Koma rêberiyê ew komeke biçûk e ji Mesîhiyên ruhanîda cêribandî, yên ku nav temamiya dinyayê rêberiyê şixulên Şedên Yehowa dikin. Ew kom bona du tişta cabdar e:

•   Ew cabdar e bona hazirkirina bernama, kîjan ku ser hîmê Kitêba Pîroz in, yên ku bi saya edebyeta, civata û mektebên Şedên Yehowa pêk tê (Lûqa 12:42).

•   Ew organîze dike şixulên Şedên Yehowa nav temamiya dinyayê, dêmek rêberiya şixulê belakirina mizgîniyê dike û dîna xwe dide vê yekê, ku perê qurbankirî rast bêne xebitandinê.

 Koma Rêberiyê çev dide şandî û rûspiyên Orşelîmê yên qirna yekê, kîjana ku safîkirinên ferz dikirin bona halxweşiya temamiya civata Mesîhiya (Karên Şandiya 15:2). Endemên Koma Rêberiyê jî mîna wan mêrên amin serokên teşkîleta me nînin. Ewana rêberiyê ji Kitêba Pîroz digerin û qebûl dikin, wekî Yehowa Îsa Mesîh kifş kiriye ça serê civatê (1 Korintî 11:3; Efesî 5:23).

 Endemên Koma Rêberiyê ew in: Kênêt Kûk, Gêyc Flîgil, Sêmûêl Hurd, Cêfrî Cêkson, Stîvên Lêt, Gêrît Luş, Mark Sandêrson, Dêvîd Splêyn û Cêfrî Wîndêr. Ewana ofîsa meye serekeda Worwîkêda, dêmek Niyû Yorkêda xizmet dikin.

 Koma Rêberiyê şeş komîtê saz kirine, kîjan ku bona cûre-cûre şixulên teşkîleta me cabdar in. Her endemekî Koma Rêberiyê, yek yan çend komîtêyada xizmet dikin.

•   Komîtêya Koordînatora bona şixulên qanûnzaniyê cabdar e, usa jî derbêra alîkariyê dide Şedên Yehowa, yên ku rastî teşqelên tebiyetê, peyketina û derecên din tên.

•   Komîtêya Kifşkirina Endema xem dike bona wan şixula, yên ku endemên Beytelêva tevgirêdayî ne.

•   Komîtêya Neşirkirinê cabdar e bona hazirkirina xwarina ruhanî û şandina edebyeta. Usa jî cabdar e bona avakirina ciyê hebandinê, ofîsên bona welgera, û fîlîala.

•   Komîtêya Xizmetiyê cabdar e bona belakirina “Mizgîniya Padşatiyê” (Metta 24:14).

•   Komîtêya Hînkirinê cabdar e bona hazirkirina bernama ruhanî, kîjan ku em bi saya civata, cûre-cûre mekteba û usa jî bi saya aûdîo-vîdêo nivîsandina distînin.

•   Komîtêya Nivîskariyê cabdar e bona hazirkirina xwarina ruhanî ça bi cûrê neşirkirî usa jî ser malperê. Ew usa jî rêberiya şixulê welgera dike.

 Xêncî wan tişta, endemên Koma rêberiyê her heftî dicivin, seva ku derheqa hewcê teşkîletê şêwir kin. Ser wan civîna ewana ser hîmê Nivîsarên Pîroz şêwir dikin û dihêlin wekî ruhê pîroz rêberiya wan bike, seva bikaribin yektiyêda safîkirinên rast bikin (Karên Şandiya 15:25).

 Ew alîkarçî Mesîhiyên bi îtbar in, kîjan ku alîkariyê didin Komîtêyên Koma Rêberiyê (1 Korintî 4:2). Ewana cêribandî ne, lema jî ev şixulê ku tesmîlî wan dikin, bi hostetî tînin sêrî. Ewana usa jî her heftî têne ser wan civîna, kîjan ku ew komîtê derbaz dikin. Rast e ew alîkarçî dewsa komîtê safîkirina nakin, lê şîret û înformasiya kêrhatî didine wan bira. Ewana usa jî nihêrandina xwe dibêjin, bi saya çi jî axiriyêda komîtê safîkirinên baş dike. Xêncî vê yekê, ewana dîna xwe didinê, ku ew safîkirin çi axirî tînin. Koma Rêberiyê dikare wana kifş ke, seva ku ewana nav temamiya dinyayêda serlêdana xûşk-bira bikin û ser civînên hersalî û wedê xilazkirina mekteba Gîledê pê têma derkevin.