Ngeenge omukulukadi a mona okaana, ye nomushamane waye ohava kala va tunhukwa, ndele pefimbo opo tuu opo ohava kala ve na oshisho. Paife eshi mwa ninga ovadali, otashi dulika mu kale mwa kumwa okumona kutya efimbo neenghono deni dihapu ohamu di longifa mokufila oshisho okaana keni. Okuhakofa sha wana nokulunduluka kwomaliudo eni otaku dulu okukuma ekwatafano leni. Ashike ove nakaume koye kopahombo omu na okuninga po omalunduluko opo mu file oshisho okaana keni nokukaleka po ekwatafano liwa mohombo yeni. Ongahelipi omayele Ombibeli taa dulu oku mu kwafela mu ungaunge nomashongo a tya ngaho?

OSHO OMBIBELI TAI TI: ‘Ohole oi noutalanheni nolukeno.’ Shimwe vali, ohole “ihai kongo shayo vene, ihai kenyanana.” (1 Ovakorinto 13:4, 5) U li ina omudali, oshi li paushitwe okukala to yandje elitulemo kokaana koye. Ashike omushamane woye otashi dulika a kale e wete uhe na naye, onghee hano, ino dimbwa kutya naye okwa pumbwa elitulemo loye. Mu kwafela a mone kutya ou na ko nasha naye, to shi ningi nelididimiko nonolukeno noku mu pitika naye a file oshisho okaana.

“Ovalumenhu nye, kaleni novakainhu veni neendunge.” (1 Petrus 3:7) Uda ko kutya eenghono dihapu domukulukadi woye ote di longifa mokufila oshisho okaana keni. Oku na oinakuwanifwa ipe notashi dulika a kale a wililwa po koshisho, a loloka ile nokuli a polimana. Omafimbo amwe, otashi dulika a kale nokuli e ku handukila, ashike kendabala okukala wa ngungila, molwaashi “omutalonheni e dule omuladi.” (Omayeletumbulo 16:32) Kala u na eendunge dokuyoolola, noku mu yambidida opo a pumbwa ekwafo. — Omayeletumbulo 14:29.

OSHO TO DULU OKUNINGA:

• Omushamane: Kwafela omukulukadi woye a file oshisho okaana, nokuli nokonguloshi. Ninipika efimbo olo ho longifa mokuninga oinima imwe opo u kale efimbo la wana nomukulukadi woye nokaana keni.

• Omukulukadi: Ngeenge omushamane okwa hala oku ku yakula mo mokulela okaana, tambula ko ekwafo laye. Ngeenge ite shi endifa nawa, ino mu kembaula, ndele mu ulikila nombili nghee e na oku shi ninga

OSHO OMBIBELI TAI TI: “Otava ka kala onhumba imwe.” (Genesis 2:24) Nonande moukwaneumbo weni omwa wedwa oshilyo shimwe, dimbulukwa kutya nye nakaume koye kopahombo natango omu li “onhumba imwe.” Ningeni eenghendabala da mana mo mu kaleke ekwatafano leni la kola.

Ovakulukadi, panduleni ovashamane veni omolwekwafo olo have mu pe. Eendjovo deni dolupandu otadi dulu ‘okuvelula.’ (Omayeletumbulo 12:18) Ovashamane, lombweleni ovakulukadi veni kutya omu va hole nonokutya omwe va fimaneka shi fike peni. Pandula omukulukadi woye omolwonghedi omo ha file oshisho oukwaneumbo. — Omayeletumbulo 31:10, 28.

“Inapa kala ou ta kongo ouwa waye mwene, ndelenee keshe na konge ouwa wamukwao.” (1 Ovakorinto 10:24) Ninga alushe osho tashi wapalele kaume koye kopahombo. Mu li ovalihomboli, kongeni efimbo lokukundafana, pandulafaneni nokupwilikinafana. Henukeni oikala yokuliholamwene ngeenge tashi uya pekwatafano leni lopamilele. Yandja elitulemo keemhumbwe dakaume koye kopahombo. Ombibeli oya ti: “Inamu lidilikafana, okuninga mwe shi pangela mu likalele manga.” (1 Ovakorinto 7:3-5) Kundafaneni oshinima osho paushili mu li onye amuke vavali. Elididimiko nokukala mu udite ko onghalo yeni otashi ka pameka ekwatafano leni.

OSHO TO DULU OKUNINGA:

• Inamu dimbwa okukonga efimbo lokukala onye amuke vavali

• Ninga oinima i li paunafangwa oyo tai kwafele kaume koye kopahombo a mone kutya ou mu hole, ngaashi oku mu tumina outumwalaka ile oku mu pa oushikepengeyo

OSHO OMBIBELI TAI TI: “Omishangwa diyapuki ou di shii nghee wa dja mounona woye, edi di neenghono doku ku longa eendunge, u xupifwe.” (2 Timoteus 3:15) Kundafaneni shi na sha nanghee tamu ka honga okaana keni. Okaana ohake lihongo monghedi ikumwifa, nokuli nofimbo inaka dalwa. Fimbo ke li moshidalelo, otaka dulu okudimbuluka ewi loye nokulinyenga metwokumwe nomaliudo oye. Ka lesheleni ofimbo kanini natango. Nokuli nonande itaka udu ko osho to lesha, otashi ke ka kwafela ka ka kale ke hole okulesha ngeenge oka kulu.

Kala ho ilikana nako kuJehova, ino tya itaka udu ko molwaashi kanini. (Deuteronomion 11:19) Nokuli nonande otamu danauka nako, popya kombinga yoinima oyo Kalunga a shita. (Epsalme 78:3, 4) Eshi okaana koye taka kulu, otaka ka mona kutya ou hole Jehova, naasho otashi ke linyengifa nako ka kale ke mu hole.

OSHO TO DULU OKUNINGA:

• Ilikana to pula kondadalunde u pewe ounongo wokutekula okamwoye

• Kala to ka endululile oitya nomadiladilo oo a fimana opo ka hovele okulihonga fimbo kanini