Mukanda wa Tiyaku 3:1-18
3 Jiphange jami, mwaxaxi kenu ki mwa tokalele kukala alongexi avulu, mukonda enu mwejiya kwila o kifundisu kyetu kyanda betakota.
2 Kuma etu enyoso twene mutondala* muveji javulu. Se muthu kene mutondala mu kuzwela, yó muthu wayuka, utena we kulanga o mukutu wê woso.
3 Kyoso kituta felu kudikanu dya kabalu phala kene ka tu belesele, twendesa we o mukutu wê woso.
4 Talesenu o jinaviyu: Sumbala jene jamakota anga a jixinjika kwala o kitembu kya nguzu, maji a jendesa kwala o kaleme kofele, kwosokwoso kwamesena kuya o mwendexi.
5 Kyene we kimoxi, o dimi sumbala kakidyandu kofele ka mukutu, maji kadinanza mu ima yamakota. Talesenu! O muxitu wadikota atena ku ujokotesa ku kamulengu kofele ka tubhya.
6 O dimi dyedi kala túbhya. Ku idyandu yoso ya mukutu wetu, o dimi dyala ni kuyibha kwoso, dyene dixidisa o mukutu wa muthu, dijokotesa o mwenyu we woso. O túbhya twê tutunda mu Njena.*
7 Mukonda, o yama yoso ya muxitu, o jinjila, o yama yoso idihuha ni mala bhoxi, ni yama ya musanza wakalunga, ene mu ilanga ku athu, o athu ene mu ibhangesa we kwa belesela.
8 Maji seku muthu utena kulanga ni kubhangesa o dimi ku mu belesela. Dyene dya bhukumuka, dyayibha we, dyezala ni mvwenenu ijibhisa.
9 Ni dimi twene muximana Tat’etu Jihova, ni dimi we tuxinga nadyu o athu “a abhange mu kidifwanganu kya Nzambi.”
10 Mu kanu dimoxi dyenyidi mutunda mabesá ni jindaka.
Jiphange jami, o ima yiyi ki yatokala kubhita mwaxaxi kenu.
11 O kwila bhutho* imoxi bhutunda menya atowala ni menya alulu?
12 jiphange jami, o kwila o muxi wa mufiku utena kwima midiva? Mba o muxi wa ji uva utena kwima jifiku? Kyene we kimoxi, bhutho* ya menya a môngwa ki bhutena kutunda menya atowala.
13 Nanyi mwaxaxi kenu wala njimu watongoloka? O muthu mwenyú watokala kukala ni wendelu wambote, ulondekesa kwila mwene ubhanga o ima yoso ni kubatama kutunda mu unjimu.
14 Maji se mukala ni difuba ni unguma* ku muxima, kanenu kudizangeleka, ki mutange makutu.
15 Yú ki unjimu utunda ku dyulu, maji unjimu wa mundu yú wa xitu, utunda ku madimonyo.
16 Mukonda bhwoso bhukala difuba ni unguma,* bhwene we bhwanda kala kavwanza ni ima yoso yayibha.
17 Maji o unjimu utunda ku dyulu udyanga kuzela, anga utululuka, ulenduka, ubelesela, wezala ni henda, ubhana ibundu ya ibhangelu yambote, ki umoneka katombo né mangonya.
18 Mu kyenyiki, o ibundu ya kuyuka a ikuna mu ukexilu watululuka phala yó* asota o paze.
Footnotes
^ Mba, “twene mu lweza.”
^ Tala o Dilombolwelu.
^ Mba, “mu fixi.”
^ Mba, “mu fixi.”
^ Mba nange, “lwimbi.”
^ Mba nange, “lwimbi.”
^ Mba nange, “kwa yó.”