ဒ်ပမ့ၢ်ယဟိဝၤပှၤအုၣ်အသးတဖၣ်အသိး ပသးအိၣ် တဲသကိးတၢ်ဒီး ပှၤအိၣ်လၢ တၢ်ဘူၣ်တၢ်ဘါ ခဲလၢာ်အပူၤလီၤ. ဘၣ်ဆၣ် ပတလဲၤဘါသကိးတၢ်ဒီး တၢ်ဘူၣ်တၢ်ဘါ အဂၤတဖၣ်ဘၣ်. လံာ်စီဆှံ ပာ်ဖျါထီၣ်ဝဲလၢ ခရံာ်ဖိအမ့ၢ်အတီတဖၣ် “မၤစၢၤတၢ်ဒ် အဂီၤတမံၤဒီး တမံၤအသိး” ခီဖျိလၢ အဝဲသ့ၣ် အိၣ်ဒီးတၢ်နာ် တမံၤဃီ အဃိလီၤ. (အ့းဖ့းစူး ၄:၁၆; ၁ ကရံၣ်သူး ၁:၁၀; ဖံလံးပံၤ ၂:၂) တကးဒံးဘၣ် ပအိၣ်ဒီး တၢ်ပာ်သူၣ်ပာ်သးလၢ အပာ်ဖျါထီၣ် တၢ်အဲၣ်တၢ်ကွံ, တၢ်သးကညီၤ ဒီးတၢ်ပျၢ်တၢ်ကမၣ် စ့ၢ်ကီးလီၤ. ပတၢ်စူၢ်တၢ်နာ်န့ၣ် ဒိးသန့ၤထီၣ်အသးလၢ တၢ်သ့ၣ်ညါ လီၤတံၢ်လီၤဆဲး လၢအဟဲလၢ လံာ်စီဆှံအပူၤလီၤ. မ့တမ့ၢ် ဒ်အံၤဘၣ်န့ၣ် ပတၢ်စူၢ်တၢ်နာ် ကကဲထီၣ် တၢ်ကလီကလီလီၤ.—ရိမ့ၤ ၁၀:၂, ၃.

 လံာ်စီဆှံ ပာ်ဖျါထီၣ်ဝဲလၢ ပမ့ၢ်လဲၤဘါသကိးတၢ်ဒီး တၢ်ဘူၣ်တၢ်ဘါအဂၤတဖၣ်န့ၣ် လီၤဂာ်ဒ်ပယိး နီၣ်ယိးဘိ ဖုၣ်ထံၣ်ဖုၣ်ထီအဃိ ပတၢ်စူၢ်တၢ်နာ် ကဘၣ်ဒိဝဲလီၤ. (၂ ကရံၣ်သူး ၆:၁၄-၁၇) လၢတၢ်န့ၣ်အဃိ ယ့ၣ်ၡူးတဟ့ၣ်အခွဲးလၢ အပျဲၢ်အဘီၣ်တဖၣ် ကမၤဝဲဒ်န့ၣ်ဘၣ်. (မးသဲ ၁၂:၃၀; ယိၤဟၣ် ၁၄:၆) ဒ်န့ၣ်အသိး, လၢပျၢၤ ဖဲပှၤအံၣ်စရ့လးဖိတဖၣ်အစိၤန့ၣ် ကစၢ်ယွၤ မၤလိာ်အဝဲသ့ၣ် ဒ်သိးအသုတလဲၤ ဘူၣ်ထီၣ်ဘါထီၣ်တၢ် ဃုာ်ဒီး ပှၤလၢအခိၣ်အဃၢၤ တဂ့ၤအဂီၢ်န့ၣ်လီၤ. (၂ မိၤၡ့ ၃၄:၁၁-၁၄) ဖဲပှၤလၢ အတၢ်စူၢ်တၢ်နာ် ကမၣ်တဖၣ် တဲဝဲလၢ အကမၤသကိးဃုာ်တၢ်ဒီး ပှၤအံၣ်စရ့လးဖိတဖၣ်အခါ ပှၤလၢအသးတီတဖၣ်အံၤ ဂ့ၢ်လိာ်ကွံာ် အဝဲသ့ၣ် အတၢ်ကွဲမုာ်န့ၣ်လီၤ. မ့ၢ်လၢပှၤအံၣ်စရ့လးဖိတဖၣ် တအဲၣ်ဒိး မၤဘၣ်ဃးအသးဒီး အဝဲသ့ၣ် အတၢ်ဘူၣ်တၢ်ဘါအဃိန့ၣ်လီၤ.—ဧ့စြၤ ၄:၁-၃.

 တဲဝဲလီၤ. ဖဲ ၂၀၂၃ နံၣ်အတီၢ်ပူၤ အဝဲသ့ၣ် စံၣ်တဲၤတဲလီၤတၢ်ဆူ ပှၤလၢ အတၢ်ဘူၣ်တၢ်ဘါ တဒ်သိးဒီးအီၤတဖၣ်အအိၣ် အနၣ်ရံၣ် ၁,၇၉၁,၄၉၀,၇၁၃ ညါလီၤ. ဒ်တၢ်မၢဖိ ပီလူးအသိး ဖဲပလဲၤစံၣ်တဲၤတဲလီၤတၢ်အခါ ပအဲၣ်ဒိး သ့ၣ်ညါ “ပှၤအါတက့ၢ်” အတၢ်ထံၣ်ဒီး အတၢ်နာ်လီၤ. (၁ ကရံၣ်သူး ၉:၁၉-၂၂) ဒ်လံာ်စီဆှံ မၤလိာ်ပှၤအသိး ဖဲပတဲသကိးတၢ်ဒီး အဝဲသ့ၣ်အခါ ပဂုာ်ကျဲးစၢး တဲသကိးတၢ်လၢ “တၢ်ယူးယီၣ်ပာ်ကဲ” အပူၤလီၤ.—၁ ပ့းတရူး ၃:၁၅, ခ့ခါစှီၤကျိာ်.