سەنىمىن سەرىك ەتكەندەر | ماعدالالىق ٴماريام
«مەن يەمىزدى كوردىم!»
ماعدالالىق ٴماريام كوز جاسىن ٴسۇرتىپ تۇرىپ، اسپانعا قارادى. جانىنداي جاقسى كورەتىن يەسى باعانادا ٸلىنۋلى تۇر. بۇل كوكتەمنىڭ كۇنى، شامامەن كۇندىزگى 12:00 شاماسى بولاتىن، سوندا دا «بۇكىل جەردى قاراڭعىلىق باسىپ» قالدى! (لۇقا 23:44، 45). ٴماريام جامىلعىسىمەن يىعىن قىمتاي ٴتۇسىپ، قاسىندا تۇرعان ايەلدەرگە تىعىلىڭقىرادى. ٷش ساعاتقا سوزىلعان بۇل قاراڭعىلىق كۇننىڭ تۇتىلۋىنان ەمەس ەدى. ويتكەنى كۇننىڭ تۇتىلۋى نەبارى بىرنەشە مينۋتقا سوزىلادى. وسى كەزدە ٴماريام مەن يسانىڭ قاسىندا تۇرعان باسقا دا ادامداردىڭ قۇلاعىنا ادەتتە تۇندە عانا ەستىلەتىن جانۋارلاردىڭ داۋسى كەلە باستاسا كەرەك. سول جەردە تۇرعانداردىڭ كەيبىرىنىڭ ٴتىپتى ۇرەيى ۇشىپ: «مىنا كىسى، راسىندا دا، قۇداي ۇلى بولعان ەكەن!»— دەستى (ماتاي 27:54). بالكىم، يسانىڭ ٸزباسارلارىنا دا، باسقالارعا دا ەحوبا ٶز ۇلىنا جاسالعان قورلىققا اشۋى مەن جان قاسىرەتىن ٴبىلدىرىپ جاتىر دەگەن وي كەلگەن دە شىعار.
ماعدالالىق ٴماريامنىڭ مىنا كورىنىستى كورۋگە ٴداتى شىدار ەمەس، الايدا كەتىپ تە قالا المايدى (جوحان 19:25، 26). ويتكەنى يسا ادام ايتقىسىز ازاپ شەگىپ جاتسا كەرەك. ونىڭ اناسى دا جۇبانىش پەن سۇيەنىشكە مۇقتاج.
يسانىڭ جاساعان بار جاقسىلىعىنان سوڭ، ٴماريام دا ول ٷشىن قولدان كەلگەنىن جاساعىسى كەلدى. كەزىندە ول مۇشكىل كۇيدەگى بايعۇس ايەل بولاتىن، ٴبىراق يسا مۇنىڭ ٴبارىن وزگەرتتى. ول ونىڭ ٶمىرىنىڭ ٴمانى مەن ٴسانىن كەلتىردى. سودان ول سەنىمى بولاتتاي بەرىك ايەلگە اينالدى. قالايشا؟ ونىڭ سەنىمىن بۇگىندە قالاي سەرىك ەتە الامىز؟
«قولدا بارلارىمەن... قىزمەت كورسەتىپ ٴجۇردى»
كيەلى كىتاپتا ماعدالالىق ٴماريامنىڭ وقيعاسى سي-تارتۋمەن بايلانىستى باستالادى. يسا ونى جانتۇرشىگەرلىك جاعدايدان ازات ەتكەن ەدى. ول ۋاقىتتا جىن-پەرىلەردىڭ ىقپالى كەڭ جايلاعان-دى. ولار ادامدارعا شابۋىل جاساپ، ٴتىپتى كەيبىرىنىڭ بويىنا ەنىپ، بيلەپ-توستەپ الاتىن. ماعدالالىق ٴماريامنىڭ بويىنا سونداي زۇلىم، قۇتىرعان جەتى جىن كىرىپ العان ەدى. ٴبىراق ولاردىڭ بايعۇس ايەلگە ناقتى قالاي ىقپال ەتكەنىن ٴبىز بىلمەيمىز. ٴبىر بىلەرىمىز — يسا ٴماسىحتىڭ ارقاسىندا ٴماريام وسى جىندارىنان ارىلدى! (لۇقا 8:2).
جىنداردان اقىرى قۇتىلىپ، شەكسىز جەڭىلدىك سەزىنگەن ٴماريام جاڭا ومىرگە اياق باستى. ول ٶزىنىڭ ريزاشىلىعىن قالاي كورسەتە الدى؟ ٴماريام يسانىڭ ادال ٸزباسارى بولدى. سونداي-اق ول مۇقتاجدىقتى كورە ٴبىلدى. يسا مەن ەلشىلەرىنە اس-سۋ، كيىم-كەشەك پەن تۇنەيتىن ورىن كەرەك-ٴتىن. ولار باقۋاتتى ادامدار ەمەس ەدى، جۇمىس تا ىستەپ جۇرگەن جوق بولاتىن. بار كوڭىلدەرىن ۋاعىزداۋ مەن ٴتالىم بەرۋ ىسىنە بۇرا الۋ ٷشىن ولارعا ماتەريالدىق جاعىنان كومەك قاجەت بولدى.
بۇل كومەكتى ٴماريام مەن تاعى بىرنەشە ايەل ۇسىندى. ولار «قولدا بارلارىمەن يسا مەن ونىڭ ەلشىلەرىنە قىزمەت كورسەتىپ ٴجۇردى» (لۇقا 8:1، 3). اراسىنداعى كەيبىرى اۋقاتتى ايەلدەر بولسا كەرەك. كيەلى كىتاپتا ولاردىڭ تاماق ٴپىسىرىپ، كىر جۋىپ، اۋىل-اۋىلداردا تۇنەيتىن جەر قامداعانى جايلى ەشتەڭە ايتىلماعان. دەگەنمەن دە ولار ساپاردا جۇرگەن وسى توپقا (ٴسىرا، 20 شاقتى ادامنان قۇرالسا كەرەك) قۋانا-قۋانا قولداۋ كورسەتكەن. وسى ايەلدەردىڭ كومەگىنىڭ ارقاسىندا يسا مەن ەلشىلەرى ۋاعىز ىسىنە تولىعىمەن دەن قويا الدى. البەتتە، ٴماريام يسانىڭ وزىنە جاساعان جاقسىلىعىن ەشقاشان قايتارا المايتىنىن ٴبىلدى، سويتسە دە ول ٷشىن شاماسى كەلگەنىن ىستەپ جاتقانىنا ٴماز-مەيرام بولدى!
قازىرگى تاڭدا كوپشىلىگى وزگەنىڭ يگىلىگى ٷشىن قاراپايىم ىستەر جاساپ جۇرگەندەرگە مەنسىنبەي جوعارىدان قاراۋى مۇمكىن. ٴبىراق قۇداي ەشقاشان بۇلاي ەتپەيدى. ٴماريامنىڭ يسا مەن ونىڭ ەلشىلەرىنە كومەكتەسۋ ٷشىن بارىن سالىپ جۇرگەنىن كورگەندە، قۇدايدىڭ جۇرەگى قالاي ەلجىرەگەنىن ەلەستەتىپ كورىڭىزشى. بۇگىندە كوپتەگەن ادال ماسىحشىلەر وزگەلەردىڭ قامى ٷشىن قاراپايىم ىستەردى قۋانا ىستەيدى. كەيدە ٴبىر يگى ٸستىڭ، ٴتىپتى ٴبىراۋىز جىلى ٴسوزدىڭ قۇدىرەتى زور بوپ جاتادى. مۇنداي جاقسىلىق ەحوبانىڭ جانارىنان تىس قالمايدى (ناقىل سوزدەر 19:17؛ ەۆرەيلەرگە 13:16).
«يسا ىلىنگەن ازاپ باعاناسىنىڭ قاسىندا»
ماعدالالىق ٴماريام يسامەن بىرگە ب. ز. 33-جىلى يەرۋساليمگە قۇتقارىلۋ مەيرامىنا بارعان كوپتەگەن ايەلدەردىڭ اراسىندا بولدى (ماتاي 27:55، 56). يسانىڭ تۇتقىنعا الىنىپ، تۇنىمەن سوتتالعانىن ەستىگەندە، ٴماريامنىڭ توبە شاشى تىك تۇرعانى انىق. الايدا بۇدان دا سۋىق حابار جەتتى. ٵمىرشى پونتي پيلات ياھۋدي ٴدىنباسىلارى مەن ولار ايداقتاعان جۇرتتىڭ ىرقىنا بەرىلىپ، يسانى باعانادا ازاپتاپ ٶلتىرۋ جازاسىنا كەستى. ٴماريام قان جوسا بولىپ، ابدەن تيتىقتاعان، كوشەمەن ۇزىن بورەنەنى ارەڭ سۇيرەلەپ بارا جاتقان يەسىن ٶز كوزىمەن كورگەن بولار (جوحان 19:6، 12، 15—17).
ٶلىم جازاسى جۇزەگە اسىپ جاتقاندا، شامامەن تۇسكى مەزگىلدە قاراڭعىلىق باسقاننان كەيىن، ماعدالالىق ٴماريام مەن وزگە دە ايەلدەر «يسا ىلىنگەن ازاپ باعاناسىنىڭ قاسىندا» تۇردى (جوحان 19:25). وقيعانىڭ سوڭىنا دەيىن سول جەردە بولعان ٴماريام يسانىڭ ٶز اناسىن سۇيىكتى ەلشىسى جوحاننىڭ قامقورلىعىنا تاپسىرىپ جاتقانىن كورىپ، ەستىدى. ول يسانىڭ اكەسىنە جالبارىنعان جانايقايىن دا، ونىڭ ٴدال ولەر الدىندا «تۇگەل ورىندالدى!» دەپ ايتقان سوڭعى جەڭىمپاز ٴسوزىن دە ەستىدى. ٴماريامنىڭ جۇرەگى قان جىلاپ تۇردى. سوعان قاراماستان ول يسانىڭ ولىمىنەن سوڭ دا سول جەردە قالا بەرگەنگە ۇقسايدى. كەيىنىرەك اريماتەيالىق ٴجۇسىپ ەسىمدى باي كىسى يسانىڭ دەنەسىن جاڭا قابىرگە قويعاندا، ٴماريام قابىر باسىندا قالىپ قويدى (جوحان 19:30؛ ماتاي 27:45، 46، 57—61).
ٴماريامنىڭ ۇلگىسىنەن باۋىرلاستارىمىز جاپا شەككەندە قالاي ارەكەت ەتۋگە بولاتىنىن ۇيرەنە الامىز. بالكىم، ولاردىڭ باسىنا تۇسكەن قايعىلى جاعدايعا توسقاۋىل بولا الماسپىز، ياكي ولاردىڭ جان جاراسىن جازا الماسپىز. دەگەنمەن دە ٴبىز جاناشىرلىق پەن باتىلدىق تانىتا الامىز. دەمەۋ بولار دوستىڭ قاسىنان تابىلعانىنىڭ ٶزى قايعىرعان جۇرەككە ۇلكەن مەدەت بەرەدى. مۇقتاج كەزىندە دوسىڭنىڭ جانىندا بولۋ — وراسان زور سەنىمنىڭ ايعاعى، ولشەۋسىز جۇبانىشتىڭ كوزى (ناقىل سوزدەر 17:17).
ماعدالالىق ٴماريامنىڭ قاسىندا بولعانى يسانىڭ اناسىنا جۇبانىش بەرگەنى داۋسىز
«مەن الىپ كەتەيىن»
يسانىڭ دەنەسى قابىرگە قويىلعان سوڭ، وعان كەيىندەۋ ماي جاعۋ ٴراسىمىن جاساۋ ٷشىن جۇپار ٴيىستى زاتتار ساتىپ العان ايەلدەردىڭ اراسىندا ٴماريام دا بولدى (مارقا 16:1، 2؛ لۇقا 23:54—56). ول دەمالىس كۇنى بىتكەن سوڭ تاڭەرتەڭ ەرتە تۇردى. ونىڭ باسقا ايەلدەرمەن بىرگە قاراڭعى كوشەنىڭ بويىمەن يسانىڭ قابىرىنە قاراي بەتتەپ كەلە جاتقانىن ەلەستەتىپ كورىڭىزشى. جول-جونەكەي ولار قابىردىڭ اۋزىنداعى اۋىر تاستى قالاي اشامىز دەپ سۇراستى (ماتاي 28:1؛ مارقا 16:1—3). ٴبىراق بۇنى كەدەرگى كورىپ، كەرى قايتىپ كەتپەدى. ولاردىڭ سەنىمى قولدارىنان كەلگەندى ىستەپ، ال قالعانىن ەحوباعا تاپسىرۋعا تالپىندىردى.
ٴماريام قابىردىڭ باسىنا ٴبىرىنشى بولىپ جەتسە كەرەك. ول كەلگەن بويدا ٶز كوزىنە ٶزى سەنبەي تۇرىپ قالدى: تاس الىنىپ تاستالعان، ال قابىردىڭ ٸشى بوس! شيراق ايەل مۇنى ايتۋ ٷشىن پەتىر مەن جوحانعا جۇگىرە جونەلدى. ونىڭ القىنعان دەمىن باسا الماي: «يەمىزدى قابىردەن الىپ كەتىپتى. ونى قايدا قويعانىن بىلمەيمىز»،— دەپ جاتقانىن ەلەستەتىپ كورىڭىزشى. پەتىر مەن جوحان اسىعىس قابىرگە بەت الدى. ونىڭ بوس ەكەنىنە كوزدەرى جەتكەن سوڭ، ۇيلەرىنە قايتىپ كەتتى a (جوحان 20:1—10).
ٴماريام بولسا قابىرگە قايتىپ كەلىپ، سول جەردە جالعىز ٶزى تۇردى. قابىردىڭ بوس تۇرعانى جانە تاڭەرتەڭگى مۇلگىگەن تىنىشتىق جانىنا قاتتى باتقان ول جىلاپ جىبەردى. يەسىنىڭ عايىپ بولىپ كەتكەنىنە ٵلى دە سەنبەي، قابىردىڭ ىشىنە ەڭكەيىپ قاراپ ەدى، اڭ-تاڭ بولدى دا قالدى. وندا اق كيىم كيگەن ەكى پەرىشتە وتىر ەكەن! «نەگە جىلاپ تۇرسىڭ؟»— دەپ سۇرادى ولار. ابدىراپ قالعان ول ەلشىلەرگە ايتقانىن قايتالاپ: «يەمدى الىپ كەتىپتى، ونى قاي جەرگە قويعانىن بىلمەيمىن»،— دەپ جاۋاپ بەردى (جوحان 20:11—13).
وسىنى ايتىپ، ٴماريام ارتىنا بۇرىلىپ ەدى، ٴبىر كىسى تۇر ەكەن. ٴبىراق ونى تانىمادى. ونى سول جەرگە قاراپ جۇرگەن باعبان ەكەن دەپ ويلادى. سوندا الگى كىسى مەيىرىممەن: «نەگە جىلاپ تۇرسىڭ؟ كىمدى ىزدەپ ٴجۇرسىڭ؟»— دەپ سۇرادى. ٴماريام: «مىرزا، ونى الىپ كەتكەن ٴسىز بولساڭىز، قاي جەرگە قويعانىڭىزدى ايتىڭىزشى، مەن الىپ كەتەيىن»،— دەدى (جوحان 20:14، 15). ٴبىر ساتكە توقتاپ، ونىڭ وسى سوزدەرىن وي ەلەگىنەن وتكىزىپ كورىڭىزشى. كەزىندە مىعىم، كۇش-جىگەرى مول بولعان يسا ٴماسىحتىڭ دەنەسىن بۇل ايەل جالعىز ٶزى قالاي كوتەرىپ اكەتپەك؟ ٴماريام بۇعان باسىن قاتىرىپ جاتپادى. ونىڭ بار ويى «قولىمنان كەلگەندى ىستەۋگە ٴتيىسپىن» بولدى.
«مەن الىپ كەتەيىن»
باسىمىزعا ٶزىمىز شىداس بەرە المايتىنداي قايعى-قاسىرەت تۇسسە يا الدىمىزدا قانداي دا ٴبىر كەدەرگىلەر تۇرسا، ماعدالالىق ٴماريامعا قالاي ەلىكتەسەك بولادى؟ ەگەر تەك السىزدىكتەرىمىز بەن شەكتەۋلەرىمىز تۋرالى ويلايتىن بولساق، ٴبىزدى قورقىنىش پەن بەلگىسىزدىك تۇساۋلاپ، تىرپ ەتە الماي قالۋىمىز مۇمكىن. الايدا قولىمىزدان كەلگەندى ىستەپ، قالعانىن ەحوباعا تاپسىرۋعا بەكىنسەك، ٶزىمىز ويلاماعان نارسەگە قول جەتكىزۋىمىز عاجاپ ەمەس (قورىنتتىقتارعا 2-حات 12:10؛ فىلىپىلىكتەرگە 4:13). ەڭ ماڭىزدىسى، ٴبىز ەحوبانى قۋانتامىز. ٴماريامنىڭ دا ونى قۋانتقانى تالاسسىز، سول ٷشىن ەحوبا ونى وتە ەرەكشە جولمەن جارىلقادى.
«مەن يەمىزدى كوردىم!»
ٴماريامنىڭ الدىندا تۇرعان كىسى باعبان ەمەس-ٴتىن. بۇرىن ول اعاش ۇستاسى، سوسىن ۇستاز، ال كەيىن ٴماريامنىڭ سۇيىكتى يەسى بولعان ادام. ٴبىراق ٴماريام ونى تانىمادى، سوندىقتان كەرى بۇرىلدى. ٴماريام كەلەسى شىندىقتى كۇتپەگەن ەدى: يسا قۇدىرەتتى رۋح رەتىندە ومىرگە قايتا ورالدى. يسا وعان ادامي دەنەدە كورىندى، ٴبىراق قۇرباندىققا بەرگەن بۇرىنعى دەنەسىندە ەمەس. قايتا تىرىلگەننەن كەيىن وزگەلەرگە كورىنگەن كەزدەرى كوبىسى يسانى تانىماي قالىپ جاتتى، ٴتىپتى ونى جاقسى بىلەتىندەر دە (لۇقا 24:13—16؛ جوحان 21:4).
يسا ٶزىنىڭ كىم ەكەنىن ٴماريامعا قالاي ٴبىلدىردى؟ «ٴماريام!» دەگەن ٴبىراۋىز ٴسوزدى قالاي ايتقانىمەن. مۇنى ەستىگەندە، ٴماريام ارتىنا بۇرىلىپ: «راۆۆۋني!»— دەپ ايعايلاپ جىبەردى. وسى تانىس ەۆرەي ٴسوزىن ول يساعا تالاي رەت ايتقانى داۋسىز. ٴيا، بۇل ونىڭ جانىنداي جاقسى كورەتىن ۇستازى ەدى. ٴماريامنىڭ كەۋدەسىن قۋانىش كەرنەپ سالا بەردى. ول ودان ۇستاي الىپ، ەش جىبەرگىسى كەلمەدى (جوحان 20:16).
يسا ونىڭ ويىن ٴبىلدى. «ماعان جارماسۋدى قوي»،— دەدى ول. يسانىڭ بۇل ٴسوزدى مەيىرىممەن، بالكىم، كۇلىمسىرەگەن جىلى جۇزبەن ايتقانىن ەلەستەتىپ كورسەك بولادى. ول ٴماريامنىڭ قاتتى قىسقان قولىن بوساتىپ جاتىپ: «مەن ٵلى اكەمە كوتەرىلگەن جوقپىن»،— دەدى ونى سەندىرىپ. بۇل ونىڭ ٵلى كوككە كەتەتىن ۋاقىتى ەمەس ەدى. جەر بەتىندە اتقاراتىن ىستەرى ٵلى دە بولدى. ول ٴماريامعا كومەكتەسكىسى كەلدى. ٴماريام، ارينە، ونى بار زەيىنىمەن تىڭدادى. يسا وعان: «باۋىرلاستارىما بارىپ، مىنانى ايت: —مەن ٶزىمنىڭ جانە سەندەردىڭ اكەلەرىڭە، ٶزىمنىڭ جانە سەندەردىڭ قۇدايلارىڭا كوتەرىلەمىن»،— دەدى (جوحان 20:17).
يەسىنەن العان نەتكەن تاپسىرما! ٴماريام يسانىڭ قايتا تىرىلگەنىن كورگەن العاشقى شاكىرتتەردىڭ ٴبىرى ەسەبىندە قۇرمەتكە بولەنسە، ەندى مىنە، وسى ىزگى حاباردى جەتكىزۋ مارتەبەسىنە دە يە بولىپ تۇر. ونىڭ قانداي قۋانىشپەن، قانداي قۇلشىنىسپەن شاكىرتتەردى ىزدەۋگە كىرىسكەنىن ەلەستەتىپ كورىڭىزشى. ونىڭ دەمىگە: «مەن يەمىزدى كوردىم!»— دەپ شاكىرتتەرگە ايتىپ جاتقانىن دا كوز الدىڭىزعا كەلتىرىڭىزشى (بۇل سوزدەر ونىڭ وي-ساناسىندا، كەيىننەن شاكىرتتەردىڭ دە ساناسىندا ۇزاق جاڭعىرىپ تۇرسا كەرەك). قۋانىشىندا شەك جوق ٴماريام يسانىڭ ايتقاندارىنىڭ ٴبارىن ولارعا اسىعا-اپتىعا جەتكىزدى (جوحان 20:18). ونىڭ سوزدەرى شاكىرتتەردىڭ يسانىڭ بوس قابىرىنە بارعان باسقا ايەلدەردەن ەستىگەن سوزدەرىن راستاي ٴتۇستى (لۇقا 24:1—3، 10).
«مەن يەمىزدى كوردىم!»
«ولار بۇعان سەنبەدى»
ەر ادامدار ەستىگەندەرىن قالاي قابىلدادى؟ العاشىندا ونشا جاقسى قابىلدامادى. كيەلى كىتاپتا: «ايەلدەردىڭ ايتقاندارى بوس ٴسوز بولىپ كورىنىپ، ولار بۇعان سەنبەدى»،— دەلىنگەن (لۇقا 24:11). نيەتى ٴتۇزۋ بۇل ەر كىسىلەر ايەلدەرگە سەنە قويمايتىن قوعامدا تۋىپ-ٶستى. راۆۆيندەردىڭ داستۇرىنە ساي، ايەل زاتى سوتتا كۋالىك بەرە المايتىن. ٴسىرا، ەلشىلەر وزدەرىن ٵلى دە مادەنيەتتىڭ كوبىرەك ىقپالىندامىز دەپ ويلاماعان شىعار. الايدا يسا مەن ونىڭ اكەسىندە الالاۋشىلىق دەگەن اتىمەن جوق. ولار وسى ٴبىر ادال ايەلگە نەندەي قۇرمەت كورسەتتى دەسەڭشى!
ٴماريام، البەتتە، ەر ادامداردىڭ ارەكەتىنە رەنجىگەن جوق. ول ەڭ باستىسى يەسى وزىنە سەنىم ارتاتىنىن ٴبىلدى، وسىنىڭ ٶزى ول ٷشىن جەتكىلىكتى ەدى. بۇگىنگى تاڭدا دا يسانىڭ ٸزباسارلارىنا جاريالايتىن حابار سەنىپ تاپسىرىلدى. كيەلى كىتاپتا بۇل حابار «قۇداي پاتشالىعى تۋرالى ىزگى حابار» دەپ اتالعان (لۇقا 8:1). يسا جۇرتتىڭ ٴبارى بىردەي ولاردىڭ سوزىنە سەنىپ، اتقارىپ جاتقان ىستەرىن باعالايدى دەپ ۋادە ەتكەن جوق. قايتا، كەرىسىنشە بولاتىنىن ايتقان (جوحان 15:20، 21). سوندىقتان ماسىحشىلەر ماعدالالىق ٴماريامدى ەستە ۇستاعاندارى ٴجون. ول ٴتىپتى رۋحاني باۋىرلاستارى سوزىنە كۇمانمەن قاراسا دا، قايتا تىرىلگەن يسا تۋرالى ىزگى حاباردى جاريالاۋعا دەگەن ىستىق ىقىلاسىن باسەڭدەتكەن جوق!
كەيىندەۋ يسا ەلشىلەرىنە، سوسىن باسقا دا ٸزباسارلارىنا كورىندى. تاعى بىردە ول 500 دەن استام ادامعا ٴبىر مەزگىلدە كورىندى (قورىنتتىقتارعا 1-حات 15:3—8). يسا كورىنگەن سايىن ٴماريامنىڭ سەنىمى بەكي تۇسكەنى انىق، مەيلى مۇنى ٶز كوزىمەن كورسە دە، باسقالاردان ەستىسە دە. يەرۋساليمدە ەلۋىنشى كۇن مەيرامىندا يسانىڭ جينالعان شاكىرتتەرىنە كيەلى رۋح قونعاندا، ارالارىنداعى ايەلدەردىڭ ىشىندە ماعدالالىق ٴماريام دا بولعان شىعار (ەلشىلەردىڭ ىستەرى 1:14، 15؛ 2:1—4).
قالاي بولعان كۇندە دە، بىزدە كەلەسى جايتقا سەنىمدى بولۋعا كەلەلى سەبەپ بار: ماعدالالىق ٴماريام ٶمىرىنىڭ سوڭىنا دەيىن سەنىمىن ساقتادى. ٴبارىمىز دە وسىلاي ەتۋگە بەكەم بەل بايلايىق! ەگەردە يسانىڭ ٴبىز ٷشىن جاساعان بار جاقسىلىعىنا ريزاشىلىق بىلدىرسەك، سونداي-اق قۇدايدىڭ كومەگىنە جۇگىنە وتىرىپ وزگەلەرگە كىشىپەيىلدىلىكپەن قىزمەت ەتسەك، ماعدالالىق ٴماريامنىڭ سەنىمىن سەرىك ەتەمىز.
a باسقا ايەلدەر ٴماسىحتىڭ قايتا تىرىلگەنىن حابارلاعان پەرىشتەنى كورگەندە، ٴماريام ول جەردەن كەتىپ قالعان بولسا كەرەك. ايتپەگەندە ٴماريام پەتىر مەن جوحانعا ٴمايىتتىڭ نەگە جوق ەكەنىن تۇسىندىرگەن پەرىشتەنى كوردىم دەپ مىندەتتى تۇردە ايتار ەدى (ماتاي 28:2—4؛ مارقا 16:1—8).
قىزىقتى بولار مالىمەتتەر
كيەلى كىتاپ تالىمدەرى
كيەلى كىتاپتى زەرتتەۋ قۇرالدارى
كيەلى كىتاپتى تەرەڭ ٵرى قىزىقتى ەتىپ زەرتتەۋ ٷشىن قاجەتتى قوسىمشالاردى تاڭداڭىز.
كيەلى كىتاپ تالىمدەرى
كيەلى كىتاپ كۋرسىن باستاپ كورىڭىز
قۇداي ٴسوزى — كيەلى كىتاپتى جەكە تالىمگەرمەن تالقىلاپ كورىڭىز. كۋرس تەگىن.