Kala Kyasoneka Nzwá 6:1-71
6 Kyoso kyabhiti o ima yiyi, Jezú wa zawuka ku sambwa dya Kalunga ka Ngalileya, ak’exana we Tibeliyade.
2 Mundu wavulu wakexile mu mukayela, mukonda akexile mumona o madiwanu akexile mubhanga mu kusaka o jihaxi.
3 Jezú ni maxibulu mê abande ku mulundu, anga axikama kwenyóko.
4 O Fesa ya Phasu ya Jijudé, ya zukamene kyá.
5 Kyoso Jezú kyabhetula o mesu, wamono mundu wavulu wakexile mukwiza kwa mwene, kyenyiki webhwidisa Filipe, wixi: “Kwebhi ku twandaya mu sumba jimbolo phala o mundu woso yú?”
6 Maji, mwene wazwela kiki phala ku mu polovala, mukonda wejidile o kima kyeji bhanga.
7 Filipe wa mu tambwijila, wixi: “Né mwene se tusumba jimbolo ni hama jiyadi ja madenádyu, kijanda soka phala kala muthu kudya ka mbandu.”
8 Sayi dixibulu dyê, amwixana Mandele, phang’ya Ximá Phetele, wa mwambela:
9 “Bhabha bhwala kamunzangala wala ni mbolo jitanu* ni mbiji jiyadi. O kwila jene janda soka phala o mundu woso yú?”
10 Jezú wambe: “Ambelenu o mundu u xikame.” Bhu kididi bhenyobho bhwakexile yangu yavulu. O athu axikama, exile midi jitanu ja mala.
11 Jezú watambula o jimbolo, wasakidila Nzambi, anga u ji wanena o athu axikamene bhobho. Kyene we kyabhange ni tu mbiji. Athu oso adi, anga ekuta.
12 Kyoso kyekuta, mwene wambela o maxibulu: “Bhongolole-nu o ibhasu ya subhuka, phala ki kutexike kima.”
13 Kyenyiki, abhongolola yasubhukile, anga ezalesa kwinyi ni kiyadi kya inda ni ibhasu yaxisa o athu adile o jimbolo jitanu.
14 Kyoso o mundu kyamono o madiwanu abhangele Jezú, amateka kuzwela, exi: “Yú mwéne o Polofeta akexile mu mukinga kwiza mu ngongo.”
15 Kyoso Jezú kyamono kwila, o athu akexile mukwiza phala ku mwambata ni nguzu ni ku mubhanga sobha, watundu-bhu, yu wayi ubheka wê ku mulundu.
16 Mu usuku, o maxibulu akulumuka ku musanza wa kalunga,
17 anga adilôngo mu ulungu, ya azawuka o musanza mu kuya mu Kafalanawú. O kuma kwavundile kyá, maji Jezú kayile hanji mudisanga nawu.
18 Mu kalunga anga mukala mabhuku a makota, mukonda dya kitembu kya nguzu.
19 Kyoso ene kyendesa o ulungu mu jikilómetulu jitanu mba jisamanu,* amono Jezú kwenda kuthandu a menya ni kuzukama ku ulungu. Ene anga wôma wa akwata.
20 Maji Jezú wa atangela, wixi: “Éme mwéne, ki mukale ni wôma!”
21 Ni kusanguluka, ene a mu tambulula mu ulungu. Mu kithangana kyofele o ulungu wabhixila bhu kididi bhwa mesenene kuya.
22 Mu kizuwa kya mukwá, o mundu waxalele ku sambwa dya kalunga, wa mwene kwila, mwenyomo mwakexile ngó ulungu umoxi wofele, ni kwila Jezú ka dilôngele mu ulungu ni maxibulu mê, o maxibulu ayile ubheka wâ.
23 Maji o mawulungu atundile ku Tibeliyade, azukama bhu kididi bhwa dile o jimbolo, kyoso Ngana kyazubha kusakidila Nzambi.
24 Athu kyamono kwila, Jezú ni maxibulu mê kakexile-bhu, abokona mu mawulungu mâ, anga aya ku Kafalanawú musota Jezú.
25 Kyoso o athu kyasange Jezú ku sambwa dya kalunga, a mu ibhwidisa, exi: “Mesene,* ola yahi i wabhixila bhabha?”
26 Jezú wa tambwijila: “Ni kidi kyoso ngi myambela kwila, enu ki mwa mu ngisota mukonda dya madiwanu u mwamono, maji mukonda mwadi o jimbolo énu mwekuta.
27 Kanenu kukalakela o kudya kubola, maji mukalakela o kudya kunangenena, kubhana o mwenyu wakalelaku. O kudya kuku, kwene kwanda mi bhana o Mon’a muthu, mukonda Nzambi, o Tata, wa mute o kidimbu kyê.”
28 Ene anga a mwibhwidisa: “Ihi i twatokala o kubhanga phala Nzambi ku tu xikina?”
29 Jezú wa atambwijila, wixi: “O kima kyandala Nzambi kyenyiki: Kalenu ni kixikanu kwa yó wa mutumu.”
30 Ene anga a mwibhwidisa: “Madiwanu ahi u wanda bhanga phala tu amone ni tu kuxikine? Ikalakalu yahi i wanda bhanga?
31 O jikuku jetu adile o maná mu kikangalakata, kala kyósoneke: ‘Mwene wa abhana o mbolo yatundu ku dyulu phala kudya.’”
32 Jezú wa atangela: “Ngi myambela ni kidi kyoso kwila, Mozé ka mi bhana o mbolo ya dyulu, maji o Tata yami u mi bhana o mbolo ya kidi, ya dyulu.
33 Mukonda o mbolo ya Nzambi, yoyo itunda ku dyulu, anga ibhana o mwenyu ku mundu.”
34 Ene anga a mwambela, exi: “Ngana, tubhane jinga o mbolo yiyi.”
35 Jezú wa ambela, wixi: “Éme ngi mbolo ya mwenyu, woso wiza kokwami, kanda kala dingi ni nzala, woso u ngi xikana kanda kala dingi ni dinyota.
36 Maji kala ki nga myambela kyá, enu mwa ngi mono mwene, maji ki mwa ngi xikana.
37 Athu oso a ngibhana Tata, anda kwiza kokwami, eme ki nganda dituna yó wiza kokwami,
38 mukonda ki nga tuluka ku dyulu phala kubhanga o vondadi yami, maji phala kubhanga o vondadi ya yó wa ngitumu.
39 O vondadi ya yó wa ngitumu yenyiyi: Ki ku jimbidile muthu kwa yó oso a ngibhana mwene, maji ngi a fukununa mu kizuwa kya suku-ko.
40 Yiyi yene o vondadi ya Tata yami: Woso wijiya o Mona anga u muxikana, akale ni mwenyu wakalelaku, eme ni ngi mu fukunune mu kizuwa kya suka-ku.”
41 O Jijudé amateka ku mu longolola, mukonda mwene wazwelele, wixi: “Éme ngi mbolo yatuluka ku dyulu.”
42 Ene anga amateka kuzwela, exi: “Yú ki mwene Jezú, mon’a Zuze? Etu ki twejiya o jitata jê? Kyebhi-phe kya muzwela kwila, ‘eme nga tuluka ku dyulu’?”
43 Jezú wa avutwila, wixi: “Kanenu kudizuma mudyenu.
44 Sé-ku muthu utena kwiza kokwami, se Tata ukamba ku mu bheka, ni ngi mu fukunune mu kizuwa kya suka-ku.
45 Kyósoneke mu madivulu a Jipolofeta: ‘Ene oso anda kwalonga kwa Jihova.’ Woso wívwa o Tata, anga udilonga kwa mwene, wiza kokwami.
46 Sé-ku muthu wa mwene kyá o Tata, kikale ngó yó watundu kwa Nzambi. Yú mwéne wamono o Tata.
47 Ni kidi kyoso ngi myambela: Woso uxikana, wanda tambula o mwenyu wakalelaku.
48 “Éme ngi mbolo ya mwenyu.
49 O jikuku jenu adile o maná mu kikangalakata, maji afu.
50 Yiyi yene o mbolo yatuluka ku dyulu, phala woso udya ku mbolo yiyi, kafwe.
51 Éme ngi mbolo ya mwenyu yatuluka ku dyulu. Se muthu udya ku mbolo yiyi, wanda kala ni mwenyu wakalelaku. Mu kidi, o mukutu wami wéne o mbolo i nganda bhana phala o athu mu ngongo, atambule o mwenyu.”
52 O Jijudé anga amateka kuzoka mudyâ, exi: “O diyala didi utena kyebhi kutubhana o mukutu wê ni tu udye?”
53 Kyenyiki Jezú wa ambela: “Ni kidi kyoso ngi myambela kwila, se mu kamba kudya o xitu ya Mon’a muthu ni kunwa o manyinga mê, ki mutena kukala ni mwenyu mudyenu.
54 Woso udya o xitu yami ni kunwa o manyinga mami, wala ni mwenyu wakalelaku, eme ngi mu fukununa mu kizuwa kya suka-ku.
55 Mukonda o xitu yami kudya kwa kidi, o manyinga mami kunwa kwa kidi.
56 Woso udya o xitu yami ni kunwa o manyinga mami, mwene unangenena kumoxi n’eme, eme we ngi kala kumoxi ni mwene.
57 Kala o Tata wene ku mwenyu wa ngi tumikisa, eme ngala ku mwenyu mukonda dya Tata, woso we udya o xitu yami, wanda kala ku mwenyu mukonda dyami-eme.
58 Yiyi yene o mbolo yatuluka ku dyulu. Ki ya difwangana ni yadile o jikuku jenu, maji né kiki afu. Woso udya ku mbolo yiyi, wanda kala ni mwenyu wakalelaku.”
59 Mwene wazwela o ima yiyi, kyoso kyakexile mulonga mu dilombe* mu Kafalanawú.
60 Kyazubha kwívwa o maka yá, maxibulu avulu ambe, exi: “O izwelu yiyi yabhonzo kyavulu! Nanyi utena ku ixikina?”
61 Kyoso Jezú kyamono kwila o maxibulu akexile mu dizuma mukonda dya maka yá, wa a ebhwidisa, wixi: “Maka yá a mi bhangesa kudibhala?*
62 Ihi yanda bhita se mutala o Mon’a muthu kubanda kwakexile?
63 O nzumbi yéne ibhana o mwenyu, o mukutu ki wala ni valolo. O maka u nga mitangela, nzumbi ni mwenyu.
64 Maji sayi athu mudyenu kaxikina.” Mukonda tunde ku dimatekenu Jezú wejidile o athu akambele o kixikanu, ni yó weji ku mu sumbisa.
65 Mwene wambe dingi, wixi: “Kyene ki nga mitangela kwila, sé-ku muthu u tena kwiza kokwami, kikale ngó se o Tata wamesena ku mubheka.”
66 Mukonda dya kiki, maxibulu avulu avutuka ku ima yaxisa kudima. Ene kakexile dingi kwenda ni mwene.
67 Kyenyiki, Jezú webhwidisa o kwinyi ni kiyadi kya jipoxolo, wixi: “O kwila enu we mwa mesena kuvutuka?”
68 Ximá Phetele wa mu tambwijila: “Ngana, twanda vutuka kwa nanyi? Éye wala ni maka a mwenyu wakalelaku.
69 Etu twaxikana, twa k’ijiya we kwila, éye u Muthu Ukôla a kutumikisa kwa Nzambi.”
70 Jezú wa atangela, wixi: “Eme nga misolo, enu mu kwinyi ni kiyadi kya jipoxolo. Maji sayi muthu mudyenu wala kala dyabhu.”*
71 Mu kidi, mwene wakexile mu zwela yalungu ni Juda mon’a Ximá dya Kadyota, mukonda o diyala didi weji mu sumbisa, sumbala watokalele ku kwinyi ni kiyadi kya jipoxolo.
Footnotes
^ O jimbolo jo tange bhabha, akexile mu ji bhanga ni sevada.
^ Mu Ngel.: “25 mba 30 a jistádyu.”
^ Mu Ngel.: “Labi.”
^ Mba, “kididi kya ubhezelu.”
^ Mba, “kutexi o kixikanu kyenu?”
^ O kizwelu dyabhu mu Ngeleku, kya lungu ni muthu u xidisa o dijina dyambote dya muthu wengi.
