ពេលជួបមហន្តរាយធម្មជាតិ
បើអ្នកធ្លាប់រួចជីវិតពីគ្រោះមហន្តរាយ អ្នកប្រហែលជាអាចយល់អារម្មណ៍របស់អ្នកឯទៀតដែលបានរួចជីវិត ដូចជា៖ តក់ស្លុត ពិបាកជឿ ភាន់ភាំង តានតឹងចិត្ត និងសុបិនអាក្រក់។ មនុស្សជាច្រើនអស់កម្លាំងកាយកម្លាំងចិត្ត បានជាពួកគេមានអារម្មណ៍ថាមិនចង់រស់តទៅទៀតទេ។
បើអ្នកបានបាត់បង់អ្វីៗទាំងអស់ដោយសារតែមហន្តរាយ អ្នកក៏ប្រហែលជាមានអារម្មណ៍ថាអ្នកមិនអាចស៊ូទ្រាំតទៅទៀតបានដែរ។ អ្នកប្រហែលជាថែមទាំងចាប់ផ្ដើមមានអារម្មណ៍ថា តើអ្នករស់នៅមានន័យអ្វី? ទោះជាយ៉ាងនេះក្ដី គម្ពីរពន្យល់ថាមានមូលហេតុផ្សេងៗដែលអាចធ្វើឲ្យអ្នកចង់បន្តរស់នៅ ហើយថាអ្នកអាចមានមូលហេតុត្រឹមត្រូវដើម្បីមានសេចក្ដីសង្ឃឹមអំពីអនាគតដ៏ប្រសើរ។
សេចក្ដីពិតក្នុងគម្ពីរផ្ដល់ឲ្យយើងនូវសេចក្ដីសង្ឃឹម
សៀវភៅអ្នកទូន្មាន ៧:៨ ចែងថា៖ «ពេលបញ្ចប់ប្រសើរជាងពេលចាប់ផ្ដើម»។ ក្រោយពីមហន្តរាយ ជីវិតរបស់អ្នកប្រហែលជាមើលទៅអស់សង្ឃឹម។ ក៏ប៉ុន្តែ កាលដែលអ្នកព្យាយាមធ្វើឲ្យជីវិតរបស់អ្នកទៅជាធម្មតាវិញ នោះអ្វីៗនឹងអាចប្រសើរឡើងបាន។
គម្ពីរប្រាប់ទុកជាមុនអំពីគ្រាមួយដែល«គ្មានសម្រែកទ្រហោយំឬការស្រែកកើតទុក្ខទៀតឡើយ»។ (អេសាយ ៦៥:១៩) នេះនឹងក្លាយជាការពិតពេលផែនដីទៅជាសួនឧទ្យានក្រោមរាជាណាចក្រព្រះ។ (ចម្រៀងសរសើរព្រះ ៣៧:១១, ២៩) មហន្តរាយធម្មជាតិនឹងលែងមានទៀត។ ទុក្ខសោកនិងការនឹកចាំដែលនាំឲ្យឈឺចាប់ នឹងលែងមានជារៀងរហូត ពីព្រោះព្រះដែលមានឫទ្ធានុភាពខ្លាំងក្លាបំផុតសន្យាថា៖ «អ្វីៗដែលធ្លាប់កើតឡើងពីមុន នឹងគ្មាននរណានឹកឃើញទៀតទេ ហើយក៏មិនចងចាំនៅក្នុងចិត្តទៀតដែរ»។—អេសាយ ៦៥:១៧
សូមគិត៖ អ្នកបង្កើត«ចង់ឲ្យអ្នករាល់គ្នាមានសេចក្ដីសង្ឃឹមនិងអនាគតល្អប្រសើរ» ពោលគឺជីវិតដ៏សុខសាន្តក្រោមការគ្រប់គ្រងដ៏ល្អឥតខ្ចោះរបស់ព្រះ។ (យេរេមា ២៩:១១) បើអ្នកដឹងអំពីសេចក្ដីពិតនេះ តើនេះពិតជាអាចជួយអ្នកឲ្យបន្តរស់នៅឬទេ? សាលីដែលបានត្រូវរៀបរាប់នៅអត្ថបទដំបូង និយាយថា៖ «ពេលរំលឹកខ្លួនឯងអំពីអ្វីដ៏អស្ចារ្យទាំងអស់ដែលរាជាណាចក្រព្រះនឹងធ្វើសម្រាប់យើងនៅថ្ងៃអនាគត នោះអាចជួយយើងឲ្យឈប់គិតអំពីអតីតកាល ហើយប្រឈមមុខនឹងបច្ចុប្បន្នកាល»។
តើអ្នកចង់ដឹងថែមទៀតអំពីអ្វីដែលរាជាណាចក្រព្រះនឹងធ្វើសម្រាប់មនុស្សជាតិនៅពេលឆាប់ៗខាងមុខនេះឬទេ? ការធ្វើដូច្នេះអាចពង្រឹងទំនុកចិត្តរបស់អ្នកថាទោះជាអ្នកបានរងទុក្ខពីមហន្តរាយក្ដី អ្នកមានហេតុបន្តរស់នៅដោយទន្ទឹងរង់ចាំថ្ងៃអនាគតដែលលែងមានគ្រោះមហន្តរាយទៀត។ ដំណាលគ្នាដែរ គម្ពីរផ្ដល់ការណែនាំដែលអាចជួយអ្នកឲ្យយកឈ្នះការពិបាកក្រោយពីមានមហន្តរាយ។ សូមពិចារណាការណែនាំខ្លះៗ។