Akaka muna mfumu za dibundu dia Katolika, bafunga makasi vava alongi balonganga mambu mena muna Nkand’a Nzambi vana fulu kia longa lusansu lwa dibundu dia Katolika. Basikidisa vo nkanda Nkunga kaka ufwete tangwanga muna nding’a Kilatini, awonso bakala ye nkanda miankaka bayikilwanga vo avengomoki. Mfumu a dibundu dimosi wasola wantu yo kubakanikina vo “benda toma vavi avengomoki muna konso nzo yamuna masuku ma nsi a ntoto. . . . Konso nzo yawanukanga avengomoki yafwaswanga.”
Kele vo e mbeni balenda fukisa o Nkand’a Nzambi, e nsangu zandi mpe nga ntama zavila.
Nsekola ya Nkand’a Nzambi ya William Tyndale muna Kingelezo, kana una vo yayokwa, ke yafukiswa ko. Tyndale wavondwa vana meso ma ndonga muna mvu wa 1536
UNA NKAND’A NZAMBI WAVULUKILA: Ntinu Antiochus wabangikanga Ayuda muna Isaele, kansi ndonga muna yau batina muna zunga yankaka. Akwa ngangu bevovanga vo muna tandu kiantete ndonga muna nkangu a Yuda wayaluka muna Isaele. Ayuda muna masambilu balundilanga e Sono yavelela, e Sono yayi yasadilwa mpe kwa mbandu zabalandila, kumosi mpe ye Akristu.—Mavangu 15:21.
Muna Tandu Kiantete, o wantu ana bazolanga o Nkand’a Nzambi bazizidila lubangamu, bakwamanana mpe sekola Nkand’a Nzambi yo bandula wo. Tuka muna tandu kia 15, Nkand’a Nzambi ndambu-ndambu wasekolwanga muna ndinga zayingi tezo kia 33, vitila kiasokwa e masini menietekanga nkanda. Kuna kwalanda, Nkand’a Nzambi wayantikwa sekolwa yo nietekwa mu nzaki.
NLUTA: Kana una vo Ntinu miangolo ye mfumu za mabundu bazola wo fukisa, Nkand’a Nzambi i nkanda utomwa kayaneswanga mu nza yawonso, i wau kaka usekolwanga mu ndinga zayingi muna lusansu lwa wantu. Nkand’a Nzambi wasoba e Nsiku, ndinga ye zingu kia wantu muna nsi zayingi.
Nanga Oyangalela Mpe Malongi Mama
DOCUMENTARIES
Batoma Vuanga e Bibila o Mfunu—Ndambu Kaka (William Tyndale)
O zola kwandi muna Bibila kwatoma monekanga muna salu kiandi. Yamu unu kikututwasilanga e nluta.
