Lukkarsi 1:1-80
-
Tiuufilusimut (1-4)
-
Johannesip inunngornissaa pillugu Gaabrialip siulittuutaa (5-25)
-
Jiisusip inunngornissaa pillugu Gaabrialip siulittuutaa (26-38)
-
Mariiap Elizabettimut tikeraarnera (39-45)
-
Mariiap Jehova unnersiutigigaa (46-56)
-
Johannesip inunngornera atserneqarneralu (57-66)
-
Zakkariap siulittuutaa (67-80)
1 Pisimasuiit upperisagut amerlasuunit allaaserineqarsimapput.
2 Taakkua allagaat takunnittunit Guutillu tusarliussaanik oqaluussissutiginnittunit tusarsimasatsinnut naapertuupput.
3 Uangattaaq suut tamaasa aallaqqaataanniit misissoqqissaarakkit paasiuminartumik tulleriiaarlugit ilinnut, ataqqinangaartumut Tiuufilusimut, allanniarlugit aalajangerpunga
4 ilinniartitsissutigineqartut tusarsimasavit ilumoornerat qulakkeersinnaaniassagakku.
5 Herodasip* Judiiami kunngiunerata nalaani palaseqarpoq Zakkariamik atilimmik Aabiap palaseqatigiivinut ilaasumik. Taassuma nulia Elizabetti Aaronnip kinguaavisa ilagaat.
6 Taakku marluullutik Jehovap* inassutaanik inatsisaanillu maleruaaqqissaartaramik Guutimit naapertuilluartutut isigineqarput.
7 Elizabettili naartusinnaanngimmat meeraqanngillat, marluullutillu ukioqqortupput.
8 Zakkaria palaseqatigiinnut ilaaffigisamini palasitut Guutimut kiffartortilluni
9 palaseqatigiinnut ileqquusut malillugit guutisiorfimmut Jehovap pigisaanut iserami tipigissaammik ikumatitsisussanngorpoq.
10 Tipigissaammillu ikumatitsisarfiup nalaani inuppassuit silataani qinupput.
11 Jehovap inngiliata tipigissaatinik ikumatitsisarfiup* talerpiatungaani nikorfalluni saqqummerfigaa.
12 Zakkarialli inngili takugamiuk annilaarpoq ersingaaramilu nikeriarsinnaajunnaarluni.
13 Inngililli oqarfigaa: “Zakkaria, annilaangassanngilatit. Qamanngami pisumik qinunerit Guutip tusarpaa. Nuliallu Elizabetti ernertaassaaq, taannalu Johannesimik atsissavat.
14 Nuannaassaatit qiimmattangaarlutillu, inunngorneralu inuppassuit nuannaarutigissavaat,
15 ernerimmi Jehovap pingaartissammagu. Viinnimilli imigassamillu aalakoornartumik* imissanngilluinnarpoq, allaallu suli erniunngitsoq anersaamik illernartumik tunineqassaaq.
16 Israalillu qitornaasa ilarpassui Jehovamut Guutiminnut uteqqullugit ikiussavai.
17 Aamma ataataasut meeqqatut uummateqaqqullugit, naalasseriitsut silatusaaqqullugit eqqortulioqqullugillu inuiaqatigiillu Jehovamut kiffartornissamut piareersarumallugit Guutip Eliatut anersaaqartillugu pissaaneqartillugulu siunermigut ingerlatissavaa.”
18 Zakkariap inngili oqarfigaa: “Ilumut taama pisoqarsinnaagami? Utoqqaavungami nuliaralu ukioqqortulluni.”
19 Inngilip akivaa: “Gaabrialiuvunga Guutip saavani kiffartortuartoq, nutaarsiassanillu nuannersunik tamakkuninnga oqaluttuunniassagakkit aallartitaavunga.
20 Oqaatsikkali piffissanngorpat eqquuttussat upperinnginnakkit tamakkua pinissaasa tungaannut oqalussinnaajunnaassaatit.”
21 Taama pisoqartillugu inuit Zakkaria utaqqivaat taamalu sivisutigisumik guutisiorfimmiinnera eqqumiigalugu.
22 Oqalussinnaanani guutisiorfimmit animmat takorluuisitaaqqammersimasoq paasivaat. Oqalussinnaannginnami ussersorfigiuarpai.
23 Ullut illernartumik kiffartorfissani naammata angerlarpoq.
24 Tamatuma kingorna nulia Elizabetti naartulerpoq, qaammatinilu tallimani aninngilaq. Ima oqarpoq:
25 “Jehovap ulluni makkunani ima ikiorpaanga: Allanit nikagineqarunnaarniassagama isumassorpaanga.”
26 Elizabettip naartulluni qaammatit arfinilinngormagit inngili Gaabriali Guutimit aallartinneqarpoq Galiliiami illoqarfimmut Naazaratsimut,
27 Daavip kinguaavisa ilaata Juuserfimik atillip nuliassaanut, Mariiamik atilimmut, atoqateqarsimanngisaannartumut.
28 Iseramilu Mariia ilasseriarlugu oqarfigaa: “Iluarisaangaartutit, Jehovap najorpaatit.”
29 Oqaasiili Mariiap assut annilaarutigai qanorlu isumaqarnersut paasiniarsaralugit.
30 Taava inngilip oqarfigaa: “Mariia, Guutip iluarimmatit annilaangassanngilatit.
31 Naartulissaatit ernertaassallutillu, taannalu Jiisusimik atsissavat.
32 Pingaartunngussaaq, Qutsinnerpaap erneranik taaneqassaaq, siuaasami* Daavip issiavissaarsuanik Jehovamit Guutimit tunineqassaaq,
33 Jaakup kinguaavinut kunngisut qaqugorsuarmut naalakkersuisuussaaq kunngeqarfialu atajuassalluni.”
34 Mariiali inngilimut oqarpoq: “Angummik atoqateqarsimanngisaannarama qanoq naartulersinnaagama?”
35 Inngilip akivaa: “Anersaap illernartup qulangissavaatit Qutsinnerpaallu pissaanerata ulissallutit. Tamannalu pissutigalugu inunngortussaq illernartumik, Guutip erneranik, taaneqassaaq.
36 Eqqarlillu Elizabetti utoqqaagaluarluni maanna nukappiaqqamik qaammatit arfinilissaanni naartuvoq, aali isumaqartoqaraluartoq meerartaarsinnaanngitsoq.
37 Guutimummi ajornartoqanngilaq.”
38 Taava Mariia oqarpoq: “Jehovap inussiaatigaanga! Oqarnittut pineqarlanga.” Taamaalisorlu inngilip qimappaa.
39 Tamatuma nalaani Mariia nunamut qaqqartuumut, Juudami illoqarfimmut, tuaviorluni aallarpoq.
40 Zakkariallu angerlarsimaffianut iserami Elizabetti ilassivaa.
41 Mariiap ilassinninnera Elizabettip tusarmagu naarmiua pikeriarpoq, Elizabettilu anersaamit illernartumit sunnerneqangaarluni
42 nipituumik oqarpoq: “Arnani iluarineqarnerpaavutit, naarmiullu iluarisaavoq!
43 Naalakkama anaanaanit tikeraarneqarnera immikkut pisinnaatitaaffigaara!
44 Ilassinninnerit tusaannariga naarmiora nuannaarnermik pikeriarpoq.
45 Aamma upperavit pilluarputit, Jehovammi ilinnut oqaasii tamarmik eqquutissapput.”
46 Mariialu oqarpoq: “Jehovap angingaassusersua tarnima* unnersiutigaa,
47 uummatimalu qiimmattaatigiuarpaa aniguisitsisiga Guuti
48 inussiaatiminik pingaaruteqanngitsumik maluginiaammat. Maannamiit inuit tamarmik pilluarnerassavaannga
49 Guutip pissaasup annertuumik iliuuseqarfigimmanga. Taassuma atia illernarpoq,
50 mianerinnitsinilu qaqugorsuarmut nallittussavai.
51 Pissarsuulluni iliuuseqartarpoq. Isumaminni qaffassimaartut siammartittarpai.
52 Inuit pissaanillit issiavissaarsuinit peertarpai maniguuttullu qutsissisittarlugit.
53 Kaattut pitsaasunik qaarsillartittarpai pisuullu nassataqartinnagit aallartittarlugit.
54 Kiffani Israali ikioriartortarpaa, taamaaliornermigullu takutittarpaa neriorsuutini eqqaamallugu.
55 Aaperaat kinguaavilu qaqugorsuarmut nallittorniarlugit neriorsorpai, siuaasatsinnullu taama oqarpoq.”
56 Mariia qaammatit pingasut missaanni Elizabettimeereerluni angerlarpoq.
57 Maanna Elizabettip ernivissaa nallerpoq, ernertaarporlu.
58 Jehovallu nallittungaarsimagaa saniliisa ilaqutaasalu tusaramikku nuannaaqatigaat.
59 Ullut arfineq-pingajussaanni nukappiarannguaq kipineqartussaammat* ornippaat, ataataalu, Zakkaria, atsiunniaraluarpaat.
60 Anaanaali oqarpoq: “Naamik! Johannesimik ateqassaaq.”
61 Oqarfigaalli: “Ilaquttanni taama ateqartoqanngilaq.”
62 Taava qanoq ateqassanersoq ataataa ussersorfigalugu aperaat.
63 Allattarfik tigujumariarlugu allappoq: “Johannesimik ateqassaaq.” Tamarmillu tupigusupput.
64 Ingerlaannarlu oqalussinnaanngorpoq Guutilu unnersiutigilerlugu.
65 Eqqaamiuusullu tamarmik tupigusulerput, tamakkulu tamarmik Judiiami nunami qaqqartuumi tamarmi oqallisaalerput.
66 Tusarnaartullu tamarmik tusakkatik eqqarsaatigaat oqarlutillu: “Nukappiarannguarmita sunngussava?” Jehovammi najorpaa.
67 Taava ataataa Zakkaria anersaamit illernartumit sunnerneqangaarluni siulittuivoq:
68 “Jehova unnersiutigineqarli, Israalimmi Guutiata innuttani isumassorlugit aniguisippai.
69 Aniguisitsisussarlu pissarsuaq* kiffami Daavip kinguaavineersoq saqqummersippaa.
70 Tamannalu itsaq pruffiitini illernartut aqqutigalugit neriorsuutigaa.
71 Uagutsinnut akeraasunit uumissortitsinnillu tamanit aniguisinniarluta neriorsorpaatigut.
72 Siuaasatsinnut neriorsuisimanermisut nallittussavaatigut isumaqatigiissutinilu* illernartoq eqqaamassallugu.
73 Isumaqatigiissut tassaavoq siuaasatsinnut Aaperaamut neriorsuutaa.
74 Guutip uagutsinnut akeraasunit aniguisereerunisigut annilaanganata kiffartornissarput isumagissavaa
75 inuunerput tamaat aalajaalluta eqqortuliorsinnaaniassagatta.
76 Illilli meerannguaq, Jehovap aqqutissai piareersassagakkit Qutsinnerpaap pruffiitianik taaneqassaatit.
77 Innuttaalu oqaluttuutissavatit ajortuliaminnik isumakkeerfigineqarnermikkut Guutimit aniguisinneqassasut.
78 Guutip misiginneqataangaarnera pissutigalugu taama pisoqassaaq. Qilammit misiginneqataanerup tamatuma seqerngup nuineratut qinngussavaatigut
79 taartumi toqullu alanngisimasaani issiasut qaammarsarumallugit isikkagullu eqqissinerup aqqutaatigooqqullugit.”
80 Nukappiarannguarlu peroriartorpoq anersaakkullu nukittorluni, Israalikkunnullu oqaluussiartornissami tungaanut inoqajuitsumiiginnarpoq.
Ilanngussat
^ Nassuiaatit takukkit.
^ Nassuiaatit takukkit.
^ Imalt.: “pilliisarfiup”.
^ Imalt.: “amaarnartumik; putumanartumik; nakeqqanartumik”.
^ Nutsiinn.: “ataatami”.
^ Nassuiaatit takukkit.
^ Nassuiaatit takukkit.
^ Nutsiinn.: “Nassullu aniguisitsisoq”. Nassuiaatit takukkit: “Nassuk”.
^ Imalt.: “angerutsinilu”.
