Mukanda ku Akwa Kolose 4:1-18
4 Enu mu jingana, talatalenu o abhik’enu mu ukexilu wambote, wayuka, mu kwijiya kwila enu we mwala ni Ngana yenu ku dyulu.
2 Kolokotenu mu kusamba, mu kubhanga kiki mu aluka ni kusakidila Nzambi.
3 Sulukenu we mu ku tusambela phala Nzambi a tujikwile dibhitu phala kuboka o maka mê, ni tutene kuboka o kikutu kikôla kyalungu ni Kidistu. Eme a ngikutu ni malubhambu mukonda dya kuboka o kikutu kiki.
4 Phala ngitene kuboka mu ukexilu watokala.
5 Mu kudibhana ni athu katokala mu kilunga kwatenu kilunji. Bhangenu ima yambote ni kithangana* kimwala nakyu.
6 O kuzwela kwenu kukale kwa ujitu kwotowe ni môngwa phala mwijiye kyebhi ki mutena kutambwijila woso u m’ibhula kima.
7 Tikiku kamba dyami dya kazola mukunji wa fiyele ni mubhika ni mukwetu mwa Ngana, wanda ku mitudila o njimbu yoso yalungu ni eme.
8 Nga mu mitumikisa nê phala mwijiye kyebhi kitwala, mwene n’a swinise we o mixima yenu.
9 Mwene wanda kwiza kumoxi ni Onézimu phang’yami ya kazola muthu wala fiyele, mwene wala kumoxi ni enu kwenyóko kiyadi kyâ anda mitangela o ima ya mubhita kuku.
10 Adistaku mukwetu ngala-nê mu kaleya, wa mi menekena kumoxi ni Máluku mon’a sekulu a Balanabé (enu mwatambula itendelesu phala kutambulula Máluku se mwene uya ku mikunda),
11 ni Jezú amwixana we Justu. Kitatu kyâ atokala ku athu a asaye. Ene ngó akalakala kumoxi n’eme mu kikalakalu kya Utuminu wa Nzambi, ene, ene mu ngi konda o malamba.*
12 Epafala yó wexile ni enu, mubhika wa Kidistu Jezú wa mi menekena. Mwene wene mu misambela jinga ni nguzu yoso, phala mutenene ni muxikine ni kidi kyoso o vondadi ya Nzambi.
13 Ngala ngi mbangi ya kwila mwene ukalakala kyavulu phala o mbote yenu phala o mbote ya akwa Lawudiseya ni ya akwa Hiyelapoli.
14 Luka kamba dyetu dya muxima, musaki wa jihaxi, ni Demaze, a mi menekena.
15 Tumikisenu o umenekenu wami ku jiphange akwa Lawudiseya, kwa phang’yetu ya muhatu Nifa ni jiphange ene mu dyongeka mu inzo yê.
16 Kyoso ki mwanda tanga o mukanda yú mukilunga kyenu, bhangenu we yoso phala a utange mu kilunga kya akwa Lawudiseya, enu wenu mutanga o mukanda wa akwa Lawudiseya.
17 Tangelenu we Alukipu, mwixi: “Bhanga yoso i utena phala kukumbidila kyambote o ukunji u watambula kwa Ngana.”
18 Yú o umenekenu wami u nga soneka ni maku mami, eme Phawulu. Sulukenu mu kulembalala o malubhambu ungala nawu. O ngalasa ya Nzambi ikale ni enu enyoso.
