Biblia yau mosi kepesaka basekele mingi samu na kubakusa yau. Kondua kutadila buala na nge, nsangu ya Nzambi yina kele na Biblia ‘kele mpasi mingi ve samu na nge, yakele mpe ve ntama.’—Kulonga 30:11.

Basekele samu na kubakusa Biblia

1.   Vuanda na makanisi ya mbote. Ndima Biblia lokola Mpova ya Nzambi. Vuanda na kumikitisa, samu Nzambi kezolaka ve bantu ya lulendo. (1 Batesalonika 2:13; Yakobo 4:6) Kasi, manga kuvuanda na kiminu yina mekondua bidimbu—Nzambi zola nge sadila ‘mayele na [nge] ya kuyindula.’—Baroma 12:1, 2.

2.   Sambila samu na kubaka nduenga. Biblia metuba na Bingana 3:5: ‘Kutula ve ntima na mayele na nge mosi ya kubakusa mambu.’ Kasi, ‘tatamana kulomba Nzambi’ samu na kubaka nduenga ya kubakusa Biblia.—Yakobo 1:5.

3.   Longukaka mbala na mbala. Nge kebaka mambote mingi na ndongokolo na nge ya Biblia kana nge kena kusala yau mbala na mbala kasi ve kana ntangu memonana.—Yozue 1:8.

4.   . Longuka dilongi mosi mosi. Kulonguka dilongi mosi mosi kele mutindu mosi ya mbote kuluta ya kubakusa Biblia, samu yakesadisa nge nge zaba yina Biblia kena kulonga samu na diambu mosi. Banda na ‘malongi ya ebandeli,’ mpe na manima ‘kuenda na ntuala na nzila ya malongi yina kele ya kuyela (malongi ya mpinda).’ (Baebreo 6:1, 2, Easy-to-Read Version) Nge kebakusa ti nge lenda fuanikisa verse mosi na baverse yankaka mpe nge kelonguka ti bitini yankaka ya kusuasana ya Biblia kepesaka makanisi mutindu mosi, ata bitini yina kele ‘mpasi na kubakusa.’—2 Piere 3:16.

5.   Lomba lusadusu na bantu yankaka. Biblia kena kukindisa beto beto lomba lusadusu na bantu yina kele na mbakusulu ya Biblia. (Bisalu 8:30, 31) Bambangi ya Yehova kepesaka ndongokolo ya Biblia ofele. Lokola Baklisto ya siekle ya ntete, bakesadilaka Masonukua samu na kusadisa bantu yankaka bazaba yina Biblia kelongaka mpenza.—Bisalu 17:2, 3.

Mambu yina nge kele na yau mfunu ve

1.   Kutanga bakalasi mingi. Bantumua 12 ya Yesu bakusaka Masonukua mpe bavuandaka longa yau bantu yankaka, atako bantu yankaka vuandaka tadila bantumua lokola ‘bantu yina metangaka kalasi ve mpe bantu ya mpamba.’—Bis 4:13.

2.   Mbongo. Nge lenda longuka mambu yina kele na Biblia kondua kufuta mbongo. Yesu tubilaka banlonguki na yandi: ‘Beno mebaka ya ofele, beno pesa mpe ya ofele.’—Matayo 10:8.