A ngi Vualele ku mbanza ia Santo Domingo ku ixi ia República Dominicana. Tu kiuana kia jiphange, mala atatu ni muhatu umoxi, eme ngi kasule mu divumu dia mam’etu. O jitata jetu akexile ni ukexilu uambote, ia a mesenene ku tu sasa mu kaxi ka athu a ukexilu uambote. Ande dia ku ngi vuala, o jitata jami a tokalele mu ngeleja ia Mórmon. Mukonda dia uzuatelu uambote ni ukexilu uambote ua kexile mu londekesa o minzangala exile akunji mu ngeleja ia Mórmon, o jitata jami a solo ku bhanga mbandu ia ngeleja íii.

Kioso ki nga kexile mu kula, nga kexile mu uabhela kiavulu o ikalakalu ia kexile mu bhanga mu ngeleja, eme nga kexile mu xila o ilongesu ia Mórmon ia lungu ni ku bhana valolo ku muiji ni ku kala ni ukexilu uambote. Nga zolele kiavulu ku bhanga mbandu ia ngeleja ia Mórmon, eme nga suu mbambe ia ku kala mukunji ua Mórmon.

Kioso ki nga tenesa 18 dia mivu, eme ni muiji uami tuai mu tunga mu ixi ia Estados Unidos phala ngi tene ku di longa mu xikola iambote ia katunda. Mu ku bhita muvu umoxi, o phange ia ndenge ia mam’etu ni muadi uê, exile Jimbangi ja Jihova, ejile mu mbanza ia Flórida mu tu kunda. Ene a tu ixana phala kuia-nâ mu kiônge kia dikota kia Jimbangi ja Jihova. Nga sangulukile kiavulu mu ku mona athu oso a ngi kondolokele ku tanga o Bibidia ni ku soneka o jipondo ja betele kota. Kienhiki, nga bhingi kisoneku ni papela, eme nga mateka ku soneka uami o jipondo ja beta-kota.

Kioso kiabhu o kiônge kia dikota, o phange ia ndenge ia mam’etu ni muadi uê, mukonda dia ene kuijiia kuila eme nga mesenene ku kala mukunji, a mesenene ku ngi kuatekesa ku di longa o Bibidia. Nga mono kuila kima kiambote o ku di longa o Bibidia, mukonda nga kexile ngó mu di longa divulu dia Mórmon, o Bibidia kana.

Kioso ki tua kexile mu di longa o Bibidia bhu kaxi ka Mutelembe ua kafuetele, o phange ia ndenge ia mam’etu ni muadi uê, akexile mu ngi tangela phala ku sokesa o ima i nga kexile mu di longa mu ngeleja iami ni milongi ia Bibidia ia kexile mu ngi longa. Ene a Mesenene kuila, ngi tungununa o kidi mu diami.

 Nga xikinine mu ima iavulu ia lungu ni Mórmon kala ia kidi, maji nga kexile ni phata se o ilongesu ia Mórmon ia kexile ué mu Mikanda Ikola. O phange ia ndenge ia mam’etu ua ngi tumikisa Despertai! 8 ia mbeji ia Kamoxi ua 1995, a di bhange ku Jimbangi ja Jihova, mua kexile milongi ia tokalele mu ngeleja ia Mórmon. Nga sasumuka kiavulu mu ku mona kuila kua kexile ilongesu iavulu ia ngeleja Mórmon i nga kambele o ku ijiia. O milongi ia ngi suínisa o ku tokuesa kiambote o kijimbuete kia Mórmon mu internete phala kuijiia se o milongi ia kexile mu Despertai! iexile muene ia kidi. Iexile muene ia kidi, mukonda nga i mono kioso ki nga ile mu kunda o muzeu ua Mórmon mu mbanza ia Utah.

Eme nga xikinine kuila o Divulu dia Mórmon ni Bibidia ia kexile ni ibanzelu imoxi. Maji kioso ki nga mateka o ku tanga o Bibidia, nga mono kuila o ilongesu ia Mórmon ni milongi ia Bibidia ki iene imoxi. Mu kifika, mu divulu dia Izekiiele 18:4, o Bibidia i zuela kuila o muenhu ufuá. Maji mu divulu dia Mórmon, mu Alma 42:9, di zuela: “O muenhu ki u tena kufuá.”

Ko ilongesu ngó íii, ni ilongesu ia mukuá ia lungu ni ku di ta mu maka a ixi, ia kexile ué mu divulu dia Mórmon, ia ngi luualesa kiavulu. Mu kifika, akua Mórmon ene mu a longa kuila o jaludim ia Edene ia kexile mu Condado de Jackson, Missouri. O jipolofeta ja jingeleja, amba kuila saí kizuua, “O utuminu ua Nzambi ua-nda tumina o ixi ioso ni dibandela dilondekesa o ufôlo ua athu oso bhu kaxi ka unguvulu ua ixi ia Estados Unidos.”

Nga kexile mu dibhudisa se kiebhi kiki ki tena ku bhita mu ixi iami—mba mu jixi ja kamúkua. Eme nga zuela o maka enhá ni munzangala mukua Mórmon akexile mu ku mu longa phala ku kala mukunji mu ngeleja íii. Nga mu ibhuidisa se muéne ueji tena ku bhânga ni phang’iê mukua Mórmon, se ixi iê i bhânga ni ixi ia mukuá. Nga di uana kiavulu kioso muéne kia ngi tambuijila kuila ueji bhânga! Nga di bhakula mu ku di longa dingi ia lungu ni kixikanu kiami, eme nga soto ué o atuameni a ngeleja ia Mórmon. Ene a ngi tambuijila kuila kua bhingile thembu iavulu phala kuijiia o kikutu kia itambuijilu ia ibhuidisu iami.

Nga luuala ni kitambuijilu kiá, ki ngi mesenene dingi ku di longa phala ku kala mukunji a Mórmon. Nga mesenene kiá ngó ku kala mukunji, phala ku kuatekesa athu engi. Nga mesenene kiavulu ku ngijiia ku athu kuila ngi mukunji. Maji ki ngi kijidile kiavulu kia lungu ni Nzambi. Sumbala nga tangele kiá o Bibidia veji javulu, ki ngi kexile mu i bhana valolo. Eme ki ngi kijidile iebhi o vondadi ia Nzambi phala o ixi ni athu.

Mukonda dia ku di longa o Bibidia ni Jimbangi ja Jihova, ngejiia diebhi o dijina dia Nzambi, ihi i bhita kioso ki tu fuá, ni kikalakalu kiebhi kiala na-kiu Jezú mu ku kumbidila o vondadi ia Nzambi. Kioso ki nga suluka o ku tanga dingi o divulu didi dikola, nga uabhele kuzuela ni akuetu ia lungu ni ioso i nga kexile mu di longa. Nga kijidile kuila kuene muene Nzambi, maji mu kithangana kiki, ngi tena kuzuela nê, bhu kaxi ka musambu kala Kamba diami dia kazola. A ngi batizala kala ngi Mbangi ia Jihova mu kizuua 12 kia mbeji ia Kavua ka muvu ua 2004, mu ku bhita mbeji jisamanu, nga mateka o ku kalakala kala muboki ua thembu ioso.

Nga bhange mivu itanu mu sidivisu ia thembu ioso mu Mbonge ia Jimbangi ja Jihova ku mundu uoso ku Brooklyn, ku Nova York. Nga sangulukile kiavulu mu ku tena ku kalakala bhu kididi bhuene mu sokejeka o ji Bibidia, ni madivulu metu a tena ku lungulula o ukexilu ua athu mu ixi ioso, eme ngene mu sanguluka kiavulu mu ku kuatekesa akuetu kuijiia Nzambi.