Rɛvɛleshɔn 16:1-21
16 A yɛri wan lawd vɔys we kɔmɔt na di oli ples tɛl di sɛvin enjɛl dɛn se: “Una go, dɔn una tɔn di sɛvin bol dɛn we gɛt Gɔd in wamat na di wɔl.”
2 Di fɔs wan go tɔn in bol na di wɔl. Ɛn sofut we de at bad bad wan kɔmɔt pan di pipul dɛn we gɛt di wayl animal in mak ɛn we de wɔship in imej.
3 Di sɛkɔn wan tɔn in bol na di si. Ɛn di si tɔn to blɔd we tan lɛk dayman in yon, ɛn ɔl di tin dɛn na di si we gɛt layf* day.
4 Di tɔd wan tɔn in bol na di riva dɛn ɛn di spriŋ wata* dɛn. Ɛn dɛn tɔn to blɔd.
5 A yɛri di enjɛl we de oba di wata dɛn tɔk se: “Gɔd, di wan we de naw ɛn we bin de, di wan we nɔ de kɔmɔt biɛn pɔsin, yu de du wetin rayt, na dat mek yu dɔn pas dɛn jɔjmɛnt ya,
6 bikɔs dɛn kil di oli wan dɛn ɛn di prɔfɛt dɛn, ɛn yu dɔn gi dɛn blɔd fɔ drink; dɛn fit fɔ gɛt am.”
7 Ɛn a yɛri di ɔlta se: “Fɔ tru, Jiova* Gɔd, di Ɔlmayti, yu de jɔj di rayt we ɛn fia wan.”
8 Di nɔmba 4 enjɛl tɔn in bol na di san, ɛn dɛn gi di san pawa fɔ bɔn di pipul dɛn wit faya.
9 Ɛn di wam wam it bɔn di pipul dɛn, bɔt dɛn tɔk bad bɔt Gɔd in nem, di wan we gɛt pawa oba dɛn bad tin ya, ɛn dɛn nɔ ripɛnt ɛn gi am glori.
10 Di nɔmba fayv enjɛl tɔn in bol na di wayl animal in tron. Ɛn in kiŋdɔm dak, ɛn dɛn bigin fɔ bɛt bɛt dɛn tɔŋ bikɔs ɔf dɛn pen,
11 bɔt dɛn tɔk bad bɔt Gɔd we de na ɛvin bikɔs ɔf dɛn pen ɛn dɛn sofut dɛn, ɛn dɛn nɔ ripɛnt fɔ di tin dɛn we dɛn de du.
12 Di nɔmba siks enjɛl tɔn in bol na di gret riva Yufretis, ɛn in wata dray fɔ rɛdi di rod fɔ di kiŋ dɛn we de kɔmɔt usay di san de grap.*
13 A si tri mɛsej dɛn we nɔ klin* ɛn we tan lɛk frɔg, kɔmɔt insay di dragɔn in mɔt, insay di wayl animal in mɔt, ɛn insay di lay lay prɔfɛt in mɔt.
14 Infakt, na mɛsej dɛn we kɔmɔt frɔm dimɔn dɛn ɛn dɛn pafɔm sayn dɛn, ɛn dɛn go to di kiŋ dɛn na di wan ol wɔl fɔ gɛda dɛn fɔ di wɔ we go apin insay Gɔd di Ɔlmayti in big de.
15 “Luk! A de kam lɛk tifman. Di wan we nɔ slip ɛn we stil wɛr in klos gɛt gladi-at, so dat i nɔ go waka nekɛd ɛn shem we pipul dɛn si am.”
16 Ɛn dɛn gɛda dɛn na di ples we dɛn de kɔl insay Ibru Amagɛdɔn.*
17 Di nɔmba sɛvin enjɛl tɔn in bol na di briz. Na de wan lawd vɔys kɔmɔt insay di oli ples frɔm di tron, we se: “I dɔn dɔn!”
18 Ɛn laytin flash, tɛnda krak, ɛn a yɛri vɔys dɛn, ɛn wan big atkwek apin we nɔ wande apin frɔm we mɔtalman kam na di wɔl, di atkwek bin rili pawaful ɛn i bin rich fa say.
19 Di gret siti plit to tri pat, ɛn di siti dɛn na di neshɔn dɛn fɔdɔm; ɛn Gɔd mɛmba Babilɔn di Gret, fɔ gi am di kɔp we gɛt di wayn we na Gɔd in bad bad vɛksteshɔn.
20 Ɛn ɔl di ayland dɛn lɔs, ɛn dɛn nɔ si di mawntin dɛn.
21 Dɔn big big ays blɔk dɛn we gɛt wet lɛk 20 kilogram* kɔmɔt na ɛvin ɛn fɔdɔm lɛk ren pan di pipul dɛn, ɛn di pipul dɛn tɔk bad bɔt Gɔd bikɔs ɔf di ays blɔk dɛn, bikɔs di ays blɔk dɛn pwɛl bɔku tin dɛn.
Futnot
^ Ɔ “sol.”
^ Ɔ “wata dɛn we bɔs na grɔn.”
^ Rid Baybul Wɔd dɛn Minin.
^ Ɔ “na di ist.”
^ Insay Grik, “spirit dɛn we nɔ klin.”
^ Insay Ibru i min “Mɛgidɔ Mawntin.”
^ Insay Grik, “wan talɛnt.”
