Jihova ua mesena kuila tu ‘kala jifiiele.’ (Mikeia 6:8) O ukexilu iú ki u tokala ku kamba mu ukaza uê, mukonda se ki mu di kala fiiele ki mua-nda di dielela. Maji mua tokala ku di dielela phala mu tene ku di zola.

Lelu o ufiiele mu ukaza ua bhonzo. Kienhiki, phala ku langa o ukaza uê eie ua tokala ku bhanga ima iiadi.

IHI I ZUELA O BIBIDIA: “Sota o ima ioso ia beta-kota.” (Filipe 1:10, NW) O ukaza uê kima kia beta kota ku muenhu uê. Ua tokala ku u ta ku pholo.

Jihova ua mesena kuila tu suua o ibhindamu ia kaza dietu ni ku “kemba” kumoxi. (Ndongixi 9:9) Muéne uamba kuila ki u tokala ku landuka kaza diê, maji mua tokala ku bhanga ioso phala kala muthu a zediuise mukuá. (1 Kolindo 10:24) Bhangesa kaza diê ku mona kuila uala ni valolo ni kuila ua mu zolo.

IHI I U TENA O KU BHANGA:

• Bhanga ioso phala mu bhite kithangana kumoxi, suua kaza diê

• Kana ku di banza ngó “eie mudiê” maji banza ué kaza “diê”

 

IHI I ZUELA O BIBIDIA: “Uoso ngó u tonginina muhatu ni ku mu kuatela luimbi, uate-nê kiá phànda ku muxima uê.” (Matesu 5:28) Se diiala mba muhatu ua kazala kiá, u kala ni ibanzelu ia undumbu, kiki kilombolola kuila kale fiiele kua kaza diê.

Jihova uambe kuila ua tokala ku langa o muxima uê. (Jisabhu 4:23; Jelemiia 17:9) Phala u tene ku bhanga kiki, ua tokala ku langa o mesu mê. (Matesu 5:29, 30) Kaiela o phangu ia Jobe ua te kikutu ni mesu mê, mu kuila ka-nda tala muhatu ua ngene ni luímbi. (Jobe 31:1) Kana ku tala ufusa. Sola ku muxima uê ku mesena ngó muhatu uê.

IHI I U TENA O KU BHANGA:

• Londekesa ku akuenu kuila o ukaza uê uene uala ku pholo

• Suua o ibanzelu ia kaza diê, sé ku laleka batula o ukamba uoso u bhangesa kaza diê ku divua kia iibha