Mukanda wa Phetele 4:1-19
4 Kuma Kidistu watale hadi mu xitu, enu wenu kalenu we polondo kala mwene, mukonda woso utala hadi mu xitu watolola o kituxi,
2 phala o thembu yanda nangenena mu ixi,* ki ikale dingi phala kubhanga o jihânji ja xitu, maji phala kubhanga o vondadi ya Nzambi.
3 Kuma o thembu yabhiti-ku ya kubhanga o vondadi ya athu kejiya Nzambi yamisoko kyá, kyoso ki mwaditele mu uhabhu,* mu jihânji jayibha, mu uhôlwa, mu jifesa jayibha, mu kunwa kyavulu ni kubheza o iteka.
4 Ene adiwana mukonda enu ki mwasuluka mukwenda nawu mu ukexilu wâ wayibha. Mukonda dya kiki, ene amizwela kyayibha.
5 Maji o athu enyá anda bhakula jikonda kwa yó wanda fundisa o athu ala ku mwenyu ni madifundu.
6 Mukonda dya kiki o njimbu yambote a itudila we ku madifundu, sumbala ene a afundisa mu ukexilu ufundisa o athu, phala bhu pholo ya Nzambi ene akale ku mwenyu.
7 Maji o dizubhilu dya ima yoso dya zukama. Kyenyiki-phe kalenu ni kilunji, kalenu kumesu azele,* mwenda ni kusamba jinga.
8 Mu ima yoso o henda yenu mudyenu ivule, mukonda o henda isweka nzungule dya ituxi.
9 Ditambululyenu* mudyenu sé kudikalanganza.
10 Kuma kala muthu mudyetu watambula uhete, akalakale nawu phala kusidivila akwâ kala selevende ya ngalasa ya Nzambi yolondekese mu maukexilu avulu.
11 Woso uzwela, azwele kala muthu uzwela o njimbu ya Nzambi. Woso usidivila, asidivile mu kudyelela mu kutena kubhana Nzambi phala mu ima yoso Nzambi a mu jingise bhukaxi ka Jezú Kidistu. O kijingu ni kutena kwa mutokala katé ku hádya ni hádya. Kyene!*
12 Enu akwetu jiphange jami jakazola, kanenu kudiwana ni ibhidi ya makota i mwa mudibhana nayu kala kima kya ubhe ki mwa mudibhana nakyu.
13 Maji-phe, kolokotenu mu kusanguluka kyoso ki muya ni kubhita mu jiphaxi jabhiti naju Kidistu, phala mu zediwe ni mwizale ni kusanguluka kyoso kyanda tukuluka o fuma yê.
14 Se a mu milokalala mukonda dya dijina dya Kidistu, mwazediwa, mukonda o nzumbi ya fuma, o nzumbi ya Nzambi yatula kuthandu dyenu.
15 Maji kibhukale muthu mudyenu utala hadi mukonda dya kukala kijibhangânga, mwiyi, muthu wayibha mba mukwa kudita mu maka angene.
16 Maji se muthu a mutalesa hadi mukonda dya kukala Kidistá, kabhingi kukala ni jisonyi maji akolokote mu kujingisa Nzambi mu kwambata o dijina didi.
17 Mukonda kiki kyene o kithangana kyoxinde kya kumateka kufundisa yó atokala ku inzo ya Nzambi. Kyenyiki, se o kufundisa kwanda mateka ni etu, ihi-phe yanda bhita ni yó ka belesela o njimbu yambote ya Nzambi?
18 “Se kyabhonzo kubhulula o muthu wayuka, ihi-phe yanda bhita ku mukwa phulu ni ku mukwa ituxi?”
19 Kyenyiki, oso amutala hadi mukonda dya kubhanga o vondadi ya Nzambi, adibhakula phala kwalanga ku Mubhangi wafiyele kyoso ene kyaya ni kubhanga o mbote.
Footnotes
^ Mu Ngel.: “o thembu yanda nangenena muxitu.”
^ Mu Ngeleku, asélgeia. Tala o Dilombolwelu.
^ Mba, “dilangyenu.”
^ Mba, “mudizalela.”
^ Mba, “Amen, mu dimi dya Ngeleku.”
