Kala Kyasoneka Matesu 2:1-23
2 Kyoso Jezú kya mu vwala mu Beleme ya Judeya, mu izuwa ya Sobha Helode, akwa kuzambula bhukaxi ka jithéthembwa, atundu kwa mu Tundila o Dikumbi, abhixila mu Jeluzaleme,
2 ambe: “Kwebhi kwala yó a mu vwala phala kukala o sobha ya Jijudé? Mukonda kyoso ki twa kexile dikanga twamono o théthembwa yê, etu tweza ku mu ximana.”*
3 Mu kwivwa o maka enyá, Sobha Helode ni mundu woso mu Jeluzaleme, a thandanganya kyavulu.
4 Mwene wongeka o akunji oso a makota, ni jimesene ja kulonga o Kitumu, yu wa ebhwidisa se kwebhi kweji vwalela Kidistu.*
5 A mu tambwijila, exi: “Mu Beleme ya Judeya, mukonda kyene kyasoneka o polofeta, wixi:
6 Eye-phe Beleme ya ixi ya Judá, ki wala u ndenge mu atumini a Judá, mukonda momwé mwéne mwanda tunda o nguvulu wanda langa o mundu wami, Izalayele.”
7 Helode anga wexana mu kaswekele o akwa kuzambula bhukaxi ka jithéthembwa, yu wasoto kwijiya kyambote o kithangana kya monekene o théthembwa.
8 Mu ku a tumikisa mu Beleme, mwene wa a ambela, wixi: “Ndenu mu sote kyambote o kamona. Kyoso ki mu ka sanga, mwiza mu ngi tangela, phala ngiye we ku mu ximana.”*
9 Kyazubha kwivwa o izwelu ya sobha, amateka kwenda, anga a mono kwila o théthembwa ya monene kyoso kyakexile ku mbandu ya mu Tundila o Dikumbi, ya a twamenena ku pholo, katé ki yemana bhu kididi bhwa kexile o mona.
10 Kyoso kya mono o théthembwa, a sanguluka kyavulu.
11 Kya bokona m’onzo, a mono o mona ni Madiya many’â, afukama, ya aximana* o mona. A katula o jimbote jâ anga a mu bhana maujitu: ulu, wasu wa dizumba wa libanu, ni mila.*
12 Maji Nzambi wa a dimuna bhukaxi ka nzoji phala ka vutuke kwa Helode. Mu kuvutuka ku ixi yâ, aditela njila yengi.
13 Kyoso ene kyayi, o anju ya Jihova ya tukulukila Zuze bhukaxi ka nzoji, anga izwela: “Balumuka, kwata o mona ni many’â, lengela ku Ijitu, kala kwenyóko katé ki ngi kutangela. Mukonda, Helode wanda sota o mona phala ku mu jibha.”
14 Kyenyiki, mu usuku wenyó, Zuze wa balumuka wa kwata o mona ni many’â, anga ayi ku Ijitu.
15 Mwene utunga kwenyóko katé ku ufwilu wa Helode. Kiki kya kumbidila kya zwelele Jihova bhukaxi ka polofeta yê, kyoso kyambe: “Ku Ijitu kwene ku ngexanena mon’ami.”
16 Helode kyoso kyamono kwila a mu dingila* kwala akwa kuzambula bhukaxi ka jithéthembwa, njinda ya mu kwata. Anga u tuma kujibha o twana twoso twa mala ala kyá ni mivu iyadi mba ndenge, mu Beleme ni mu jisanzala ja zukamene, mu kutongolola o kithangana tundé akwa kuzambula kya mu tangela o thembu ya monekene o théthembwa.
17 Mu kiki, kya dikumbidila o izwelu ya polofeta Jelemiya, kyoso kyambe:
18 “Mu Lamá evu-mu dizwi kudila ni jingololo javulu. Wexile Lakele wakexile mu didila o twana twê, mwene waditunu ku mu konda o malamba, mukonda o twana twê ki twala-ku dingi.”
19 Kyoso Helode kyafu, o anju ya Jihova ya tukulukila Zuze bhukaxi ka nzoji mu Ijitu,
20 anga u mwambela, wixi: “Balumuka, kwata o mona ni many’â, uye mu ixi ya Izalayele, mukonda o yó a mesenene kujibha* o mona afu kyá.”
21 Mu kiki, mwene wa balumuka wakwata o mona ni many’â, yu wabokona mu ixi ya Izalayele.
22 Maji kyoso Zuze kyevu kwila, Alakelawu wabhingana tat’ê Helode ku ungana mu Judeya, mwene ukala ni wôma wa kuya-ku. Kuma Nzambi wa mu dimuna bhukaxi ka nzoji, mwene wayi mu mbanza ya Ngalileya.
23 Mwene anga uya mu tunga mu mbanza a ixana Nazalé, phala ku dikumbidila o izwelu ya jipolofeta, kyoso kyambe: “Mwene a kà mwixana mukwa Nazalé.”*
Footnotes
^ Mu Ngel.: “ku mu fukamena.”
^ Mba, “o Mexiya; a mu Undu.”
^ Mba, “ku mu fukamena.”
^ Mba, “ku mu fukamena.”
^ Tala o Dilombolwelu.
^ Mba, “a mu nganala.”
^ Mu Ngel.: “a mu sota kukatula o mwenyu wa mona.”
^ Nange kizwelu kya tundu mu Hebalayiku, kilombolola “luthangu.”
