មនុស្សជាច្រើនទៀតក៏មានអារម្មណ៍ស្រដៀងនឹងគ្រិស្ដតូហ្វើ ហាណា និងជីណាដែរ។ ពួកគេជឿជាក់ថា ព្រះចាត់ទុកពួកគេជាមិត្ដរបស់លោក។ ចុះលោកអ្នកវិញ? តើលោកអ្នកមានអារម្មណ៍ថាខ្លួនមានមិត្ដភាពជាមួយនឹងព្រះទេ? តើលោកអ្នកចង់មានមិត្ដភាពជិតស្និទ្ធជាងជាមួយនឹងព្រះឬទេ? លោកអ្នកប្រហែលជាឆ្ងល់ថា ‹តើមនុស្សពិតជាអាចមានមិត្ដភាពជិតស្និទ្ធជាមួយនឹងព្រះដែលមានឫទ្ធានុភាពខ្លាំងក្លាបំផុតមែនឬ? បើមែន តើតាមរបៀបណា?›។

គម្ពីរប្រាប់ថា មនុស្សអាចមានមិត្ដភាពជិតស្និទ្ធជាមួយនឹងព្រះបាន។ គម្ពីរចែងថា ព្រះបានចាត់ទុកអាប្រាហាំដែលជាបុព្វបុរសរបស់ជនជាតិហេប្រឺថាជា«សំឡាញ់»របស់លោក។ (អេសាយ ៤១:៨) ម្យ៉ាងទៀត សូមកត់សម្គាល់នូវសេចក្ដីអញ្ជើញយ៉ាងកក់ក្ដៅមួយដែលបានត្រូវកត់ទុកនៅយ៉ាកុប ៤:៨ ថា៖ «ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។ ដូច្នេះ នេះបញ្ជាក់យ៉ាងច្បាស់ថា លោកអ្នកពិតជាអាចមានមិត្ដភាពជិតស្និទ្ធជាមួយនឹងព្រះបាន។ ប៉ុន្ដែ យើងមើលព្រះមិនឃើញទេ តើលោកអ្នកអាច«ចូលទៅជិត»ព្រះ ហើយមានមិត្ដភាពល្អជាមួយនឹងលោកយ៉ាងដូចម្ដេច?

ដើម្បីឆ្លើយសំណួរនេះ សូមលោកអ្នកគិតអំពីរឿងនេះ ដើម្បីឲ្យមនុស្សម្នាក់មានមិត្ដភាពជាមួយនឹងមនុស្សម្នាក់ទៀត តើពួកគេត្រូវធ្វើអ្វីខ្លះ? មុនដំបូង ពួកគេត្រូវស្គាល់ឈ្មោះគ្នាសិន។ បន្ទាប់មក ពេលពួកគេប្រស្រ័យទាក់ទងគ្នា ហើយប្រាប់អំពីគំនិតនិងអារម្មណ៍ចំពោះគ្នា នោះមិត្ដភាពរបស់ពួកគេនឹងរឹងមាំឡើង។ បន្ថែមទៅទៀត នៅពេលពួកគេធ្វើអ្វីៗសម្រាប់គ្នា នោះមិត្ដភាពរបស់ពួកគេនឹងកាន់តែមាំមួន។ ស្រដៀងគ្នាដែរ លោកអ្នកក៏ត្រូវធ្វើដូច្នេះដើម្បីឲ្យមានមិត្ដភាពជាមួយនឹងព្រះដែរ។ សូមឲ្យយើងពិចារណាអំពីរបៀបដែលយើងអាចមានមិត្ដភាពជាមួយនឹងព្រះ។