“ပှၤတီ​ပှၤလိၤ​ဒီး ပှၤ​တတီ​တလိၤ လၢ​အ​သံ​သ့ၣ်​တဖၣ်​ က​ဂဲၤဆၢထၢၣ်​ သမူထီၣ်​က့ၤ.”—မၤတၢ် ၂၄:၁၅, ဟီၣ်ခိၣ်သီ တၢ်ကွဲး​ကျိာ်ထံ​လံာ်စီဆှံ.

ဖဲ​ပှၤလၢ​န​အဲၣ်​ဘၣ်​အီၤ​တဂၤ သံ​ဝဲ​အခါ တၢ်မုၢ်လၢ်​တခါ​အံၤ မၤမုာ်​ထီၣ်​န​သး​သ့.—၂ ကရံၣ်သူး ၁:၃, ၄.

တလိၣ်လၢ​န​ပျံၤ တၢ်သံ​လၢၤဘၣ်.—ဧ့ၤဘြံၤ ၂:၁၅.

န​အိၣ်ဒီး တၢ်မုၢ်လၢ်​လၢ န​က​ထံၣ်​ဘၣ်​က့ၤ ပှၤသံ​လၢ နအဲၣ်​ဘၣ်​အီၤ​တဖၣ်.—ယိၤဟၣ်​ ၅:၂၈, ၂၉.

ပနာ်​အီၤ​သ့​ခီဖျိ​လၢ တၢ်ဂ့ၢ်လၢ တၢ်​ဖီလာ်​အဃိ.

• ကစၢ်​ယွၤ​မ့ၢ် တၢ်ဘၣ်တ့​ကစၢ်. လံာ်စီဆှံ​ကိးဝဲ ယဟိဝၤ​ယွၤ​လၢ “တၢ်မူ​အဂံၢ်​ခီၣ်ထံး.” (စံးထီၣ်ပတြၢၤ ၃၆:၉; မၤတၢ် ၁၇:၂၄, ၂၅) ယဟိဝၤ​ယွၤ တ့​လီၤ​တၢ်သးသမူ​ခဲလၢာ်​အဃိ အ​ဝဲ​မၤသမူထီၣ်​က့ၤ ပှၤသံ​သ့ဝဲ သပှၢ်တၢၢ်.

• လၢညါန့ၣ်​ ကစၢ်​ယွၤ​မၤသမူထီၣ်​က့ၤ ပှၤ​ဟီၣ်ခိၣ်ဖိ​တနီၤ. အဒိ လံာ်စီဆှံ​ပာ်​ဖျါထီၣ်​ဝဲ​လၢ ကစၢ်​ယွၤ​မၤသမူထီၣ်​က့ၤ ပှၤ​ဟီၣ်ခိၣ်ဖိ အိၣ်​ဝဲ​ဃိး​ဂၤ. အဝဲသ့ၣ်​ ပၣ်ဃုာ်​ဒီး​ပှၤ​သးစၢ်, ပှၤ​သးပှၢ်, ပိာ်မုၣ်​ ဒီး​ပိာ်ခွါ​တဖၣ်. ပှၤ​သ့ၣ်​တဖၣ်​အံၤ​တနီၤန့ၣ်​ သံ​ဝဲ​ထဲ​တစိၢ်ဖိ ဘၣ်ဆၣ်​ လၢ​အဝဲသ့ၣ်​အ​ကျါ​တဂၤန့ၣ်​ အိၣ်လၢ တၢ်သွၣ်ခိၣ်​အပူၤ ယံာ်​ဝဲ​လွံၢ်သီ ဝံၤဒီး သမူထီၣ်​က့ၤဝဲ.—ယိၤဟၣ်​ ၁၁:၃၉-၄၄.

• ကစၢ်​ယွၤ သးအိၣ်​မၤသမူထီၣ်​က့ၤ ပှၤသံ​တဖၣ်. ယဟိဝၤ​ယွၤ တ​ဘၣ်​သး​လၢ ပှၤ​က​သံ​နီ​တဂၤဘၣ်. အ​ဝဲ​ထံၣ်​ဝဲ​တၢ်သံ​ဒ်သိးဒီး ဒုၣ်ဒါ​တဂၤ. (၁ ကရံၣ်သူး ၁၅:၂၆) ကစၢ်​ယွၤ​အဲၣ်ဒိး​မၤနၢၤ​ဒုၣ်ဒါ​အဝဲအံၤ ဒီး​အ​ဝဲ​က​မၤနၢၤ​အီၤ ခီဖျိ​လၢ အ​က​မၤ​သမူထီၣ်​က့ၤ ပှၤသံ​သ့ၣ်​တဖၣ်. တကးဒံးဘၣ်​ ပှၤသံ​တဖၣ်န့ၣ်​ ကစၢ်​ယွၤ​တိၢ်နီၣ်​ အဝဲသ့ၣ်​အဂ့ၢ်​အကျိၤ​ဘၣ်​ဝဲ​လီၤတံၢ်​လီၤဆဲး ဒီး​အသးအိၣ်​မၤသမူထီၣ်​က့ၤ အဝဲသ့ၣ်​လၢ ဟီၣ်ခိၣ်​ချၢ.—ယိၤဘး ၁၄:၁၄, ၁၅.