Kala ki ua di longo mu kadivulu kaka, o Bibidia iala ni itendelesu iavulu i tena ku ku kuatekesa eie ni muiji uê. Jihova ua mesena u zediua. Muéne u kanena kuila se u ta o ubhezelu ku pholo “ima ioso iii a mi kuiila-iu.” (Matesu 6:33) Muéne ua mesena kuila u kala u kamba diê. Bhanga ioso phala ku kala ni ukamba uambote ni Nzambi. Iú ujitu ua dikota u tena ku kala nau o muthu mukua ituxi.—Matesu 22:37, 38.

IHI I ZUELA O BIBIDIA: “Ngi mi kale ngi tata ienu, enu mu ngi kale mu an’ami a mala ni àhatu kiene kiambe Ngana Uatena-Ioso.” (2 Kolindo 6:18) Nzambi ua mesena u kala kamba diê dia kazola. O ku samba, ku tena ku ku kuatekesa o ku bhanga kiki. Jihova u ku bhinga ku ‘Samba sé ku fula.’ (1 Tesalonika 5:17) Muéne ua mesena kuívua o maka oso ua mu bhita nau ni ima ioso ia ku kala ku muxima. (Filipe 4:6) Kioso ki u samba ni muiji uê, ene a-nda mona kuila eie ua dielela muene kua Nzambi.

Ku tokala ngó kuzuela ni Nzambi, ua tokala ué ku muivua. U tena ku bhanga kiki mu ku di longa o Maka mê ni madivulu a mukua. (Jisálamu 1:1, 2) Xinganeka mu milongi i ua di longo. (Jisálamu 77:1, 12) O kuívua Nzambi ku bhinga ué kuila uia mu iônge ithangana ioso.—Jisálamu 122:1-4.

O ku tangela akuenu ia lungu ni Jihova ku tu kuatekesa ué ku suínisa o ukamba uê ni muéne. Se u bhanga kiki, ua-nda mona kuila ua zukama kua muéne.—Matesu 28:19, 20.

IHI I U TENA O KU BHANGA:

• Sota kithangana phala ku tanga o Bibidia izuua ioso ni ku samba

• Tenu ku pholo o ikalakalu mu nzumbi, mu veji dia ku tonoka ngó

IHI I ZUELA O BIBIDIA: “Zukamenu kua Nzambi, muène u mi zukama enu.” (Tiiaku 4:8) Ua tokala u sota kithangana kia ku bhanga o ubhezelu ku muiji, ni ku kumbidila o kithangana kiki. (Dimatekenu 18:19) Maji ku bhinga ku bhanga dingi ima ia mukua. Nzambi ua tokala ku kala o muthu ua beta kota ku muenhu uê izuua ioso. Suínisa o ukamba ua muiji uê ni Nzambi mu kuzuela ia lungu ni muéne, “Ki u xikama m’onzo ié banza maka enhá; o ki u kala kuenda njila enda ni maka enhá; o ki u zeka, zeka ni maka enhá; o ki u balumuka ku kilu, kuata maka enhá.” (Matendelelu 6:6, 7) Kala ni kibanzelu kia kexile na-kiu Josuué uambele kuma: “Maji eme-phe ni dibhata diami, tu bhikila Jihova.”—Josuué 24:15.

IHI I U TENA O KU BHANGA:

• Sota milongi i kuatekesa muthu ni muthu ku muiji