We di United Nations Secretary-General Antonio Gutɛrɛz bin tɔk bɔt di atak we Iran bin atak Izrɛl we apin Satide, Epril 13, 2024, i se: “Naw na di tɛm fɔ stɔp fɛt-fɛt fɔ lɛ tin nɔ wɔs. Na di tɛm dis fɔ du ɔl wetin wi ebul fɔ du fɔ kɔntrol wisɛf.”

 Di fɛt-fɛt we de apin na di Midul Ist na jɔs wan pan di fɛt-fɛt dɛn we de apin ɔlsay na di wɔl.

 “Frɔm we Wɔl Wɔ II bin apin, di fɛt-fɛt we de na difrɛn kɔntri dɛn tide pas da tɛm de fa fawe, ɛn i dɔn ambɔg lɛk 2 bilyɔn pipul dɛn na di wɔl. Dat min se we yu kɔnt 4 pipul dɛn, na wan pan dɛn fɛt-fɛt de ambɔg.”—United Nations Security Council, Janwari 26, 2023.

 Di kɔntri dɛn we de pan fɛt-fɛt naw na Izrɛl, Gaza, Siria, Azabayjan, Yukren, Sudan, Itiopia, Nijɛ, Miyanma, ɛn Eti. a

 Ustɛm fɛt-fɛt go dɔn? Fɔ se di lida dɛn na di wɔl go ebul mek pis de? Wetin di Baybul se?

 Di fɛt-fɛt we de apin ɔlsay na di wɔl tide de sho se i nɔ go te igen, wɔ gɛt fɔ dɔn. Dɛn wɔ ya de mek Baybul prɔfɛsi bɔt di tɛm we wi de naw kam tru. Di Baybul de kɔl da tɛm de, “di tɛm [we] want fɔ dɔn.”—Matyu 24:​3.

•   “Una go yɛri we dɛn de fɛt wɔ ɛn yɛri nyuz bɔt wɔ. . . . Wan neshɔn go fɛt ɔda neshɔn ɛn wan kiŋdɔm go fɛt ɔda kiŋdɔm.”—Matyu 24:​6, 7.

 Fɔ no aw dɛn wɔ ya de sho se Baybul prɔfɛsi de kam tru, rid di atikul we gɛt di taytul “What Is the Sign of ‘the Last Days,’ or ‘End Times’?”

 Di Baybul bin dɔn tɔk bɔt di tɛm we ɔl fɛt-fɛt go dɔn. Aw dat gɛt fɔ apin? Nɔto mɔtalman go mek dat apin, bɔt na Amagɛdɔn, we na “di wɔ we go apin insay Gɔd di Ɔlmayti in big de.” (Rɛvɛleshɔn 16:​14, 16) We dis wɔ dɔn, Gɔd go mek in prɔmis to mɔtalman kam tru fɔ mek pis de sote go.—Sam 37:​10, 11, 29.

 Fɔ lan mɔ bɔt Gɔd in wɔ we gɛt fɔ dɔn ɔl ɔda wɔ dɛn, rid di atikul we gɛt di taytul “What Is the Battle of Armageddon?”