DI TƆPIK NA DI FRƆNT PEJ—DI STORI BƆT AW DƐN NƆ EBUL FƆ PWƐL DI BAYBUL
Dɛn Nɔ Ebul fɔ Pwɛl di Baybul
DI PRƆBLƐM: Bɔku pɔlitishian dɛn ɛn bigman dɛn na rilijɔn dɔn plan fɔ du sɔntin we di Baybul nɔ gri wit. Bɔku tɛm, dɛn kin yuz dɛn pawa fɔ mek pipul dɛn nɔ gɛt di Baybul, fɔ lɛ dɛn nɔ mek am, ɔ translet am. Lɛ wi tɔk bɔt tu ɛgzampul dɛn:
Arawnd di ia 167 bifo Krays: Wan kiŋ we nem Antiokɔs Ɛpifenes, we tray fɔ fos di Grik rilijɔn pan di Ju dɛn, pas lɔ se dɛn fɔ dɔnawe wit ɔl di Ibru Skripchɔ dɛn we dɛn bin dɔn kɔpi. Wan man we nem Aynrich Grɛts we de rayt istri, bin rayt se Kiŋ Antiokɔs Ɛpifenes in wokman dɛn bin de “chɛr ɛn bɔn ɛni buk we dɛn rayt di Lɔ pan ɛnisay we dɛn fɛn am ɛn dɛn bin de kil di wan dɛn we de rid am fɔ lɛ i kɔrej dɛn ɛn ɛp dɛn fɔ tinap tranga wan.”
Et ɔndrɛd ia bifo di tɛm we wi de so: Bikɔs di kɔmɔn pipul dɛn bin de prich wetin di Baybul se, ɛn dɛn nɔ bin de prich wetin di Katolik dɛn biliv, sɔm bigman dɛn na di Katolik rilijɔn bin vɛks ɛn tek am se ɛni ɔdinari pɔsin we gɛt di Baybul, apat frɔm di Sam buk we bin de insay Latin na pɔsin we de agens wetin di Katolik chɔch de tich. Sɔm bigman dɛn na wan chɔch bin sɔpɔt dis bay we dɛn tɛl dɛn wokman dɛn fɔ “tek tɛm wach ɔltɛm wit ɔl dɛn at fɔ ɛnibɔdi we de prich sɔntin we di Katolik dɛn nɔ biliv . . . Dɛn fɔ luk na ɔl di os ɛn ɔndasela dɛn we dɛn fil se pɔsin de de we gɛt Baybul. . . . Dɛn fɔ pwɛl ɛni os we dɛn kech pɔsin we gɛt Baybul.”
If di pipul dɛn we bin et di Baybul bin ebul fɔ pwɛl am, wi nɔ bin fɔ gɛt di mɛsej we de na di Baybul.
Di Baybul we Wiliam Tindel translet insay Inglish stil de, pan ɔl we dɛn bin pas lɔ se dɛn nɔ fɔ translet di Baybul, dɛn bin de bɔn Baybul dɛn, ɛn dɛn ivin kil Wiliam Tindel insay di ia 1536
WETIN MEK DI BAYBUL DE TE NAW? Di men say we Kiŋ Antiokɔs bin put in atɛnshɔn, na Izrɛl, bɔt di Ju dɛn bin de na bɔku ɔda kɔntri dɛn. Infakt, sɔm masta sabi bukman dɛn dɔn tɔk se insay di apɔsul dɛn tɛm, we yu kɔnt 100 Ju dɛn, 60 pan dɛn nɔ bin de insay Izrɛl. Di Ju dɛn bin kip sɔm Skripchɔ dɛn we dɛn bin dɔn kɔpi, insay dɛn Ju mitin os dɛn. Na dɛn sem Skripchɔ dɛn ya ɔda jɛnareshɔn dɛn ɛn ivin di Kristian dɛn bin de yuz.—Di Apɔsul Dɛn Wok [Akt] 15:21.
Et ɔndrɛd ia bifo wi yon tɛm, pipul dɛn we bin lɛk di Baybul bin kɔntinyu fɔ de translet ɛn kɔpi di Skripchɔ dɛn pan ɔl we dɛn bin de mek dɛn sɔfa. Bifo dɛn ivin mek printin mashin we de muv, bitwin di ia 1401 to 1500, i go mɔs bi se di Baybul bin de insay 33 langwej dɛn. Afta dat, dɛn bin de translet ɛn print di Baybul pas ɛni ɔda buk.
DI BƐNIFIT: Pan ɔl we pawaful kiŋ dɛn ɛn bigman dɛn na rilijɔn bin tray fɔ dɔnawe wit di Baybul, di Baybul na buk we dɛn dɔn translet ɛn sheb pas ɛni ɔda buk na di wɔl. Di Baybul dɔn ɛp sɔm kɔntri dɛn we dɛn de mek lɔ dɛnɛn langwej dɛn ɛn i dɔn chenj bɔku bɔku pipul dɛn layf.
