Lukkarsi 22:1-71
-
Palasit Jiisusip toqunnissaa pilersaarusiulerpaat (1-6)
-
Qaangiiffimmut kingullermut piareersaaneq (7-13)
-
Naalakkap unnukkorsiortitsineranik atuutilersitsineq (14-20)
-
‘Akeqqanut pisitsisussara issiaqatigaara’ (21-23)
-
Ilinniartitat kina annerunersoq assortuussutigigaat (24-27)
-
Jiisusip kunngeqarfik pillugu isumaqatigiissuteqarnera (28-30)
-
Petrusip naluneraanissaa pillugu siulittuut (31-34)
-
Piareersimasariaqarneq; panat marluk (35-38)
-
Jiisusip Qaqqami Oliivenequtilimmi qinunera (39-46)
-
Jiisusip tigusaanera (47-53)
-
Petrusip Jiisusimik naluneraanera (54-62)
-
Jiisusip illaruaatigineqarnera (63-65)
-
Juutit eqqartuussiviisa qullersaannut sassartinneqarnera (66-71)
22 Maanna ullut iffiamik-qaqortumik* seernarsaateqanngitsumik neriffiusartut nalliussineqarnissaat, tassa qaangiiffimmik* taaneqartartoq, nalliutingajalerpoq.
2 Aamma palasit nuimasut allakkanillu ilisimasut inuppassuit siooragigamikkit Jiisusi qanorpiaq toqussallugu pilersaarusiulerpaat.
3 Taava Saatanip Juudarsi, Iskaariuutimik taaneqartartoq aqqaneq-marluk ilaat, sunnerpaa.
4 Juudarsillu palasit nuimasut guutisiorfimmilu nakkutilliisut naalagaat ornippai Jiisusi taakkununnga qanoq pisissanerlugu oqaloqatigiumallugit.
5 Tamanna nuannaarutigaat isumaqatigiillutillu aningaasanik sølvinik tuniniarlugu.
6 Tamanna akueraa inuppassuillu najuutsinnagit akeqqanut pisinnissaanut periarfissarsiulerluni.
7 Maanna ulluni iffiamik-qaqortumik seernarsaateqanngitsumik neriffiusartuni qaangiiffimmi uumasumik nerineqartussamik toqutsiffissaq nalliuppoq.
8 Jiisusip Petrusi Johannesilu oqarfigai: “Qaangiiffimmi unnukkorsiutissagut piareersariartorsigit.”
9 Aperaat: “Sumut piareersaajartussaagut?”
10 Akivai: “Illoqarfimmut iserussi angutip marrarmik imiisiviliamik ersuttup naapissavaasi. Taanna illumut iserfianut malissavarsi.
11 Illumillu piginnittoq oqarfigissavarsi: ‘Ilinniartitsisoq ilinnut oqaqqusivoq: “Tikeraat inigisartagaat qaangiiffimmi ilinniartitakka ilagalugit unnukkorsiorfigisinnaasara naak?”’
12 Taassumalu ini qulleq angisooq pequtsersoreersimasoq takutissavaa. Tassani piareersaassaasi.”
13 Taava ingerlammata oqarsimaneratorluinnaq pisoqarpoq, qaangiiffiullu nalliussinissaanut piareersaapput.
14 Piffissanngormat apustilini nerisarfimmi issiaqatigai.
15 Oqarfigaalu: “Naalliunnginninni qaangiiffimmi unnukkorsioqatiginissarsi assut qilanaarisimavara.
16 Oqarfigaassimi: Tamatumunnga tunngasut tamarmik Guutip kunngeqarfiani eqquunnissaasa tungaannut unnukkorsiutit nereqqissanngilakka.”
17 Imerfimmillu tunineqarami Guutimut qujavoq imalu oqarluni: “Una imeriarlugu tullissinnut ingerlateqqissiuk.
18 Oqarfigaassimi: Maannamiit Guutip kunngeqarfiata tikiunnissaata tungaanut viinnequtip inerittuanik imeqqissanngilanga.”
19 Aamma iffiaq-qaqortoq tiguaa, Guutimullu qujariarluni aggoramiuk taakkununnga tunniuppaa oqarfigalugillu: “Taanna timinnut, ilissi pillusi pilliutigineqartussamut, assersuutaavoq. Taamaaliortuaritsi eqqaaniarlunga.”
20 Unnukkorsioreeramik imerfik tigoriarlugu aamma taamaaliorpoq oqarlunilu: “Imerfik taanna uanga aannut ilissi pillusi kuineqartussamut, isumaqatigiissummik* nutaamik atuutsitsilersussamut, assersuutaavoq.
21 Akeqqanulli pisitsisussara issiaqatigaara.
22 Inuummi Ernera aalajangerneqarsimasut naapertorlugit qimagutissaaq, taassuminngali akeqqanut pisitsisoq perloqqusaassaaq!”
23 Taava kina arlartik taama ajortigisumik iliuuseqassanersoq oqallisigilerpaat.
24 Aammali kina arlartik annerunersoq assortuussutigilerpaat.
25 Oqarfigaali: “Inuiaqatigiinni kunngit naalagaaniartarput pissaanillillu ajunngitsuliortinik taaguuteqartinneqartarlutik.
26 Ilissi taamaassanngilasi. Akorngassinnili annerusoq nukarlertut issaaq siulersuisuusorlu kiffartortutut issalluni.
27 Kinami annerua: Nerisoq saqisorluunniit? Ilaa nerisoq? Akorngassinnili saqisutut ippunga.
28 Ilissili misilinneqarninni najortuarpassinga.
29 Soorlu Ataatama isumaqatigiissuteqarfigigaanga,* taamatuttaaq kunngeqarfik pillugu isumaqatigiissuteqarfigaassi,*
30 taamaalillusi kunngeqarfinni nerillusilu imerniassagassi Israalillu naggueqatigiivi aqqaneq-marluk eqqartuunniarlugit issiavissaarsuarni issianiassagassi.
31 Siimuut, Siimuut! Saatanip karrit kanaartanit immikkoortiterneqartarnerattut aalaterneqarnissarsi piumasaraa.
32 Qamanngali pisumik qinnuppakkit upperunnaaqqunak, uannulli uteruit qatanngutitit nakussatsikkigit.”
33 Taava oqarfigaa: “Naalagaq, parnaarussaaqatiginissannut toqoqatiginissannullu piareersimavunga.”
34 Jiisusilli oqarfigaa: “Petrusi, oqarfigaakkit: Ullumi kukkukooq angutiviaq qarlortinnagu pingasoriarlutit nalunerassavarma.”
35 Aamma aperai: “Aningaasivimmik, taquaasivimmik aloqutissamaatissassinnillu nassartinnasi aallartikkassi ilaa sumilluunniit amigaateqanngilasi?” Akipput: “Aap!”
36 Taava oqarfigai: “Aningaasiveqarussili taquaasiveqarlusilu tigusigit, panaqanngikkussilu qallersaatersi tuniniarsiuk panamillu pisillusi.
37 Oqarfigaassimi: Uanga pillunga allassimasut uku eqquuttariaqarput: ‘Inatsisaatsutut naatsorsuunneqarpoq.’ Oqaatsimmi taakku maanna uannut eqquupput.”
38 Taava oqarput: “Naalagaq, aajuku panat marluk.” Oqarfigai: “Naammapput.”
39 Pisarnermisut Qaqqamut Oliivenequtilimmukarpoq, ilinniartitaasalu malippaat.
40 Tassunga pigamik oqarfigai: “Ussernartumut nakkaannaqqunasi qinujuaritsi.”
41 Ujaqqamillu naloriussinertut ungasitsigipajaartumut qimaguteriarluni seeqqummerpoq imalu qinulerluni:
42 “Ataata, piumaguit imerfik* una uannit peeruk. Uangali piumasara pinnani illit piumasat pili.”
43 Taava inngilip saqqummerfigaa nakussatsillugulu.
44 Jiisusili isumatsaqqangaarami suli qamannga pisumik qinunerulerpoq, kiagunnerilu aattut illutik nunamut kuserput.
45 Qinoreerluni ilinniartitat ornikkamigit aliasunnermik qasuuillutik najangartut takuai.
46 Oqarfigai: “Sooq sinippisi? Ussernartumut nakkaannaqqunasi makillusi qinujuaritsi.”
47 Suli oqalutsillugu inuppassuit angut aqqaneq-marluk ilaat Juudarsimik taaneqartartoq siulersortigalugu takkupput, Juudarsillu Jiisusi kuninniarlugu ornippaa.
48 Jiisusilli oqarfigaa: “Juudarsi, inuup Ernera kunillugu akeqqanut pisippiuk?”
49 Eqqaaniittut qanoq pisoqalersoq takugamikku oqarput: “Naalagaq, panalersorfigissavagut?”
50 Taakkua ilaata palasiunerup inussiaataa panariarpaa talerpiatigullu siutaarlugu.
51 Jiisusili oqarpoq: “Naammaqaaq!” Siutaalu attorpaa ajorunnaarsillugulu.
52 Taava Jiisusip palasit nuimasut, guutisiorfimmi nakkutilliisut naalagaat utoqqaanertallu imminik tigusarinnikkiartorlutik takkussimasut oqarfigai: “Ujajaasuusoralunga panalisarlusi anaatalisarlusilu maanngarpisi?
53 Guutisiorfimmi ullut tamaasa najorallarassi tigusarinngilassinga. Piffissarsili nalliuppoq taartorlu pissaaneqarluni.”
54 Taava tigusaraat palasiunerullu illuanukaallugu, Petrusili ungasiarluni malinnaavoq.
55 Illup kaajaluisaata qeqqani ikumatitamik ikitseriarlutik issaasut akorngannut Petrusi ingippoq.
56 Kiffalli arnap inuusuttup ikumatitap eqqaani issiasoq takugamiuk isigeqqissaariarlugu oqarpoq: “Uuma angutip taanna ikinngutigaa.”
57 Imali misiarpoq: “Arnarngaa, ilisarisimanngilara.”
58 Tamatuma kinguninngua allap takugamiuk oqarfigaa: “Illit aamma taakkua ilagaatsit.” Petrusili oqarpoq: “Naamik, taamaattoqanngilaq.”
59 Akunnerullu ataatsip missaa qaangiummat angut alla qularani oqarpoq: “Angutip uuma taanna ikinngutigaa, Galiliiamiuuvormi!”
60 Petrusili oqarpoq: “Uumaangaa, naluara suna pinerit.” Taamaalisorlu, suli oqalutsillugu, kukkukooq angutiviaq qarlorpoq.
61 Naalakkallu toqqarluni qiviarmani Petrusip siusinnerusukkut imminut oqaasii eqqaalerpai: “Ullumi kukkukooq angutiviaq qarlortinnagu pingasoriarlutit nalunerassavarma.”
62 Taava anivoq aliasunnermillu qissaserluni.
63 Maanna angutit Jiisusimik tigusarinnissimasut illaruaatigalugulu tillualerpaat.
64 Kiinaalu uleriarlugu oqarfigeqattaarpaat: “Pruffiitiuguit oqarfigitigut kia annersikkaatit!”
65 Allarpassuarnillu Guutimut mitalliutaasunik oqaaseqarfigaat.
66 Qaammarmallu inuiaqatigiinni utoqqaanertaqatigiit, tassa palasit nuimasut allakkanillu ilisimasut, juutit eqqartuussiviisa qullersaata inersuani katersuupput Jiisusilu sassarteriarlugu oqarfigalugu:
67 “Kristusiuguit oqarfigitigut.” Akivaali: “Oqarfigigaluarussi upperinavianngilassinga.
68 Aamma aperigaluarussi akinavianngilassinga.
69 Maannamiilli inuup Ernera Guutip pissaasup talerpiatungaani issiassaaq.”
70 Taava tamarmik aperipput: “Tassa Guutip erneraatit?” Akivai: “Nammineq oqarpusi taannaasunga.”
71 Oqarput: “Ilisimannittut amerlanerusut pisariaqartippagut? Namminermi oqaasii tusaareerpagut.”
Ilanngussat
^ Imalt.: “qaqortuliamik”.
^ Imalt.: “poorskimik”. Nassuiaatit takukkit.
^ Imalt.: “angerutsimik”.
^ Imalt.: “angerfigeqatigigaanga”.
^ Imalt.: “angerfigeqatigaassi”.
^ “Imerfik” Jiisusip Guutimik mitaatiginnittutut eqqunngitsumik unnerluutigineqarluni toqunneqarnissaanik Guutip akuersinermigut piumasaanut assersuutaavoq.
