Mukanda wa Phetele 3:1-22
3 Kyene we kimoxi, enu mu ahatu tumakenu o anumi enu, phala se ene ka belesela o mak’â Nzambi, mwa nganyala sé izwelu, bhukaxi ka wendelu wambote wa ahatu’â.
2 Kuma ene amono o wendelu wenu wambote kumoxi ni kuxila kwoso,
3 o kubhenya kwenu ki kukale ngó kwa kanga, kwinda o ndemba, kuta misanga ya ulu mba izwatu yafina.
4 Maji o kubhenya kwenu kukale kwa muxima, mukale mu athu alenduka, mwabatama, mukonda o ukexilu yú wene wala ni valolo yadikota bhupholo ya Nzambi, o kubhenya kuku, ki kubola.
5 Kuma m’ukulu kyene kyakexile mu diyudika o ahatu afiyele adyelele kwa Nzambi ni kutumaka o anumi’â.
6 Kala Sala kyakexile mu tumaka Mbalahamu mu ku mwixana, ngana yami. Enu mwanda kala mu an’â Sala, se mu kolokota mu kubhanga o mbote, ni kukamba o wôma.
7 Kyene we kimoxi, enu mu anumi, kolokotenu mu kutunga kumoxi ni ahatu enu, mu kwatendela kyambote.* Bhanenu kijingu ku ahatu enu kala itutu yatolo nguzu. Kala Nzambi kya mibhana o ujitu wa mwenyu, Nzambi wa abhana wâ, se mukamba kubhanga kiki Nzambi kanda kwívwa o misambu yenu.
8 Kyenyiki, enu enyoso kalenu ni kilunji kimoxi,* mu dixinganeke jinga, mudizole kala mu jiphange, mu dikwatela henda, kalenu mu akwa kulenduka.
9 Kanenu kuvutula phulu ni phulu, né ndaka ni ndaka. Muveji dya kiki, woso wa mibhange phulu, mu mubesowala mukonda amisolo phala kubhanga kiki, ni mutambule o mabesá.
10 Mukonda woso wazolo o mwenyu, wamesena kuzediwa, watokala kulanga o dimi dyê ku ima yayibha ni kulanga o dikanu dyê mu kutanga makutu.
11 Mwene watokala kulenga kubhanga kyayibha ni kusota kubhanga o mbote, mwene we akolokote mu kusota o paze.
12 Mukonda Jihova umona o athu ayuka, wívwa o kudyonda kwâ. Maji Jihova* wazembe o athu abhanga o ima yayibha.
13 Mu kidi, se muswina mu kubhanga o ima yambote, nanyi wanda mibhanga kyayibha?
14 Maji né mwene se mutala hadi mukonda dya kukala mu athu ayuka, mwanda zediwa. Maji-phe kimukale ni wôma wa ima ya akwatesa wôma,* ki mu thandanganye.
15 Maji ximanenu Kidistu mu mixima yenu, kala Ngana yenu. Kalenu jinga polondo phala kuzokela o kixikanu kyenu, bhu pholo ya yó amibhula yalungu ni kidyelelu ki mwala nakyu, maji mu kibhanga-phe ni kubatama ni kuxila kwoso.
16 Kalenu ni kitongolwelu kyazele, phala kyoso o athu kyazwela ima yayibha yalungu ni enu, akale ni jisonyi mukonda dya wendelu wenu wambote, kuma mwala mu akayedi a Kidistu.
17 Se kikala mu vondadi ya Nzambi, kota se mutala hadi mukonda dya kubhanga o mbote, muveji dya kutala hadi mukonda dya kubhanga kima kyayibha.
18 Mukonda Kidistu wamifwila mu lumoxi ngó kwabhu, mukonda dya ituxi yenu. Muthu wayuka ku athu akambe o kuyuka, phala mukale ni ukamba ni Nzambi. Mwene wafu ni mukutu wa xitu maji a mu fukununa ni mukutu wa nzumbi.
19 Kyenyiki, mwene wayi yu waboko o njimbu ya kufundisa ku jianju jakexile mu kaleya,
20 o jianju ja bhukumukine kyoso Nzambi kyakexile mukinga ni mwanyu woso mu izuwa ya Nowé, kyoso kyakexile mutunga o alaka. Mu alaka mwabokona ngó athu ofele, dinake dya athu, enyá abhuluka ku dilúvyu dya menya.
21 Tutena kusokesa o kizulukutu kiki ni batizu ya mu mibhulula kindala, o batizu yiyi, ki phala ku mikatula o dixidilu dya mukutu, maji mukubhinga kwa Nzambi o kitongolwelu kyambote bhukaxi ka difukunukinu dya Jezú Kidistu.
22 Mwene wala kumbandu ya kadilu ya Nzambi mukonda wayi ku dyulu. Nzambi wabhangesa kwila o jianju, maungana ni makutena a belesela Jezú.
Footnotes
^ Mba, “mukwa xila.”
^ Mba, “banzenu mu ukexilu umoxi.”
^ Mba, “o mesu ma Jihova.”
^ Mba nange, “Ki mukale ni wôma wa izukutisu yâ.”
