ارماگەددون سوعىسى دەگەن نە؟
كيەلى كىتاپتىڭ جاۋابى
ارماگەددون سوعىسى ادامداردىڭ ۇكىمەتتەرى مەن قۇدايدىڭ اراسىنداعى اقتىق سوعىستى بىلدىرەدى. بۇل ۇكىمەتتەر مەن ولاردىڭ جاقتاستارى قازىردىڭ وزىندە قۇدايدىڭ بيلىگىنەن باس تارتىپ جاتىر (ٴزابۇر 2:2). سوندىقتان ارماگەددون سوعىسىندا قۇداي ادامدار باسقارىپ وتىرعان ۇكىمەتتەردىڭ ٴبارىن جوق قىلادى (دانيال 2:44).
«ارماگەددون» ٴسوزى كيەلى كىتاپتا ٴبىر-اق رەت، ايان 16:16 دا كەزدەسەدى. سول ايان كىتابىندا «جەرجۇزىنىڭ پاتشالارى قۇدىرەتى شەكسىز قۇدايدىڭ ۇلى كۇنى بولاتىن سوعىسقا جينالاتىنى» الدىن الا ايتىلعان. ولار جينالاتىن جەر ەۆرەيشە «ارماگەددون» دەپ اتالادى (ايان 16:14).
ارماگەددوندا كىمدەر سوعىسادى؟ يسا ٴماسىح قۇدايدىڭ جاۋلارىن جەڭۋ ٷشىن كوكتەگى اسكەرىن ەرتىپ كەلەدى (ايان 19:11—16، 19—21). بۇل جاۋلاردىڭ اراسىندا قۇدايدىڭ بيلىگىنە قارسى شىعاتىندار مەن قۇدايدى جەك كورەتىندەر بار (ەزەكيەل 39:7).
ارماگەددون سوعىسى تاياۋ شىعىستا بولا ما؟ جوق. بۇل سوعىس ٴبىر ايماقتا ەمەس، بۇكىل جەرجۇزىندە بولادى (ەرەميا 25:32—34؛ ەزەكيەل 39:17—20).
ارماگەددون كەيدە «ھار-ماگەدون» (ەۆرەيشە «حار مەگيددون») دەپ تە ايتىلادى. بۇل «مەگيددو تاۋى» دەگەندى بىلدىرەدى. مەگيددو كەزىندە ەجەلگى يسرايلدەگى ٴبىر قالا بولعان. تاريحتان كورىنەتىندەي، سول ماڭدا شەشۋشى سوعىستار بولعان، سولاردىڭ كەيبىرى كيەلى كىتاپتا جازىلىپ كەتكەن (بيلەر 5:19، 20؛ پاتشالار 2-جازبا 9:27؛ 23:29). الايدا «ارماگەددون» ەجەلگى مەگيددونىڭ ماڭىنداعى ناقتى ٴبىر جەردى بىلدىرمەيدى. ويتكەنى ول جەردە ونداي بيىك تاۋ جوق. ال سول جەردەگى بۇكىل ەزرەحەل اڭعارىنا بولسا قۇدايعا قارسى شىعاتىنداردىڭ ٴبارى سيمايدى. دەمەك، ارماگەددون بۇكىل دۇنيەجۇزىندەگى ەلدەر قۇدايدىڭ بيلىگىنە قارسى شىعۋ ٷشىن جينالعاندا بولاتىن الەمدەگى جاعدايدى بىلدىرەدى.
ارماگەددون سوعىسى قالاي وتەدى؟ ٴبىز ەحوبا ٶز كۇشىن ناقتى قالاي قولداناتىنىن بىلمەيمىز. ٴبىراق ونىڭ قۇزىرىندا بۇرىن قولدانعان مىنانداي قۇرالدار بولادى: بۇرشاق، جەر سىلكىنىسى، قاتتى نوسەر، وت پەن كۇكىرت، نايزاعاي جانە ىندەت (ٵيۇپ 38:22، 23؛ ەزەكيەل 38:19، 22؛ اباقۇق 3:10، 11؛ زاكاريا 14:12). قۇداي جاۋلارىنىڭ ٴبارى بولماسا دا، كەيبىرى، ابدىراعاننان ٴبىر-ٴبىرىن ولتىرە باستايدى. ٴبىراق ولار اقىر سوڭىندا وزدەرىنە قارسى شىعىپ جاتقان قۇدايدىڭ ٶزى ەكەنىن تۇسىنەدى (ەزەكيەل 38:21، 23؛ زاكاريا 14:13).
ارماگەددوندا دۇنيەنىڭ سوڭى كەلىپ، جەر جويىلا ما؟ جوق. ارماگەددوندا جەر شارى جويىلمايدى، ويتكەنى ول — ادامزاتتىڭ ماڭگىلىك مەكەنى (ٴزابۇر 37:29؛ 96:10؛ ۋاعىزداۋشى 1:4). ارماگەددوندا ادامزات تا جويىلمايدى، ويتكەنى كيەلى كىتاپتا قۇداي قىزمەتشىلەرىنىڭ «ۇلى جاماعاتى» امان قالادى دەپ ايتىلعان (ايان 7:9، 14؛ ٴزابۇر 37:34).
كيەلى كىتاپتا «دۇنيە» دەگەن ٴسوز ٵردايىم جەرگە قاتىستى ايتىلمايدى. كەيدە ول قۇدايعا قارسى شىعاتىن زۇلىم قوعامدى بىلدىرەدى (جوحاننىڭ 1-حاتى 2:15—17). سوندىقتان ارماگەددوندا سول زۇلىم قوعام جويىلادى (ماتاي 24:3).
ارماگەددون قاشان بولادى؟ ارماگەددونعا ۇلاساتىن «زور الاپات» جايلى ايتقان كەزدە، يسا بىلاي دەگەن: «سول كۇن مەن ساعاتتى ەشكىم — كوكتەگى پەرىشتەلەر دە، ۇل دا — بىلمەيدى، تەك اكەم عانا بىلەدى» (ماتاي 24:21، 36). دەسە دە كيەلى كىتاپتا ارماگەددون سوعىسى يسا كوزگە كورىنبەي «وسىندا بولاتىن كەزدە» ورىن الاتىنى ايتىلعان. ال يسانىڭ «وسىندا بولۋى» 1914-جىلى باستالدى (ماتاي 24:37—39).