Kisumwa Kyalondekesa Kwa Nzwá 3:1-22
3 “O anju ya kilunga kya Salade mu sonekene: O yó wala ni sambwadi dya jinzumbi ja Nzambi ni sambwadi dya jithéthembwa, wambe kiki: ‘Ngejiya o ibhangelu yé, ngejiya we kwila eye wala ni fuma ya* kwila wala ku mwenyu maji mu kidi, eye wafwé kyá.
2 Dilange, swinisa o athu exile phala kufwa, mukonda ngamono kwila eye ki wazubha o ikalakalu yakutumine Nzambi yami phala ku ibhanga.
3 Kyenyiki suluka mu kuxinganeka mu* ima i watambula ni mu ima iwevu, suluka mu ku ibhaka ni udyele o ituxi yé. Se ukamba kudilanga, nganda kwiza kokwé kala kiza o mwiyi. O ola inganda kwiza eye kiwanda kwijiya.
4 “‘Maji sayi athu ala neye mu kilunga kya Salade kaxidisa o izwatu yâ, ene anda kwenda kumoxi n’eme ni izwatu yazele mukonda ene afwama.
5 Woso utolola, wanda zwata izwatu yazele, eme kinganda jima* o dijina dyê mu divulu dya mwenyu, maji nganda kwijidisa o dijina dyê bhupholo ya Tata yami ni bhupholo ya jianju jê.
6 Woso wala ni mátwi, evwe ya muzwela o nzumbi ikôla ku ilunga.’
7 “O anju ya kilunga kya Filadélfya mu sonekene: O muthu ukôla, o muthu wa kidi, yó wala ni sabhi ya Davidi, kyajikula kana muthu utena kujika, o kyajika kana muthu utena kujikula, wambe kiki:
8 ‘Ngejiya o ima iwene mubhanga. Talesa, nga kujikwila dibhitu bhupholo yé, kana muthu utena kudijika. Ngejiya we kwila eye wala ni kanguzu kofele, watumaka o maka mami, eye walondekesa ufiyele mu dijina dyami.
9 Talesa! Nganda bhangesa yó akwa makutu atokala mu dilombe dya Satanaji, ene muzwela kwila Jijudé maji mukidi ki Jijudé, kwiza ni ku mifukamena* ku inama yenu. Nganda kwa ejidisa kwila, ngamizolo.
10 Kuma eye wakumbidila o ima iwevu yalungu ni kukolokota kwami,* eme wami nganda kulanga mu kithangana kya hadi yanda kwiza mu ngongo phala kupolovala o athu oso atungu-mu.
11 Nganda kwiza ni lusolo. Kolokota mu kudikwatenena mu ima i wala nayu, phala ka kutambule o kitundu kyé.
12 “‘Woso utolola, nganda mubhanga philadi* mu tembulu ya Nzambi yami, mwene kanda tundamu. Nganda mu soneka o dijina dya Nzambi yami, ni dijina dya mbanza ya Nzambi yami, o Jeluzaleme ya Ubhe, ituluka ku dyulu kwa Nzambi yami. Eme nganda mu soneka we o dijina dyami dya ubhe.
13 Woso wala ni mátwi, evwe ya muzwela o nzumbi ikôla ku ilunga.’
14 “O anju ya kilunga kya Lawudiseya mu sonekene: Yiyi yene o ima izwela yó amwixana Kyene,* o mbangi ya fiyele ya kidi, o dimatekenu dya ibhangelu ya Nzambi:
15 ‘Ngejiya o ibhangelu yé, ngejiya kwila eye kiwatalala, kiwatema. Nga mesenene kwila utalala mba utema.
16 Maji, kuma eye walabhuka, kiwatema, kiwatalala, nganda kulusa mu kanu dyami.
17 Mukonda eye wambe, wixi: “Ngi mvwama, ngala ni jimbote javulu, ki nga bhindamena kima.” Maji mu kidi kiwala ni kima, watate, u ngadyama, u kafofo, wala ni thuxi.
18 Kyenyiki, ngi kutendelesa kusumba kokwami ulu ya katunda, yabhiti mu túbhya phala ukale umvwama. Sumba we izwatu yazele, ni uzwate, phala ki ukale ni jisonyi ja thuxi yé, sumba we milongo ya mesu ni udiwaye mu mesu mé phala umone.
19 “‘Athu oso nga azolo, ngi abhana itendelesu, ngi abazela. Kyenyiki, kala u muthu waswina, udyele o ituxi yé.
20 Talesenu! Ngemana bhu dibhitu, éme nga mu phupha. Se muthu wívwa o dízwi dyami anga ujikula o dibhitu, eme nganda bokona mu inzo yê ni tuseyale kumoxi.
21 Woso utolola o izukutisu, nganda mwehela kuxikama kumoxi n’eme mu kyandu kyami, kala eme ki ngatolola, eme ngaxikama kumoxi ni Tata yami ku kyandu kyê.
22 Woso wala ni mátwi, evwe ya muzwela o nzumbi ikôla ku ilunga.’”
Footnotes
^ Mba, “dijina dya.”
^ Mba, “lembalala o.”
^ Mba, “katula.”
^ Mba, “kumiximana.”
^ Mba, “wa kayela o phangu yami ya kukolokota.”
^ Mba, “ngunji.”
^ Mba, “Amen, mu dimi dya Ngeleku.”
