AVO wabwilwa kala e sumbula, olenda bakula una bemonanga awana bebwilwanga e sumbula: Bekendalalanga, dimbula e vuvu, lembi zaya dina bevanga, ntelamw’a moyo yo wonga. Ayingi muna wantu awaya bemonanga vo mbote bafwa kwau ke mu kwamanana zinga ko.

Avo obwidilu e sumbula, olenda mpe mona vo kulenda diaka zizidila ko. Olenda nkutu yindula vo e zingu ke kina mfunu ko. Kansi, Nkand’a Nzambi uvovanga vo e zingu mfunu kikilu kina. Nkand’a Nzambi usonganga mpe e kuma olenda kadila ye vuvu vo mambu toma metoma kuna sentu.

E sono kia Kimpovi 7:8 kivovanga vo: ‘E mbaninu a diambu isundidi lubantiku.’ Avo obwidilu e sumbula, e vuvu kilenda dimbuka. Kansi, avo okedi yo luzindalalu yo vanga e ngolo za tungulula e zingu kiaku, o mambu malenda soba.

Nkand’a Nzambi uyikanga e ntangwa isinga kala vo ‘e nding’a dilu ke iwakana diaka ko, ngatu nding’a kazu.’ (Yesaya 65:19) E diambu diadi divangama vava ntoto ukituka se paradiso muna Kintinu kia Nzambi. (Nkunga 37:11, 29) E sumbula ke ikala diaka ko. E mambu mawonso mampasi mekutubwilanga ke tuyindula mo diaka ko kadi Nzambi wa Mpungu-ngolo wasia nsilu vo: “Oma mantete ke meyindulwa ko, ngatu kota muna ntima.”—Yesaya 65:17.

Yindula e diambu edi: O Mvangi eto una ye tima dia ‘kuvana e vuvu ye zingu kiasikila kuna sentu.’ (Yeremiya 29:11) Nga o zaya e ludi kiaki, dilenda kusadisa mu kwamanana badikila e zingu vo mfunu kikilu kina? Sally ona tuyikidi muna longi diantete wavova vo: “O sungamena e mambu mawonso makiese mesinga lungana muna Kintinu kia Nzambi, dilenda kusadisa mu yambula sia e sungididi muna mambu mampasi mabwididi yo zizidila mo.”

Tulombele walongoka diaka mayingi mu kuma kia Kintinu kia Nzambi ye mana kisinga vanga muna wete dia wantu. O vanga wo dikusadisa mu lembi dimbula e vuvu kana nkutu nkia sumbula kilenda kubwila yo vingila ye kiese kiawonso e nz’ampa vava e sumbula ke ikala diaka ko. E kolo tuvingilanga e ntangwa yayi, Nkand’a Nzambi ukutuvananga tuludiku tulenda kutusadisa mu zizidila e mpasi zitwasanga e sumbula. Badika tuludiku tulende.