Ku Akwa Ngalásya 5:1-26
5 Kidistu wa tubhulula phala ni tukale ni ufôlo. Mu kyenyiki swinenu, ki muxikine dingi kukala mu abhika.
2 Ivwenu! Eme Phawulu, ngi myambela kwila se a mi saya, ki mwanda katula mbote mu sata ya Kidistu.
3 Ngi myambela dingi kwila, woso a musaye, watokala kukumbidila o Kijila kyoso.
4 Se musota kudilondekesa kwila mu athu ayuka bhukaxi ka Kijila, mwa mu disandula kwa Kidistu. Mu kubhanga kiki, ki mwanda tambula o ngalasa yê.
5 Etu twa mu kingila ni hanji yoso o kuyuka kwa tukanena, kwijila bhukaxi ka nzumbi ikôla ni bhukaxi ka kixikanu kyetu.
6 Mukonda mwa Kidistu Jezú, o kusaya ni kukamba o kusaya kikwala ni valolo, maji o kima kyala ni valolo o kixikanu kijila mukonda dya henda.
7 Enu mwa kexile mu kwenda kyambote. Nanyi wa mi fidisa kukayela o ulongelu wa kidi?
8 O kifunyisu kiki ki kyatundu kwa Nzambi, Yó wa m’ixana.
9 Felemendu yofele ifutununa o fuba yoso ya tiliku yofunge ni menya.
10 Nga dyelela kwila enu mwala kumoxi ni Ngana ki mwanda kala ni kibanzelu kyengi, maji muthu woso-woso u mizukutisa, wanda tambula o kaxtiku ka mutokala.
11 Phange jami, se eme nga muboka hanji yalungu ni kusaya, mukonda dyahi-phe a mu ngi zukutisa? Mu kyenyiki-phe, o ulongelu wami walungu ni kufwa kwa Jezú ku taka,* ki watokala dingi kubhangesa o athu kudivwa kyayibha.
12 Nga mesenene kwila o yó a mu mibhinga phala ku misaya, adisaye mwene ene mudyâ.*
13 Phange jami, enu a m’ixana phala mukale ni ufôlo. Maji kanenu kubhanga o jihanji jenu ja xitu mukonda dya ufôlo u mwa tambula. Muveji dya kiki, bhukaxi ka henda, kalakalenu kala mu abhika phala o jiphange jenu.
14 Mukonda o Kijila kyoso kidikumbidila* mu kitumu kimoxi: “Zola mukwenu kala ki wadizolo eye mwene.”
15 Maji se mu suluka ni kubhânga mudyenu, dilangyenu phala ki mu dibwikise mudyenu.
16 Maji ngi myambela kwila: Ehelenu o nzumbi ya Nzambi ku mi endesa, phala ki mubhange o ima ya xitu.
17 Mukonda o jihânji jayibha ja dizembe ni nzumbi ya Nzambi, o nzumbi ya Nzambi ya dizembe we ni jihânji jayibha. Kiki kyene kibhangesa kwila, enu ki mutena kubhanga o ima i mwa mesena.
18 Kyenyiki-phe se a mu mi endesa kwala o nzumbi ikôla, kimwala dingi bhoxi dya Kijila.
19 O ibhangelu ya xitu atena ku imona. Yeniyi: O undumbu,* ufusa, uhabhu,*
20 ubhezelu wa iteka, wanga,* kudizemba, kuzoka, difuba, njinda, kukamba kuditendela, ku dimwangununa, kukayela o ilongesu yayibha ya athu,
21 lwimbi, uhôlwa, jifesa jayibha, ni ima kala yiyi. Nga mu midimuna mu ima yiyi, kala ki nga twamene kyá ku midimuna: Woso ubhanga o ima yiyi, kanda lundula o Utuminu wa Nzambi.
22 Maji o ibundu ya nzumbi yenyiyi: O henda, kusanguluka, paze, mwanyu, kulenduka, kubhanga o mbote, kixikanu,
23 kubatâma, ni kuditumina jihânji. Sé-ku kijila kifidisa o ima yiyi.
24 Kyenyiki, oso atokala kwa Kidistu Jezú, o xitu ni jihanji jê jayibha a i phaphela kyá ku taka.*
25 Se a mu twendesa ku nzumbi ya Nzambi, twehele o nzumbi yiyi ku twendesa jinga.
26 Ki tukale tu akwa lwimbi, mu kufunyisa akwetu phala kudisokesa ni akwâ, ni kudikwatela difuba.
Footnotes
^ Tala o Dilombolwelu.
^ Mu Ngel.: “a di katule o an’a sonyi.”
^ Mba Nange, “kya tenena.”
^ Mu Ngeleku, porneía. Tala o Dilombolwelu.
^ Mu Ngeleku, asélgeia. Tala o Dilombolwelu.
^ Tala o Dilombolwelu.
^ Tala o Dilombolwelu.
