မ့ၢ်ကစၢ်ယွၤအိၣ်ဒီး တၢ်ဒိသူၣ်ဒိသးဧါ
ပဟံးန့ၢ်တၢ်မၤလိလၢ တၢ်ဘၣ်တ့အအိၣ်ကသ့ဒ်လဲၣ်
တၢ်ဒိသူၣ်ဒိသးန့ၣ် အခီပညီမ့ၢ်ဝဲ “ပအိၣ်ကွၢ်လၢပှၤဂၤအလီၢ် ဒီးပဂုာ်ကျဲးစၢးတူၢ်တၢ်ဒ် အဝဲသ့ၣ်တူၢ်ဘၣ်ဝဲအသိးန့ၣ်လီၤ.” ကသံၣ်သရၣ် ရံ(ခ်) ဟဲစၢၤ လၢအမၤတၢ်လၢ သးတၢ်ဆါတကပၤန့ၣ် တဲဝဲလၢ ‘တၢ်ဒိသူၣ်ဒိသးန့ၣ် မ့ၢ်တၢ်ဂ့ၤတၢ်ဝါတခါလၢ အအိၣ်ပာ်စၢၤဒီးပှၤ ဖဲပအိၣ်ဖျဲၣ်ထီၣ်အခါန့ၣ်လီၤ.’
ဆိကမိၣ်ကွၢ်. ဖဲပအိၣ်ဖျဲၣ်ထီၣ်အခါ ဘၣ်မနုၤအဃိ တၢ်ဒိသူၣ်ဒိသးန့ၣ် အိၣ်ပာ်စၢၤလၢပသးပူၤလဲၣ်. ဘၣ်မနုၤအဃိ ဆၣ်ဖိကီၢ်ဖိတဖၣ် တအိၣ်ဒီးတၢ်ဒိသူၣ်ဒိသးလဲၣ်. လံာ်စီဆှံတဲဝဲလၢ ကစၢ်ယွၤတ့လီၤပှၤဒ် အက့ၢ်အဂီၤဒၣ်ဝဲအသိးလီၤ. (၁ မိၤၡ့ ၁:၂၆) ကစၢ်ယွၤတ့လီၤပှၤဒ် အက့ၢ်အဂီၤအဃိ ပပာ်ဖျါထီၣ်ကစၢ်ယွၤ အတၢ်ဂ့ၤတၢ်ဝါတဖၣ်သ့ဝဲလီၤ. အဒိ ဖဲတၢ်ဒိသူၣ်ဒိသး ထိၣ်ဟူးထိၣ်ဂဲၤထီၣ်ပှၤလၢ ပအဲၣ်ဒိးမၤစၢၤပှၤဂၤအခါ မ့ၢ်ဒၣ်ပပာ်ဖျါထီၣ်က့ၤ တၢ်သးကညီၤကစၢ် ယဟိဝၤယွၤ အတၢ်ဒိသူၣ်ဒိသးန့ၣ်လီၤ.—ကတိၤဒိ ၁၄:၃၁.
ဘၣ်ဃးဒီး ကစၢ်ယွၤအတၢ်ဒိသူၣ်ဒိသးန့ၣ် လံာ်စီဆှံသိၣ်လိပှၤဒ်လဲၣ်
ကစၢ်ယွၤန့ၣ်အိၣ်ဒီး တၢ်ဒိသူၣ်ဒိသးအဃိ ဖဲပဘၣ်ကီဘၣ်ခဲအခါ အဝဲအသးတမုာ်နီတစဲးဘၣ်. အဒိ ဖဲပှၤအံၣ်စရ့လးဖိလၢပျၢၤတဖၣ် ဘၣ်ကဲကုၢ်လၢ ကီၢ်အဲၤကူပတူးအပူၤ ဒီးအိၣ်ဘၣ်ကီကီခဲခဲ လၢပှၢ်လၢ်ကျါအနံၣ် ၄၀ အတီၢ်ပူၤန့ၣ် လံာ်စီဆှံပာ်ဖျါထီၣ်ဝဲလၢ “ဖဲအဝဲသ့ၣ်တူၢ်ဘၣ် တၢ်နးတၢ်ဖှီၣ်ခဲလၢာ်အတီၢ်ပူၤန့ၣ် ကစၢ်အသးတမုာ်ဘၣ်.” (ယၡါယၤ ၆၃:၉, nwt) ဖဲအံၤပထံၣ်ဘၣ်လၢ တမ့ၢ်ထဲအဝဲသ့ၣ်ညါဝဲ ပှၤအံၣ်စရ့လးဖိတဖၣ် တူၢ်ဘၣ်တၢ်သူၣ်အုးသးအုးဘၣ်. အဝဲအသးတမုာ်စ့ၢ်ကီးဘၣ်. ဒီးကစၢ်ယွၤတဲဝဲလၢ “ယသ့ၣ်ညါအဝဲသ့ၣ် အတၢ်တူၢ်ဘၣ်ခီၣ်ဘၣ် ခဲလၢာ်န့ၣ်လီၤ.” (၂ မိၤၡ့ ၃:၇, ခ့ခါစှီၤကျိာ်) အဝဲတဲစ့ၢ်ကီးဝဲလၢ “ပှၤလၢအထိးဘၣ်သုန့ၣ်” မ့ၢ်အ “ ထိးဘၣ်အမဲာ်ပှၤဖိလီၤ.” (စကၤရယၤ ၂:၈) ဖဲပှၤအဂၤတဖၣ် မၤဘၣ်ဒိဆါပှၤအခါ ကစၢ်ယွၤစ့ၢ်ကီး အသးဘၣ်ဒိဃုာ်ဒီးပှၤလီၤ.
ပမ့ၢ်တူၢ်ဘၣ်လၢ ပတၢ်ကမၣ်အိၣ် ဒီးပတကြၢးဒီးကစၢ်ယွၤ အတၢ်သးကညီၤသနာ်က့ လံာ်စီဆှံတဲဘၣ်ပှၤလၢ “ယွၤဒိၣ်န့ၢ်ပသး, ဒီးသ့ၣ်ညါတၢ်ခဲလၢာ်လီၤ.” (၁ ယိၤဟၣ် ၃:၁၉, ၂၀) ကစၢ်ယွၤသ့ၣ်ညါပှၤဂ့ၤန့ၢ် ပသ့ၣ်ညါလီၤပသးလီၤ. ဒီးအဝဲနၢ်ပၢၢ်ပတၢ်အိၣ်သး, ပတၢ်ဆိကမိၣ်, ပတၢ်တူၢ်ဘၣ်တဖၣ် ခဲလၢာ်ခဲဆ့ ဒီးဒိသူၣ်ဒိသးပှၤလီၤ.
ပသ့ၣ်ညါဘၣ်လၢ ကစၢ်ယွၤမၤစၢၤပှၤလၢ အဘၣ်ကီဘၣ်ခဲတဖၣ်အဃိ, ပသန့ၤပသးလၢယွၤအအိၣ် ဒ်သိးပကဒိးန့ၢ်ဘၣ် တၢ်မၤမုာ်ထီၣ်က့ၤပသး, တၢ်ကူၣ်သ့ ဒီးတၢ်မၤစၢၤအဂီၢ်သ့ဝဲလီၤ
လံာ်စီဆှံအဆၢလၢ အဟ့ၣ်ဂံၢ်ဟ့ၣ်ဘါပှၤ
-
“တုၤနုၤတစုနကကိးထီၣ်, ဒီးယွၤကစံးဆၢတၢ်, နကဃ့တၢ်, ဒီးကစံးဝဲ, ကွၢ်ကွၢ်, ယၤလီၤ.”—ယၡါယၤ ၅၈:၉.
-
“အဂ့ၢ်ဒ်အံၤ, ယသ့ၣ်ညါတၢ်ကူၣ်လၢ ယကူၣ်ထီၣ်လၢသုဂီၢ်, ယွၤစံးဝဲဒၣ်, တၢ်ကူၣ်ဘၣ်ဃးဒီးတၢ်ဃူတၢ်ဖိး, ဘၣ်ဃးဒီးတၢ်အၢတမ့ၢ်ဘၣ်, ဒ်သိးယကဟ့ၣ်သုကတၢၢ်အိၣ်ဒီး တၢ်မုၢ်လၢ်လီၤ. ဒီးသုကကိးထီၣ်ယၤ, ဒီးသုကလဲၤဘါထုကဖၣ်တၢ်လၢယၤ, ဒီးယကကနၣ်သုကလုၢ်လီၤ.”—ယံးရမံယၤ ၂၉:၁၁, ၁၂.
-
“ပာ်ယမဲာ်ထံလၢ နထၢၣ်တၢ်ဖံးအပူၤန့ၣ်တက့ၢ်. အိၣ်ဝဲလၢနလံာ်ပူၤ, တမ့ၢ်ဘၣ်ဧါ.”—စံးထီၣ်ပတြၢၤ ၅၆:၈.
ကစၢ်ယွၤပာ်သူၣ်ပာ်သးပှၤ, နၢ်ပၢၢ်ပှၤ ဒီးဒိသူၣ်ဒိသးပှၤ
ကစၢ်ယွၤမ့ၢ်ဒိသူၣ်ဒိသးပှၤန့ၣ် ကဲထီၣ်တၢ်မၤစၢၤလၢ ပကလဲၤခီဖျိ တၢ်ကီတၢ်ခဲအဂီၢ်ဧါ. ပကဆိကမိၣ်ကွၢ် မရံယၤ အတၢ်လဲၤခီဖျိလီၤ.
အတဲဝဲလၢ “ယဖိခွါသံဖဲအသးအိၣ် ၁၈ နံၣ်, ဒီးတချုးလၢအသံန့ၣ် အတူၢ်ဘၣ်ဝဲ ခဲစၢၣ်တၢ်ဆါ ခံနံၣ်ညါအဃိ ယသးတမုာ်နီတစဲးဘၣ် ဒီးယတူၢ်ဘၣ်လၢ တၢ်တခါအံၤဒုတမ့ၢ်တၢ်လၢ အတီအလိၤနီတစဲးဘၣ်. ခီဖျိလၢ ယဟိဝၤယွၤ တမၤဘျါယဖိခွါတၢ်ဆါအဃိ ယသးဒိၣ်ထီၣ်အီၤလီၤ.
“ပူၤကွံာ်ဃုနံၣ်ဝံၤအလီၢ်ခံ, ဖဲယတဲဖျါထီၣ်လၢ ယတူၢ်ဘၣ်လၢ ယဟိဝၤယွၤ တအဲၣ်ယၤဘၣ်အခါ ယသကိးမုၣ်လၢတၢ်အိၣ်ဖှိၣ်ပူၤ လၢအအိၣ်ဒီးတၢ်အဲၣ် ဒီးတၢ်သးကညီၤတဂၤ ဒိကနၣ်ဝဲလီၤတံၢ်လီၤဆဲး, ကအိၣ်ခံနၣ်ရံၣ်သၢနၣ်ရံၣ် ဃၣ်ဃၣ်ညါ ဒီးဖဲတၢ်ဘၢၣ်စၢၤန့ၣ် အဝဲတတဲယၤတၢ်နီတမံၤဘၣ်. ဖဲယတဲတၢ်ဝံၤအခါ ဒီပုၢ်ဝဲၢ်မုၣ်တဂၤအံၤ တဲဘၣ်ယၤလံာ်စီဆှံတဆၢဖဲ ၁ ယိၤဟၣ် ၃:၁၉, ၂၀ ဒီးအထုးန့ၢ်ယသးဒိၣ်မးလီၤ. လံာ်စီဆှံတဆၢအံၤ တဲဝဲလၢ ‘ယွၤဒိၣ်န့ၢ်ပသး, ဒီးသ့ၣ်ညါတၢ်ခဲလၢာ်လီၤ.’ ဒီးအဝဲတဲနၢ်ပၢၢ်ယၤလၢ ယဟိဝၤယွၤနၢ်ပၢၢ်ဝဲ တၢ်ကိၢ်တၢ်ဂီၤလၢ ပတူၢ်ဘၣ်အီၤတဖၣ်န့ၣ်လီၤ.
“ဘၣ်ဆၣ် ယကထုးထီၣ်ကွံာ် တၢ်သူၣ်ဒိၣ်သးဖျိးလၢယသးပူၤန့ၣ် ကီဒိၣ်မးလီၤ. ယဖး စံးထီၣ်ပတြၢၤ ၉၄:၁၉ လၢအတဲဝဲလၢ ‘လၢယဆိကမိၣ် တၢ်အါမံၤအကျါန့ၣ် နမၤမုာ်ထီၣ်က့ၤတၢ်တဖၣ် ဒုးသူၣ်ဖှံသးညီယသးလီၤ.’ ယတူၢ်ဘၣ်လၢ လံာ်စီဆှံတဆၢအံၤ ဘၣ်တၢ်ကွဲးအီၤလၢယဂီၢ်လီၤ. လၢခံန့ၣ် ယတဲဘၣ်ယဟိဝၤယွၤလၢ ယတၢ်ကိၢ်တၢ်ဂီၤတဖၣ် ဒီးယသ့ၣ်ညါလၢ အဝဲဒိကနၣ်ယၤ ဒီးနၢ်ပၢၢ် ယတၢ်တူၢ်ဘၣ်တဖၣ်အဃိ အမၤမုာ်ထီၣ်ယသးဒိၣ်မးလီၤ.”
ဖဲပသ့ၣ်ညါထီၣ်လၢ ကစၢ်ယွၤနၢ်ပၢၢ် ပတၢ်တူၢ်ဘၣ်တဖၣ် ဒီးဒိသူၣ်ဒိသးပှၤန့ၣ် ကဲထီၣ်တၢ်သူၣ်မံသးမုာ်လၢပဂီၢ်လီၤ. ဘၣ်ဆၣ် ဘၣ်မနုၤအဃိ တၢ်ကီတၢ်ခဲ ဘၣ်အိၣ်အါဒံးထဲအံၤညါလဲၣ်. ပထံၣ်ဘၣ် တၢ်ကီတၢ်ခဲသ့ၣ်တ ဖၣ်အံၤ ခီဖျိလၢကစၢ်ယွၤ အဲၣ်ဒိးစံၣ်ညီၣ်ပှၤလၢ ပတၢ်ကမၣ်အဃိဧါ. မ့ၢ်ကစၢ်ယွၤ ကမၤလီၤမၢ်ကွံာ် တၢ်ကီတၢ်ခဲသ့ၣ်တဖၣ်အံၤဧါ. ပကမၤလိအါထီၣ် တၢ်ဂ့ၢ်တဖၣ်အံၤလၢ တၢ်မၤလိလၢခံတခါအပူၤလီၤ.