Kala Kyasoneka Matesu 19:1-30
19 Kyoso Jezú kyazubha kuzwela o ima yiyi, watundu mu Ngalileya anga uya mu jimbambe ja Judeya ku sambwa dya Njolodá.
2 Mundu wavulu u mu kayela kwenyóko, mwene anga wa asaka.
3 Jifalizewu a mu zukama phala ku mu tendala, anga a mu ibhwidisa, exi: “O kwila o diyala ditena kusenga o muhatu wê mu kima kyoso-kyoso?”
4 Mwene wa atambwijila, wixi: “Enu kiluwa mu tanga kwila, o yó wa abhange kudimatekenu, wa abhange diyala ni muhatu
5 yu wambe: ‘Mukonda dya kiki, o diyala wanda xisa tat’â ni mam’â, ni ku di kwatenena kwa muhatu wê, ene kiyadi kyâ anga akala xitu imoxi ngó’?
6 Mu kiki, ene kala dingi kiyadi, maji xitu imoxi ngó. Kyenyiki yoso yongeka* Nzambi kana muthu u iwanuna.
7 Ene a mu tangela, exi: “Mukonda dyahi-phe Mozé watumina kubhana ku muhatu o mukanda wakusenga, ni ku mu eha n’ayé?”
8 Jezú wa atambwijila, wixi: “Mukonda dya kukola o mixima yenu, kyene Mozé kya mi ehela kusenga o ahatu enu, maji ku dimatekenu kikyene kya kexile-ku.
9 Ngi mi ambela kwila, woso usenga muhatu wê mukonda dya kikuma kyengi, o kya undumbu* kikyene, anga ukazala ni muhatu wengi, mwene uta phánda.
10 O maxibulu a mwambela, exi: “Se kyene kibhita ni diyala ni muhatu wê, kota o kukamba o kukazala.”
11 Mwene wa atangela: “Ko athu oso a kumbidila o izwelu yiyi, maji kikale ngó yó atena.*
12 Sayi athu akala makudi mukonda a avwala kyá jihaxi, a ka mukwá a abhange makudi ku athu, maji sayi yá adibhange makudi mukonda dya Utuminu wa dyulu. Abhange kiki, woso utena ku kibhanga.
13 O athu anga a mu bhekela twana twa ndenge phala kwatula o maku kuthandu dyâ ni kwa sambela, maji o maxibulu a abazela.
14 Jezú-phe wa atangela, wixi: “Ehelenu o twana twa ndenge kwiza kokwami, kanenu kwa fidisa ku ngi zukama, mukonda o Utuminu wa dyulu watokala kwa yó ala kala ene.”
15 Mwene utula o maku mê kuthandu dyâ, anga utunda bhenyobho.
16 Mu kiki-phe, sayi munzangala wa mu zukama anga u mu ibhwidisa, wixi: “Mesene, mbote yahi i nga tokala kubhanga phala kutambula o mwenyu wa kalelaku?”
17 Mwene wa mu tambwijila, wixi: “Mukonda dyahi wa mu ngi ibhwidisa yalungu ni mbote? Kwene ngó muthu umoxi wambote. Maji se wamesena kutambula o mwenyu wakalelaku, belesela jinga o ijila.”
18 Mwene anga utangela Jezú, wixi: “Ijila yebhi?” Jezú wa mu vutwila: “Kana kujibha mukwenu, kana kuta phánda, kana kunyana, kana kubhana umbangi wa makutu,
19 xila tat’enu ni mam’enu, zola mukwenu kála ki wadizolo eye mwene.”
20 O munzangala wa mu ambela, wixi: “Ngene mu kumbidila kyá o ijila yoso yiyi; ihi dingi ya ngi kambe?”
21 Jezú wa mwambela: “Se wamesena kukala u muthu wayuka,* ndé wa sumbise o jimbote jé. O kitadi u kibhane ku jingadyama, anga ukale ni jimbote ku dyulu, anga wize ni ukale u mukayedi wami.”
22 Mu kwívwa o maka enyá, o munzangala watundu ni kuluwala, mukonda wakexile ni jimbote javulu.
23 Jezú-phe watangela o maxibulu mê, wixi: “Ngi mi ambela o kidi kwila, kyanda bhonza o mvwama kubokona mu Utuminu wa dyulu.
24 Ngi mi ambela dingi kwila, ki kibhonzo o kamelu kubhita bhu kadikungu ka nguya, maji kibhonza dingi phala o mvwama, kubokona mu Utuminu wa Nzambi.
25 Kyoso o maxibulu kyevu o maka enyá, adiwana kyavulu, anga azwela, exi: “Nanyi mwene utena kubhuluka?”
26 Jezú wa atale swí! Anga u atangela, wixi: “O athu amona kwila, ima yiyi ki itena kubhita, maji kwa Nzambi ima yoso itena kubhita.”
27 Phetele anga uzwela, wixi: “Talesa, twa xisa o ima yoso, etu twa kukayela. Ihi-phe itwanda tambula?”
28 Jezú wa atangela, wixi: “Ngi mi ambela o kidi kwila, kyoso o ima yoso kyanda ibhanga ya ubhe, o Mon’a muthu kyanda xikama ku kyandu kyê kya ungana, enu mwa ngi kayela, mwanda xikama ku dikwinyi ni kiyadi kya yandu, phala kufundisa o kwinyi ni kiyadi kya miji ya Izalayele.
29 Woso waxisa mabhata mba jiphange ja mala, mba jiphange ja ahatu, tata, mama, mba ana, mba ibhela, mukonda dya dijina dyami, wanda tambula dingi luhama ni kutambula o mwenyu wakalelaku.
30 “Maji avulu adyanga ene anda sukidila, o asukidila, ene anda dyanga.
Footnotes
^ Mu Ngel.: “ya te mu njungu.”
^ Mu Ngeleku, por·nei′a. Tala o Dilombolwelu.
^ Mu Ngel.: “ala ni ujitu yú.”
^ Mba, “wa tenena.”
