Николас у Селин рʹасти проблемәкә дьн жи һатьн. Бәйтʹәла Франсайе әԝ шандьнә щьватәкә дьн. Әԝана дьбежьн: «Паши кӧ емосийед мәйә пешьн дәрбаз бун, мә бира һәвалед хԝәйә бәре дькьр. Щьвата a мәйә тʹәзәда, әм һе һаԛас незики хушк у бьра нәбьбун». Һәрге проблемед ӧса пешда бен, гәло тӧ ча дькари һини щьвата хԝәйә тʹәзә би? Кәсед дьн ча дькарьн али тә бькьн? Щьвата тәйә тʹәзәда, тӧ чаԝа дькари һелане бьстини у хԝәха жи мәрьва һелан ки?

ЧАР ПРИНСИПЕД КЕРҺАТИ

1. Итʹбарийа хԝә Йаһоԝа бинә (Зәбур 37:5). Хушкәкә бь наве Казуми, йа кӧ Жапонийайеда дьжи, паши 20 сала жь бо хәбата мере хԝә дәрбази щьватәкә дьн бу. Гәло әԝе ча итʹбарийа хԝә Йаһоԝа дьани? Әԝ дьбежә: «Мьн дьле хԝә Йаһоԝарʹа вәдькьр у жерʹа бәʹса тьрс, хәм у тʹәнебуна хԝә дькьр. Һәр щар чахе мьн дӧа дькьр, Әԝи ԛәԝат дьда мьн».

Гәло тӧ ча дькари дьһа зедә итʹбарийа хԝә Йаһоԝа бини? Чаԝа кӧ кӧлиркәкерʹа ав у хԝәлийа баш лазьм ә, ԝәки шин бә, тәрʹа жи хԝарьна рʹӧһʹани лазьм ә, ԝәки баԝәрийа тә ԛәԝи бә. Мәсәлә, бьре мә Николас дәрһәԛа Бьраһим, Иса у Паԝлос кʹур дьфькьри, йед кӧ гәләк тьшт дькьрьн, ԝәки ԛьрара Хԝәде биньн сери. Әве йәке баԝәрийа ԝи дьһа ԛәԝи дькьр, кӧ Йаһоԝа ԝе али ԝи бькә. Лекʹолина Кʹьтеба Пироз ԝе һьм али тә бькә кӧ тӧ һини гӧһастьна бьби, һьм жи мәщале бьдә тә, ԝәки тӧ хушк-бьред щьвата хԝәйә тʹәзәда бьшьдини.

2. Щьвата хԝәйә тʹәзә бәрамбәри щьвата хԝәйә бәре нәкә (Ԝаиз 7:10). Гава бьре мә Жуел, жь Бенине дәрбази Америкайе бу, жерʹа һеса нибу һини култура  ԝедәре бьбә. Әԝ дьбежә: «Мьн хԝә борщдар һʹәсаб дькьр кӧ һәр кәсирʹа, тʹәви кʹе әз дьбумә нас, бәʹса жийина хԝә бькьм». Әԝ һини ве йәке нәбьбу, ләма жи әԝи хԝә жь щьвате дур дьгьрт. Ле паши кӧ әԝи хушк у бьра дьһа баш нас кьрьн, әԝи ньһерʹандьна хԝә гӧһаст. Әԝ дьбежә: «Әз баԝәр ьм кӧ сәр тʹәмамийа дьнйайе мәрьв мина һәв ьн, ле тʹәне хәбәрдан у кьред ԝана щӧдә нә». Ләма жи, щьвата хԝәйә тʹәзә бәрамбәри йа бәре нәкә. Пешәнгәкә бь наве Анна-Лиза ӧса дьбежә: «Әз дәрбази щийед дьн бум у мьн заньбу кӧ ԝедәре ԝе һәр тьшт жь щийе бәре щӧдә бә. Әз дәрбази щийе тʹәзә бум, ԝәки тьштед тʹәзә һин бьм».

Рʹуспи жи гәрәке щьвата хԝәйә тʹәзә бәрамбәри йа бәре нәкьн. Дьбәкә щьвата тʹәзәда һьнә шьхӧл щурʹәки майин тенә кьрьне, ле әв йәк найе һʹәсабе кӧ методед ԝан нәрʹаст ьн. Пешийа кӧ тьштәки бежи, рʹьнд пебьһʹәсә кӧ ԝедәре фьлан тьшт ча те кьрьне (Ԝаиз 3:1, 7б). Дәԝса кӧ зоре бьра бьки ԝәки ньһерʹандьна тә һьлдьн һʹәсаб, дьһа баш ә бь рʹабун-рʹуньштьна хԝә ԝанрʹа бьби мәсәлә (2 Корьнтʹи 1:24).

3. Тʹәви щьвате һәвкʹарийе бькә (Филипи 1:27). Сәва кӧ дәрбази щики бьн, гәләк ԝәʹдә у ԛәԝат лазьм ә, диса жи гәләк фәрз ә ԝәки тӧ сәри серида һәрʹи щьвина ль Ода Щьвате. Һәрге хушк у бьред щьвата тәйә тʹәзә ԛә тә нәвиньн йан тʹәне щарна бьвиньн, әԝана ԝе ча бькарьбьн али тә бькьн? Хушка мә Лусинда, йа кӧ ль Африкайа Башуре дьжи, тʹәви дӧ ԛизед хԝә дәрбази бажарәки мәзьн бу. Әԝ дьбежә: «Мьнрʹа ширәт һатә дайине кӧ тʹәви щьвате һәвкʹарийе бькьм, тʹәви хушк-бьра дәркʹәвьм хьзмәтийе у сәр щьвата щаба хԝә бьдьм. Ӧса жи мә готә бьра, кӧ әԝана дькарьн мала мәда щьвинед бона хьзмәтийе дәрбаз кьн».

Һәвкʹарийа тʹәви хушк-бьред щьвата тәйә тʹәзә ԝе баԝәрийа тә дьһа ԛәԝи кә у мәщале бьдә тә ԝәки тӧ жи кәсед дьн һелан ки. Рʹуспийед щьвата Анна-Лизайе жерʹа готьн кӧ әԝ тʹәви һәр кәси жь щьвате дәркʹәвә хьзмәтийе. Гәло әв йәк чь кʹар ани? Хушка мә дьбежә: «Ԝана гәләк али мьн кьр, кӧ әз һини щьвате бьм». Ӧса жи, гава тӧ тʹәви хушк-бьра Ода Щьвате тʹәмьз дьки йан жи оде дьби хԝәйи, бь ве йәке тӧ нишан дьки кӧ щьвата тʹәзә ида щьвата тәйә жи. Тӧ чьԛас зедә шьхӧлед щьватева мьжул би, хушк-бьра ԝе һаԛас зу һини тә бьн, у тӧйе ԝана ча малбәта хԝә һʹәсаб ки.

4. Хԝәрʹа һәвалед тʹәзә бьвинә (2 Корьнтʹи 6:11-13). Сәва кӧ тӧ хԝәрʹа һәвалед тʹәзә бьвини, лазьм ә ԝәки тӧ дина хԝә бьди хушк-бьра. Ләма жи, пешийа у паши щьвата незики ԝан бә у тʹәви ԝан бьбә нас. Навед ԝана бира хԝәда хԝәй кә.  Һәрге тӧ наве мәрьва бир нәки у һьндава ԝанда дьлгәрм би, әԝана жи ԝе тә һʹәз бькьн у бьхԝазьн тʹәви тә һәвалтийе бькьн.

Бьра хушк-бьред щьвата тәйә тʹәзә ӧса тә нас кьн ча тӧ һәйи. Хушка мә Лусинда дьбежә: «Мә гава пешьн дьавит, ԝәки хушк-бьра тʹәглифи мала хԝә кьн. Бь сайа ве йәке, мә хԝәрʹа һәвалед тʹәзә дит». Әм жи дькарьн чʹәʹв бьдьнә ԝе.

«ҺӘВДӦ ԚӘБУЛ КЬН»

Бона һьнә хушк-бьред мә чәтьн ә һәрʹьн Ода Щьвате, кʹидәре кӧ тʹьжи мәрьвед нәнас ьн. Ләма жи тӧ ча дькари али ԝан мәрьва бьки, йед кӧ дәрбази щьвата тә бунә, ԝәки әԝана хԝә рʹьһʹәт тʹәхмин кьн? Паԝлосе шанди ӧса гот: «Һәвдӧ ԛәбул кьн, чаԝа Мәсиһ әм ԛәбул кьрьн» (Рʹомайи 15:7). Рʹуспи гәрәке чʹәʹв бьдьнә Иса, у ԝан мәрьва ԛәбул кьн, йед кӧ тʹәзә тенә щьвата ԝан (Бьньһерʹә чаргошә « Сәва кӧ Дәрбази Щьвата Тʹәзә бьн Чь Гәрәке Бе Кьрьне?»). Ӧса жи щьватеда һʹәму мәрьв, һәла һе зарʹ жи дькарьн али кәсед тʹәзә бькьн, ԝәки әԝана хԝә рʹьһʹәт тʹәхмин кьн.

Хенщи ве йәке кӧ ԝана тʹәглифи мала хԝә кьн, дьбәкә ԝанрʹа һьнә тьштада аликʹари лазьм бә. Мәсәлә, хушкәке али хушкәкә дьн кьр, йа кӧ жь шьһәрәки дьн дәрбази щьвата ԝе бьбу, ԝәки әԝ бькарьбә транспорте бьдә хәбате. Әв йәк али хушка тʹәзә кьр, кӧ һини щийе тʹәзә бә.

МӘЩАЛӘК КӦ ПЕШДА ҺӘРʹЬН

Гава кӧли мәзьн дьбә, әԝ чʹәрме хԝә чәнд щара дьгӧһезә, һʹәта кӧ бькарьбә бьфьрʹә. Мина ве йәке, гава тӧ дәрбази щьватәкә дьн дьби, тӧ гәрәке хәмед хԝә жь хԝә бавежи, йед кӧ рʹийа тә дьгьрьн «бьфьрʹи», демәк Йаһоԝарʹа хьзмәт ки. Николас у Селин дьбежьн: «Щигӧһастьн тьштәки баш ә. Гава әм һини мәрьвед тʹәзә у щийе тʹәзә дьбьн, әв йәк али мә дькә  һʹӧнӧред тʹәзә нав хԝәда пешда биньн». Бьре мә Жан-Шарл дьбежә кӧ малбәта ԝи чь кʹар стандийә: «Щьвата мәйә тʹәзәда, зарʹед мә рʹӧһʹанида пешда чун у дьһа незики Йаһоԝа бун. Чәнд мәһ шунда, ԛиза мә дәстпекьр сәр щьвина Мина Иса Мәсиһ Бьжин у Хьзмәт кьн пе дәрса дәре у кӧрʹе мә бу мьзгинване нәньхӧманди».

Ле һәрге мәщала тә тʹӧнә йә дәрбази ви щьвате би, кʹидәре кӧ һʹәԝщәти һәйә, тӧ чь дькари бьки? Тӧ диса жи дькари щьвата хԝәда ль гора һьнә ширәтед ве готаре һәрәкʹәт бьки. Итʹбарийа хԝә Йаһоԝа бинә, тʹәви щьвате һәвкʹарийе бькә у тʹәви хушк-бьра дәркʹәвә хьзмәтийе. Ӧса жи хԝәрʹа һәвалед тʹәзә бьвинә у достийа хԝә тʹәви кәсед кӧ тӧ ида нас дьки, дьһа ԛәԝи кә. Йан жи тӧ дькари али кәсед тʹәзә у али ԝан мәрьва бьки, йед кӧ һʹәԝще аликʹарийе нә. Мәсиһийед рʹаст бь сайа һʹәзкьрьне әʹйан дьбьн. Әв һәр тьшт ԝе али тә бькьн ԝәки тӧ дьһа незики Йаһоԝа би (Йуһʹәнна 13:35). Баԝәр бә кӧ «ԛӧрбанед ӧса ль Хԝәде хԝәш тен» (Ибрани 13:16).

Нава чәтьнайада жи гәләк хушк-бьра щьватед хԝәйә тʹәзәда пешдачуйи у бәхтәԝар бунә. Тӧ жи дькари пешдачуйи би! Хушка мә Анна-Лиза ӧса дьбежә: «Чахе әз дәрбази щьвата тʹәзә бум, әз дьһа пешда чум». Хушка мә Казуми дӧдьли набә кӧ гава мәрьв дәрбази щики дьн дьбә, «әԝ дькарә аликʹарийа Йаһоԝа ви алива бьвинә, кӧ нә жи һивийе бу». Бьре мә Жуел жи ӧса дьбежә: «Бь сайа һәвалед хԝәйә тʹәзә, әз хԝә ида ча хәриб һʹәсаб накьм. Ньһа әз хԝә ӧса незики щьвата хԝәйә тʹәзә тʹәхмин дькьм, кӧ әз ида ԛә нахԝазьм жь вьр һәрʹьм».