Ilagiinnut allanut nuunnermi qanoq sungiussiniartoqarsinnaasoq
ILAGIINNUT allanut nuunnikuuit? Taamaappat Jean-Charles isumaqatigissagunarpat, taannami ima oqarpoq: “Ilaqutariinniittut tamarmik anersaakkut ingerlalluarnissaasa saniatigut ilagiinnut allanut nuunneq unamminiarnarsinnaavoq.” Nuukkaanni suliffissarsiornerup, inissarsiornerup immaqalu meeqqat atuarfimmi allami ilinniartalernissaasa saniatigut sila, kulturi aamma oqaluussiffigisartakkat nutaat sungiunniarnissaat imaannaanngitsuusinnaavoq.
Nicolas Célinelu allamik unamminiagaqarput. Frankrigimi immikkoortortaqarfimmit aperineqaramik ilagiinnut allanut nuussinnaanersut akuersipput. Ima oqaluttuarput: “Aallaqqaammut nuanneraluarluni ikinngutigulli maqaasilerpagut. Ilagiinni nuuffigisatsinni suli qanimut ikinngutitaanngilagut.” a Ilagiinnut allanut nuunneq ajornakusoorsinnaammat qanoq sungiussiniarsinnaavit? Allat qanoq ikiuisinnaappat? Aamma qanoq ilagiinni nuuffigisanni allanik qiimmassaasinnaavit allanillu aamma qiimmassarneqarlutit?
SUNGIUSSINISSANNUT ILUAQUTIGISINNAASATIT SISAMAT
1. Jehova tatigiuk. (Tuss 37:5) Kazumip Japanimiup ilagiit ukiuni 20-ni ilaaffigisani qimattariaqalerpai uia suliffimminut tunngatillugu nuutsinneqarmat. ‘Aqqutissani Jehovamut qanoq isumagitippaa?’ Ima oqarpoq: “Uippallernera, kiserliornera annilaanganeralu pillugit Jehovamut uummammiugisakka tamaasa oqaluttuaraakka. Tamatigut pisariaqartitannik nakussatsittarpaanga.”
Jehova qanoq tatiginerulersinnaaviuk? Soorlu naasoq naajartorluarniassaguni imermik pisariaqartitsisoq issumiillu naggorissarneqartariaqartoq, taamatuttaaq uppernerput ineriartussappat anersaakkut inuussutissanik pisariaqartitsivugut. Nicolasip eqqaaneqareersup Biibilimi maligassiuisut Guutip piumasaatut iliorniarlutik pilliuteqangaarsimasut – soorlu Aaperaat, Jiisusi Paulusilu – eqqarsaatigeqqissaaraangamigit Jehovap annertoqqusersuiumaarnera upperinerulertarpaa. Akulikitsumik Biibilimik atuaqqissaartaruit tamanna inuuninni allannguinerit naammagalugit
atornissaannut iluaqutigisinnaavat, aamma ilinniakkatit ilagiinni nuuffigisanni allanik qiimmassaanissamut atorluarsinnaavatit.2. Naleqqiussissanngilatit. (Oqal 7:10) Jules Beninimiit USA-mut nuukkami kulturimut allaalluinnartumut naleqqussartariaqarpoq. Ima oqarpoq: “Misigivunga naapitannut tamanut uannut tunngasunik tamanik oqaluttuartariaqarlunga.” Tamanna atugarisimasaminit allaanerummat ilagiinnit immikkoornialerpoq. Qatanngutilli ilisarisimaneruleramigit isiginnittaatsini allanngortippaa. Ima oqarpoq: “Paasivara nunarsuarmi sumiluunniit najugaqaraluarutta inuit assigiittut, taamaallaalliuna oqaloriaatsigut iliuutsigullu allaaneruinnartut. Inuttut qanoq ittuunerat akuerissallugu pingaaruteqarpoq.” Taamaattumik ilagiit najuuffigilikkatit ilagiinnut ilaaffigisimasannut sanilliunnaveersaakkit. Anne-Lise pioneriusoq ima oqarpoq: “Nutaanik ilinniarusukkama nuuppunga, imaanngitsoq qimassimasannut assingusumik atugaqarusukkama.”
Utoqqaanertat aamma ilagiinnut ilaaffigisimasaminnut sanillersuussinaveersaartariaqarput. Ilagiinni ilaaffigilikkanni periaatsit allaanerugaluartut isumaqartariaqanngilaq ajortuusut. Siunnersuuteqannginninni silatusaassaatit nuuffigisanni pissutsit qanoq inneri paasiniaqqaarukkit. (Oqal 3:1, 7b) Isummat maliinnarlugu iliuuseqaqqunagit maligassiuilluaruit pitsaaneruvoq. – Kor 2. 1:24.
3. Akuugit. (Flp 1:27) Nuunneq piffissartornarlunilu tamaviaarnaraluartoq sapinngisamik piaartumik ataatsimiigiartalernissaq pingaaruteqarpoq, ajornanngippat ornigullutit peqataasarnissat pitsaaneruvoq. Qatanngutimmi ilagiinni ilaaffigilikkanni qaqutiguinnaq takusarunitsit qanoq ilillutik ilisarisimanerulerlutillu ikiorsinnaagamitsit? Lucinda paninilu marluk illoqarfissuarmut Sydafrikamiittumut nuupput. Ima oqarpoq: “Siunnersorneqarpunga ilagiinnut ilaaffigilikkannut akuulluaqqullunga, oqaluusseqateqartaqqullunga ataatsimiinnernilu akisaqqullunga. Aamma utoqqaanertat oqarfigaagut oqaluussinissamut katersuunnerit angerlarsimaffitsinniissinnaasut.”
Ilagiit nuuffigisavit suliassaannik qatanngutit ‘tamaviaaqatigigukkit’ imminut nakussatsissaatit allallu nakussatsillugit. Anne-Lise eqqaaneqareersoq utoqqaanertanit kajumissaarneqarpoq ilagiinniittut tamaasa oqaluusseqatiginissaannut periarfissarsiussasoq. Tamanna qanoq kinguneqarpa? Ima oqarpoq: “Tamanna ilagiinnut akuulernissamut periarfissatsialaasoq paasilerpara.” Aamma ataatsimiittarfimmi eqqiaaqataanikkut aserfallatsaaliueqataanikkullu ilagiinnut ilaalersimallutit misigalutit takutissinnaavat. Ingerlaannaq akuuleruit qatanngutit ilisarisimanerulipallassavaatsit, misigissaatillu ilagiit ilaaffigilikkatit anersaakkut ilaqutaralugit.
4. Ikinngutitaartorit. (Kor 2. 6:11-13) Allat inuttut soqutigisarukkit ikinngutitaarnissat ajornannginnerutissavat. Taamaattumik ataatsimiinnerni inuit oqaloqatiginiassagakkit aggiaartarit, ataatsimiinnerullu kingorna oqaloqateqartarit. Atii eqqaamaniarsarisakkit. Atii eqqaamasarukkit saaffigiuminartuuguillu ilisarisimanerulerusussavaatsit, ikinngutigilernissaallu ilimanarnerussaaq.
Nuannarineqarniaannarlutit inuttut allatut pissuseqartuusaarnak namminiugit. Lucinda ima oqartoq ilinniarfigisinnaavat: “Allanik uagutsinnut qaaqqusinikkut siulliulluta iliuuseqartaratta qanimut ikinnguteqalerpugut.”
‘IMMISSINNUT TIKILLUAQQUGITSI’
Ilaasa ataatsimiittarfimmut nalusaminnik inuppassualimmut isernissaq sapernartissinnaavaat. Taamaattumik illit ilagiinnut nooqqammersut qanoq ikiorsinnaavigit? Apustili Paulusi ima kajumissaarivoq: “Kristusip ilissinnik tikilluaqqusineratut immissinnut tikilluaqqugitsi.” (Rom 15:7, q.a.i.) Utoqqaanertat Jiisusi ilaarlugu nooqqammersut tikilluaqqusaasutut misigitissinnaavaat. (Ungalusaq “ Iluatsittumik nuunneq” takuuk). Ilagiinniittulli tamarmik, aamma meeqqat, nooqqammersut angerlarsimasutut misigitissinnaavaat.
Inoroorsaarnikkut allat tikilluaqqusaasutut misigitissinnaavatit, kisianni aamma allatut ikiuisinnaavutit. Assersuutigalugu arnap uppeqatini nooqqammersoq illoqarfimmut nuuffigisaanut takornariartippaa nassuiaallugulu busserniaraangami qimuttuitsorniaraangamilu qanoq iliussanersoq. Taama piffissaqarfigineqarami arnap taassuma killitsissutigivaa sungiussinissaminullu iluaqutigalugu.
ANERSAAKKUT INERIARTORNISSAMUT PERIARFISSAQ
Pillertap timmisinnaanngunnginnermini qalipaa arlaleriarluni taarsertarpoq. Taamatuttaaq ilagiinnut allanut nuukkutta Jehovamut kiffartornitsinni ‘sulunissinnaajumallutalusooq’ isumakuluutigut akornutaasinnaasut peertariaqarpagut. Nicolas aamma Céline ima oqarput: “Nuunneq sungiusaataalluarpoq. Tassami inuit nalusagut ilisarisimanerulerumallugit
avatangiisinullu nutaanut sungiussiumalluta pissuserineqartussat ajunngitsut ineriartortittariaqarsimavagut.” Jean-Charles, allaaserisap aallartinnerani eqqaaneqartoq, oqaluttuarpoq nuunneq ilaqutariittut qanoq iluaqutigisimallugu: “Meeqqatta ilagiinnut allanut nuunnerput anersaakkut iluaqutigisimavaat. Nuunnitsinniit qaammatialuit qaangiutiinnartut panipput ulluinnarni ataatsimiinnerni qaqisalerpoq ernerpullu oqaluussisartunngorluni imermut morsutsinneqarsimanngitsoq.”Taavami nuunnissamut, assersuutigalugu oqaluussisartunik pisariaqartitsiffiunerusumut nuunnissamut, periarfissaqanngikkuit? Taava allaaserisami siunnersuutigineqartutut ilioruit ilagiinnut ilaaffigeriikkannut isiginnittaatsit nuannernerulersillugu allanngortissinnaavat, ilaa? Jehova tatigiuk. Assigiinngitsunik oqaluusseqateqartarnikkut aamma ikinngutitaartornikkut ikinngutigiinnerillu nakussatsinnerisigut ilagiinnut akuugit. Ilagiinni nutaat pisariaqartitsisulluunniit ilaat arlaatigut ikiorsinnaavigit? Kristumiut ilumoortut asanninneq ilisarnaatigimmassuk allanik ikiuisarnerit Jehovamut attaveqarninnut nakussatsissutaassaaq. (Joh 13:35) Qularissanngilat ‘Guutip pilliutit taamaattut iluarilluinnarmagit’. – Hebr 13:16.
Unamminiarnartoqarsinnaagaluartoq kristumiorpassuit ilagiinnut allanut iluatsilluartumik nuussimapput – aamma illit taamaassinnaavutit. Anne-Lise oqarpoq: “Ilagiinnut allanut nuukkama ammanerulerlungalu ikinngutitaartorpunga.” Kazumip paasilerpaa “nuukkaanni misiginikuunngisamik Jehovap allatut ikiuinera misigineqarsinnaasoq”. Julesimi qanoq misigiva? Ima oqarpoq: “Ikinngutitaarama angerlarsimasutut misigilerpunga. Maanna ilagiinnut akuusutut misigilerama allamut nuunnissaq takorlooruminaatsippara.”
a Angerlarsertarneq pillugu allaaserisaq “Hvordan man overvinder hjemve i tjenesten for Gud” Vagttårnet maajip 15-iat 1994-imoortumi atuarsinnaavat.