APEQQUT 9
Pinngoriartuaarneq upperissavara?
ILLIT QANOQ ILIUSSAGALUARPIT?
Ima pisoqartoq takorlooruk: Miki nalornivoq. Guuti pinngortitsinerlu upperiuarsimavai. Ullumikkulli uumassusilerinermik ilinniartitsisuata qulanngilluinnarluni pinngoriartuaarneq tutsuiginartumik ilisimatusarnikkut misissuinermik tunngaveqarnerarlugu ilumoornerarpaa. Miki sianiippasikkusunngilaq. Ima eqqarsarpoq: ‘Pinngoriartuaarneq ilisimatuut ilumoortutut uppernarsarsimappassuk qanoq apeqqusersinnaagakku?’
Illit Mikiusuuguit pinngoriartuaarneq ilinniutini ilumoortutut allaatigineqarmat upperissaviuk?
UNILLUTIT EQQARSARIT!
Tamanna pillugu oqallinnermi illuatungeriit qanoq upperisaqarnertik oqaatigipallattarpaat, kisianni sooq taamatut upperisaqarnertik iluamik ilisimaneq ajorpaat.
-
Inuit ilaasa oqaluffimmi ilinniartitsissutigineqartut pissutigiinnarlugit pinngortitsisoqarnera upperaat.
-
Inuit ilaasa atuarfimmi ilinniartitsissutigineqartut pissutigiinnarlugit pinngoriartuaarneq upperaat.
APEQQUTIT ARFINILLIT EQQARSAATIGISASSAT
Biibilimi allassimavoq: “Illuliat tamarmik immikkut sanasoqartarput, tamanilli sanasoq tassaavoq Guuti.” (Hebræerit 3:4) Tamanna upperineqarsinnaava?
OQARTOQARTARPOQ: Nalaatsornikkut qaartoorujussuartoqarneratigut avataarsuaniittut tamarmik piulerput.
1. Kina sunaluunniit pissutigalugu qaartoorujussuartoqarpa?
2. Sorleq ilumoorpasinnerua – suut tamarmik suunngitsumit aallaaveqartut, imaluunniit suut tamarmik kinaassusilimmit aallaaveqartut?
OQARTOQARTARPOQ: Inuit uumasunit ineriartorput.
3. Inuit uumasunit – soorlu aapakaanit – ineriartorsimappata taava sooq inuit aapakaallu silassorissutsimikkut taama assigiinngitsigippat?
4. Inuk silassorissoq uumassuseqanngitsumik robottiliorsinnaappat cellimik uumassusilimmik, aap, allaat inummik, pinngortitsisoq silassorinnerujussuusimassaaq, ilaa?
OQARTOQARTARPOQ: Pinngoriartuaarneq uppernarsineqarsimavoq.
5. Taamatut oqartartup uppernarsaatit nammineq misissoreerpai?
6. Pinngoriartuaarnerup silatuunit tamanit upperineqarneranik oqarfigineqarsimanertik pissutigiinnarlugu inuit qanoq amerlatigisut pinngoriartuaarneq upperaat?
“Orpippassuit akornisigut pisuttuartillutit illu takugukku eqqarsassavit: ‘Kaar, tupinnaq! Orpiit eqqoqqissaartumik nakkaasimapput illunngorlutillu.’ Soorunami naamik! Qanoq-aamma taama pisoqassava. Taavami sooq avataarsuani suut tamarmik piuleriataarsimanerat upperissavarput?” – Julia.
“Takorlooruk ilisimatinneqarlutit naqiterivimmi qaartoortoqarsimasoq qalipaatillu iikkanut qilaanullu serpalissimasut oqaasersiuutinngorlutik. Tamanna upperissaviuk?” – Gwen.
SOOQ GUUTI UPPERINEQASSAVA?
Biibilimi ‘silatussuseqarnissannik’ kajumissaarneqarputit. (2 Timotheusi 1:7) Taamaattumik uku tunngavigiinnarlugit Guuti upperissanngilat:
-
MISIGISSUTSIT (Qutsinnerusumi pissaaneqarsoraara)
-
ALLAT SUNNIINERAT (Nunaqqatigiittut uppertuuvugut)
-
TATINEQARNEQ (Guutimut uppertussatut perorsagaavunga – allamik periarfissaqarnanga)
Paarlattuanik upperisannut tunngavissaqarluartariaqarputit.
“Atuarfimmi ilinniartitsisup timitta pisatai nassuiaraangagit Guutip piunera qularinngilluinnartarpara. Timip pisatai tamarmik, mikinerpaat ilanngullugit, atuuffeqarput. Taakkualu atuuffiit eqqarsaatiginagilluunniit atortarpavut. Inuup timaa assut tupinnarluinnarpoq!” – Teresa.
“Illorsuarmik, umiarsuarmik biilimilluunniit takugaangama imminut ima aperisarpunga: ‘Kia sanavaa?’ Biili ingerlasinnaassappat atortuararpassui inunnit silassorissunit katiterneqartariaqarput. Biilit ilusilersorneqarsimappata inuittaaq ilusilersorneqarsimassapput.” – Richard.
“Ilisimatusarneq samminerujartortillugu suut tamarmik pinngoriartuaarnerat upperiuminaatsinnerulertarpara. ... Pinngoriartuaarnermik upperinnittut Pinngortitsisoqarneranik upperinnittunit ‘uppernerusoraakka’.” – Anthony.
EQQARSAATISSIISSUT
Ilisimatuut ukiorpassuarni pinngoriartuaarneq pillugu misissuisaraluarlutik tamarmiullutik isumaqataaffigisinnaasaminnik suli nassuiaatissarsinngillat. Ilisimatuut pinngoriartuaarneq pillugu isumaqatigiissinnaanngippata illit apeqqusiinerit kukkunerussava?