Xinganeka kwila mon’é ukutangela kwila ene mumulokalala muxikola. Wandabhanga kyebhi? Wandajijidika oxikola kubhana kastiku ku woso wene mulokalala mon’é? Wandalonga mon’é kyebhi kyatokala kuvutula? Ande dya kuxinganeka yoso iwatokala okubhanga, ijiya hanji okidi kyalungu ni kulokalala. a

•  Ihi ingatokala kwijiya yalungu ni kulokalala?

•  Kyebhi kingitena kukwatekesa mon’ami?

 Okulokalala kima kyahi? Okulokalala kulombolola kutalesa hadi izuwa yoso kumuthu kikale kumutalesa hadi muxitu mba mukilunji, omuthu ubhanga kiki ni vondadi yoso. Maji kokwila kima kyosokyoso kyayibha kyatubhanga, kulombolola kyá kutulokalala, kana kyene.

 Mukonda dyahi kima kyambote kwijiya omaka enyá: Amoxi atumbula okizwelu “kulokalala” phala kulombolola kima kyosokyoso kiluwalesa, kikale se kyadikota mba kyofele. Maji se uthandanganya katé ni ima yofele ibhanga o athu kwa mon’é, sé kukimesena wejibhangesa mon’é kudivwa kwila kale ni uhete wakubatula maka mwene ubheka. Kindala kiki ni kyoso kyandakula mwene wandabhindamena kukala ni uhete yú.

 Kitumu kya Bibidya: “Kana kulenguluka kukala ni njinda mu mwenyu wé.”—Ndongixi 7:9.

 Kibatwilu kyamaka: Sumbala kwala ithangana eye watokala kubhanga kima, maji ithangana yamukwa, itena kubhana kwa mon’é kithangana kyakudilonga okukolokota ni kwijiya kyoso kyatokala kudibhana ni athu.—Kolose 3:13.

 Majiphe ihi iwatokala okubhanga se mon’é amumuzukutisa mulwelu mu ithangana yoso?

•   Ni mwanyu woso ivwidila mon’é. Sota kwijiya (1) ihi yamubhita ni (2) mukonda dyahi asolo kulokalala mon’é. Kana hanji kuxinganeka kubhanga kima sé hanji kwijiya omaka oso. Phala kwijiya yoso yabhiti, eye watokala kuzwela ni alongexi amon’é mba kuzwela ni jitata ja mona wengi wamulokalala mon’é.

   Kitumu kya Bibidya: “Kuvutula kwa lusolo, kwila yoso kiluwa u ivwa, yó wôwa ni ku di bhekela sonyi.”—Jisabhu 18:13.

•   Se mon’é amumulokalala, mukwatekese kumona kwila o ukexilu wê wakutambwijila utena kusosolola omaka mba ku avudisa dingi. Mukifika o Bibidya yamba kiki: “Kuvutula kwakulenduka, kubhwisa jimvunda; maji okuzwela kwa kunonga, kubhekela njinda.” (Jisabhu 15:1) Mukidi, okuvutula phonzo kuvudisa ngo dingi omaka, muveji dya kusosolola okulokalala, okulokalala kuvula dingi.

   Kitumu kya Bibidya: “Kana kuvutula phulu mu phulu, kana kuvutula ndaka mu ndaka.”—1 Phetele 3:9.

•   Jimbulula mon’é kwila okukamba kuvutula phulu mu phulu kikulombolola kwila mwene kyowa, kana. Maji kiki kimubhana nguzu mukonda mwene wamudituna kumutumina kwala muthu wengi. Kifwa mukubhanga kiki, mwene wamutolola omukwa kulokalala sé kukituka mukwa kulokalala.

   Kima kyambote mon’é kwijiya omaka enyá bengebenge se amumulokalala mukaxi ka internete (cyberbullying). Okudikwata bhukaxi ka internete ni muthu wamulokalala mon’é, kwandamuswinisa ngó dingi kusuluka ni kulokalala mon’é. Okiki we kitena kubhangesa muthu kutatela mon’é mukwila wamulokalala we! Mukonda dya kiki, sayi bhabha okitambwijilu kyabetakota okudixibha. Yú masunga mambote, mukonda wandabhangesa woso wamulokalala kudixibha, kandalokalala dingi mon’é.

   Kitumu kya Bibidya: “Bhwa kambe jihwinyi, túbhya tu jima.”—Jisabhu 26:20.

•   Sayi ithangana, kota se mon’é udituna kukala mukaxi ka athu mba mu ididi mukala athu awabhela okulokalala. Mukifika, se mon’é wejiya kyá kwila athu yá ene mukala mukididi kyanganji, sembele se mwene usota njila yengi phala kadisotele maka.

   Kitumu kya Bibidya: “Njimu kilwezu u ki mwena mu kanga, anga u swam’é kyá; ilalu-phe a lundujuka ngó, katé ki a bonga divuwa.”—Jisabhu 22:3.

 FIKISA ONDUNGE YIYI: Kwatekesa mon’é kuxinganeka mujinjila jalanaju phala kudibhana ni maka yá anga mukwatekese we kuxinganeka mumbote ni mukuyibha yajinjila jenyiji. Mukifika:

•  Ihi yandabhita se mwene ukamba kuta kumuxima yó wamumulokalala?

•  Ihi yandabhita se mwene ni kudyelela kwoso utangela yó wamumulokalala phala kweha ophulu yamubhanga?

•  O se mwene utangela omaka ku atwameni axikola?

•  Kyebhi okwelela mba kukala ni ngalasa kutena kumukwatekesa?

 Lembalala kuma kimwala njila yatokala phala ibhidi yoso mukonda okibhidi kyala kumatelu matelu. Mu kyenyiki kwatekesa mon’é kusanga yoso onjila yandabeta kumukwatekesa. Mutangele ni kidi kyoso kwila eye wala kumbanji yê phala kumukwatekesa.

 Kitumu kya Bibidya: “Dikamba u zola mu thembu joso; o ndandu u di monekena mu jiphaxi.”—Jisabhu 17:17.