Biblia monisa ve ti Armagedoni kevuanda mvita mosi yina kesalama kaka na mua kitini mosi ya ntoto, kasi yamemonisa ti yakevuanda mvita kati na baguvernema nionso ya yinza mpe Nzambi.

•   ‘Bampova yayi mekatuka na bademo . . . kena kuenda na bantinu ya ntoto ya mvimba, samu na kusangisa bau samu na mvita ya kilumbu ya nene ya Nzambi Nkua-ngolo nionso. . . . Basangisaka bau na kisika yina bakebokidilaka na Ebreo Armagedoni.’—Kusonga 16:14, 16.

 Mpova “Armagedoni” mekatuka na mpova ya Ebreo Har Meghid·dohnʹ, yazola monisa ‘Mongo ya Megido.’ Megido vuandaka mbanza mosi na terituare ya Yisaele ya ntama. Samu na mfunu yango, bantu yankaka kekanisaka ti Armagedoni kesalama na Yisaele. Nzokande, yavuanda kisika yina mbanza yango vuandaka to mpe nzinganzinga ya Moyen-Orient ya mvimba, yakele na kisika mosi ve yina lenda sangisa ‘bantinu ya ntoto ya mvimba’ mpe basoda na bau.

 Mukanda ya Kusonga sonamaka “na bidimbu,” to bampova ya kifuani. (Kusonga 1:1) Armagedoni kena kumonisa ve kisika mosi yina bantu lenda mona, kasi yakena kumonisa nde mutindu mambu kesalama na yinza ya mvimba yina mesangisa babuala nionso yina kesangana samu na kunuanisa Kimfumu ya Nzambi.—Kusonga 19:11-16, 19-21.