Avo ozolele kwenda ku fulu kina kuzeye ko, adieyi ofwete vanga?

1. 1. Wenda muna nzila ina oyindwidi vo i yau ofwete kwenda.

2. 2. Landa akaka ye vuvu vo yau batomene zaya e nzila.

3. 3. Vava lusadisu lwa nsongi a nzil’ambote nze nkundi ona tomene zaya e nzila yovo olenda sadila GPS yovo mapa.

Avo tulende e ngindu zantete ye za zole, tulenda kweto lwaka konso fulu, kansi ke tulwaka ko kuna fulu kina tuzolele kwenda. Kansi avo tulende e ngindu za tatu, tukala ye ziku vo lwaka tulwaka kuna fulu kina tuzolele kwenda.

E zingu kieto kina nze nzila ina tuvingilanga vo yatulwakisa ku fulu kilenda kututwasila e kiese. Kansi e fulu tuvavila lusadisu, kisonga kana vo tulwaka ku fulu kiokio yovo ve.

Kana una vo nzengo zayingi tubakanga muna zingu kieto ke zitwasanga nsobani zampwena ko, e nzengo zankaka zamfunu kikilu. Zisonganga una tubadikilanga edi diambote ye edi diambi. E nzengo zazi, zilenda twasa nluta yovo mfwilu mu kolo kianda tuka kwa yeto kibeni ye kwa yitu ye akundi eto. Tulenda baka e nzengo zazi zamfunu mu mambu malende:

• Vukana yo longo

• Kala nkwa ziku, salu ye nzimbu

• Mpila ya sansila wana

• Mpila ya kadila ye akaka

Aweyi olenda kadila ye ziku vo e nzengo obaka muna mambu mama, zingu kiakiese zikutwasila kuna sentu kumosi ye esi nzo aku?

Tala e kiuvu tufwete vanina e mvutu yeto awonso: Nki kilenda kunsadisa mu baka nzengo zambote muna diambu ditadidi mbote ye mbi?

Eyingidilu diadi disasilanga e kuma tulenda kadila ye vuvu vo e Bibila i mfidi ambote muna diambu ditadidi e mbote ye mbi. Disasilanga mpe una Bibila kilenda kutusadisila muna diambu diadi diamfunu.