Ku América do Sul mu ixi ia Chile, mu mbanza ia San Bernardo, mua tungu kilumba muboki, a mu exana Madiia dia Nzebele. Muéne ni muiji uê a tokala ku diembu dia Mapuche. O muiji uoso ua suínine kiavulu mu ku kalakala phala ku mateka o kilunga mu dimi dia Mapuche, a di ixana ué Mapudungun.

Kioso kia ambela kuila o Lembalasa ia kufuá kua Kristu ieji bhita ué mu dimi dia Mapudungun, ni kuila a bhange 2.000 ja tumikanda tua lungu ni Lembalasa ia kufuá kua Jezú mu dimi didi, phala ku tu bhana ku athu, Madiia dia Nzebele ua xinganeka. Ihi ia tokalele ku bhanga muéne phala ku kuatekesa? Muéne ua lembalala o misoso ia Jimbangi ja mukua ja minzangala a ditundu kiambote, mu ku boka ku jikoleka jâ ja xikola ni ku alongexi. Muéne ua zuela ni jitata jê ia lungu ni maka enhá, ene kiiadi alondekesa Madiia dia Nzebele ku xinganeka mu ndunge phala ku bhana o tumikanda mu xikola. Ndunge iebhi ia xinganeka Madiia dia Nzebele?

Kia dianga, Madiia dia Nzebele ua bhingi ku alongexi ala ku pholo phala ku mu ehela ku padika o kamukanda ku dibhitu dia xikola. Ene a xikina, anga a mu ximana. Saí kizuua, kioso kiexana o adilongi mu kamene phala kuívua o ngolokela, o muendexi ua xikola ua ambela ué ia lungu ni kamukanda ka tele Madiia dia Nzebele bhu dibhitu!

Mu ku bhita kithangana, Madiia dia Nzebele ua bhingi phala ku bokola mu maxilu a xikola. Kioso kia mu ehela ku alongexi, muéne uebhula mu maxilu oso, se saí muthu mukua Mapuche. Muéne uambe: “Nga xinganeka kuila bhu xikola mua kexile ngó 10 mba 15 kia akuâ Mapuche, maji nga sange athu avulu—nga bhana 150 a tumikanda!”

Saí muhatu ua mono o kamukanda bhu dibhitu dia xikola, uebhula se nanhi ueji mu jimbulula kiambote ia lungu ni fesa íii. Xinganeka kiebhi kia divu, kioso kia mu idikisa kilumba kiala ni 10 dia mivu! Madiia dia Nzebele uambe ni kuelela: “Muéne ua fikile kuila muadiakimi.” Kioso kia mu bhana o kamukanda ni ku mu jimbulula dingi ia lungu ni kamukanda, Madiia dia Nzebele uebhula o muhatu kuebhi kua tungu, phala ku mu kunda ni jitata jê, ni ku mu jimbulula dingi ia lungu ni Utuminu ua Nzambi. O 20 a aboki a sidivila mu kilunga kia dimi dia Mapudungun a sanguluka kiavulu, kioso kia mono o muhatu bhu kaxi ka 26 a athu a mukua, mu Lembalasa ia kufuá kua Jezú. Lelu, o kilunga kia mu kula mu nzumbi!

Ki kale se u mona ndenge mba u muadiakimi, o kuila u tena ku bhana tumikanda ku jikoleka jê ja xikola mba ja salu phala kuia mu Lembalasa ia kufuá kua Kristu, mba kuia mu kuívua diskursu dia katunda mba kiônge kia dikota? Mukonda diahi ku tange o misoso ia jiphange jetu mu madivulu metu phala ni u kale ni ndunge ia ku bhana o tumikanda phala ku ditunda kiambote? Bhinga ué o nzumbi ikola kua Jihova, phala ku ku kuatekesa ku zuelela athu ia lungu ni muéne. (Luka 11:13) Se u bhanga kiki, ua-nda diuana o mbote i ua-nda katula ni ku ku suínisa.