Ku Akwa Ngalásya 3:1-29
-
O ima yósoneke mu Kijila ki yasoko ni kukala ni kixikanu (1-14)
-
O muthu wayuka wa ka mwena o mwenyu mu kixikanu kyê (11)
-
-
Nzambi ka bhangele o kikanenu kwa Mbalahamu bhukaxi ka Kijila (15-18)
-
Kidistu mbutu ya Mbalahamu (16)
-
-
Kwebhi kwatundu o Kijila ni mukonda dyahi akibhange (19-25)
-
An’â Nzambi, mukonda dya kixikanu (26-29)
-
O mbutu ya Mbalahamu, yó atokala kwa Kidistu (29)
-
3 Enu mu akwa Ngalásya mwa tobho! Enu a mi jimbulwila kyambote o kufwa kwa Jezú Kidistu ku taka.* Nanyi-phe wa mi funyisa kubhanga o ima yiyi yayibha?
2 Nga mesena ku m’ibhwidisa kima:* O kwila enu mwa tambula o nzumbi ikôla mukonda dya ima yosoneke mu Kijila inga mukonda dya kixikanu kyenu mu ima i mwevu?
3 Mukonda dyahi enu mwa tobho kiki? Enu a mu myendesa kwala o nzumbi ikôla, o kwila mwa mesena kukayela o ixinganeku ya athu?
4 O kwila o hadi yoso i mwa tale, mwa itale mu kingoho? Ngejiya kwila ki mwa itale mu kingoho.
5 Kyenyiki, o kwila o yó u mibhana o nzumbi ikôla, anga ubhanga madiwanu mwaxaxi kenu, u kibhanga mukonda mwa mu tumaka o ima yosoneke mu Kijila, inga mukonda dya kixikanu kyenu mu ima i mwevu?
6 Kyene kyabhiti ni Mbalahamu: “Mwene wa londekesa kixikanu kwa Jihova, mukonda dya kiki, a mu mono kala muthu wayuka.”
7 Enu mwejiya kwila, o yó ala ni kixikanu, éne o an’â Mbalahamu.
8 Bhukaxi ka Mikanda Ikôla Nzambi wambele kwa Mbalahamu kwila, weji mona akwa jixi jengi kala athu ayuka bhukaxi ka kixikanu kyâ. Mwene wambe dingi, wixi: “Bhukaxi ké, o ifuxi yoso yanda tambula mabesá.”
9 Kyenyiki, oso ala ni kixikanu a abesowala kumoxi ni Mbalahamu, yó wexile we ni kixikanu.
10 Oso adyelela ngó mu ima yosoneke mu Kijila, anda tambula kaxtiku. Mukonda kyosoneke kwila: “Muthu woso u bhukumukina jinga o ima yosoneke mu Kijila atokala ku mu kaxtikala.”
11 Twejiya we kwila Nzambi kamono o muthu kala wayuka mu kukayela o ima yosoneke mu Kijila. Mukonda “o muthu wayuka wanda bhuluka mukonda dya kixikanu kyê.”
12 O muthu phala kukayela o Kijila kabhingi kukala ni kixikanu. Kuma kyosoneke mu Mikanda ikôla: “Woso ubhanga o ima yayuka, wanda tambula o mwenyu.”
13 Kidistu wa tusumbu, yu wa tubhulula kudilebhu dya Kijila mu ku dibhanga dilebhu bhu kididi kyetu, mukonda kyosoneke mu Mikanda Ikôla, exi: “Muthu woso a mu nyenga ku taka,* a mu bhubhidila.”
14 Kiki kya bhiti phala o mabesá akanene Nzambi kwa Mbalahamu, abhixile ku ifuxi yoso bhukaxi ka Kidistu Jezú, phala bhukaxi ka kixikanu kyetu tutambule o nzumbi ikôla ya kanene Nzambi.
15 Jiphange jami, mu kuzwela ni enu, nga mu zwela mu ukexilu atena ku utendela ku athu: Se kikutu a kixikina né mwene ku muthu umoxi, sé-ku muthu utena ku ki jimuna mba kubandekesa-ku kima.
16 Mu kidi o ikanenu a ibhangele kwa Mbalahamu ni ku mbutu yê. O Mikanda Ikôla ki yambe kwila, “ku jimbutu jé,” kala javulu. Muveji dya kiki, yene yambe: “Ku mbutu yé,” mu kulondekesa kwila muthu umoxi ngó, mwene Kidistu.
17 Ngi myambela dingi kwila: Nzambi wadyangele kuta kikutu ni athu, kyoso kyabhiti hama jiwana ni makwinyi atatu a mivu, mwene wabhele o Kijila, maji o Kijila ki kya jimuna o kikutu, ki kya bhwisa we o kikanenu kya bhangele mwene.
18 Mukonda se Nzambi wabhanene o undundu bhukaxi ka Kijila, o undundu kiweji kwiza dingi bhukaxi ka kikanenu. Maji ni henda yoso Nzambi wabhana o undundu yú kwa Mbalahamu bhukaxi ka kikanenu.
19 Mukonda dyahi Nzambi wabhana o Kijila? Mwene wa kibhana phala kwijidisa o itondalu ya athu, katé kyeji bhixila o mbutu a mubhangele o kikanenu. O jianju jene ja tudila o kikanenu kiki bhukaxi ka muthu a musolo kala mukunji.
20 Se muthu umoxi ubhanga o kikanenu, ki kwabhingi dingi mukunji. Kyene we kyabhiti ni Nzambi kyoso kyabhange o kikanenu.
21 O kwila o Kijila kya dizembe ni ikanenu ya Nzambi? Kana ngana! Se abhele Kijila kitena kubhana mwenyu, Nzambi weji tumona kala tu athu ayuka mukonda dya kutumaka o Kijila.
22 Maji o Mikanda Ikôla yambe kwila, o athu a ajikila bhoxi dya kutena kwa kituxi, phala o kikanenu kijila mukonda dya kukala ni kixikanu kwa Jezú Kidistu, a kibhana kwa yó axikana.
23 Mu kyenyiki ande dya kubhixila o kixikanu kya kidi, a tubhakele bhoxi dya Kijila, mu kukingila o kixikanu kyeji tukuluka.
24 O Kijila kya dibhange kiledi* kyetu kya tulange katé kyeza Kidistu, phala bhukaxi ka kixikanu a tumone kala tu athu ayuka.
25 Kuma o kixikanu kya kidi kyeza kyá, ki twa bhindamena dingi kiledi.*
26 Mu kidi enu enyoso mu an’â Nzambi, mukonda dya kixikanu kyenu mwa Kidistu Jezú.
27 Kuma a mi batizala mwa Kidistu, enu mwala ni idifwa ya Kidistu.
28 Mukonda mwa Kidistu Jezú kimwala dingi katombo ka Judé mba Ngeleku, mubhika mba muthu wala ni ufôlo, diyala mba muhatu, mukonda enu enyoso mwala umoxi ngó.
29 Mu kiki-phe se mwa tokala kwa Kidistu mwala mu mbutu ya Mbalahamu, mwanda tambula o undundu wakanena Nzambi.
Footnotes
^ Tala o Dilombolwelu.
^ Mu Ngel.: “nga mesena mu ngi longa kima.”
^ Tala o Dilombolwelu.
^ Mba, “mulangi wetu.”
^ Mba, “mulangi.”
