Maria oye ngoo ina yaKalung?

DANA

Enyamukulo lopaMbiibeli

Ahowe, hasho. Ombiibeli itai hongo kutya Maria oye ina yaKalunga, navali inai lombwela Ovakriste va ilikane ile va fimaneke Maria melongelokalunga. a Diladila kwaashi:

Maria ke na fiku a tile oye ina yaKalunga. Ombiibeli oya ti kutya okwa dala “Omona waKalunga,” ndele haKalunga mwene. — Markus 1:1; Lukas 1:32.
Jesus Kristus ina popya kutya Maria oye ina yaKalunga ile kutya na pewe efimano le likalekelwa. Kakele kaasho, okwa li a pukulula omukainhu umwe, oo a li ta yandje elitulemo la pitilila kuMaria eshi e li ina yaJesus, a ti: “Oshili, ovanelao ovava tava udu eendjovo daKalunga ndele tave di diinine.” — Lukas 11:27, 28.
Omautumbulilo” Ina yaKalunga” nosho yo “Theotokos” (Ou a dala Kalunga) kae mo mOmbiibeli.
PaMbiibeli, Outumbulilo ‘Ohambanghainhu yomeulu’ otau ulike koshikalungakainhu osho sha li hashi ilikanwa kOvaisrael ovashunimonima. (Jeremia 44:15-19) Otashi dulika sha li oshikalungakainhu shOvababilon shedina Ishtar (Astarte).
Ovakriste vonale kava li hava ilikana Maria ile ve mu fimaneke monghedi ye likalekelwa. Omunandjokonona umwe okwa ti “Ovakriste vonale ove na okukala va li va henuka oimhanga, notashi dulika va li va henuka okuyandja efimaneko la pitilila kuMaria opo kuha tiwe ove mu ninga oshikalunga.” — In Quest of the Jewish Mary.
Ombiibeli oya ti kutya Kalunga okwa kala ko alushe. (Epsalme 90:1, 2; Jesaja 40:28) Molwaashi ye ke na ehovelo, kashi li pandunge okufika pexulifodiladilo kutya okwa dalwa. Maria ita dulu okuhumbata Kalunga medimo laye, molwaashi Ombiibeli oya ti: ‘Eulu lo vene itali mu wanene okukala mo.’ —1 Eehamba 8:27.

Maria oina Jesus, ndele ke fi “ina yaKalunga”

Maria okwa li Omujuda pakudalwa, nokwa li womepata lohamba David. (Lukas 3:23-31) Okwa li a hokiwa kuKalunga omolweitavelo laye nosho yo oudiinini. (Lukas 1:28) Kalunga okwa li e mu hoolola a ninge ina yaJesus. (Lukas 1:31, 35) Maria okwa li yo a dala ounona vamwe nomushamane waye Josef. — Markus 6:3.

Nonande Ombiibeli oya ti Maria okwa ka ninga omuhongwa waJesus, inai popya naanaa shihapu kombinga yaye. — Oilonga 1:14.

Omolwashike ovanhu vamwe hava ti kutya Maria oye ina yaKalunga?

Pandjokonona, ovanhu ova hovela okukala hava fimaneke Maria melongelokalunga lwopexulilo lefelemudo etine O.P. Pefimbo opo, ongeleka yaKatolika oya li ya tambulwa ko onga ongeleka oyo tai ti mouhamba waRoma. Oshidjemo, ovapaani ovo va li hava longele oikalunga ove ke lininga Ovakriste. Ongeleka oya li yo ya hovela ehongo lihe li pamishangwa lOukwatatu.

Ehongo olo lOukwatatu ola ningifa vahapu mongeleka va fike pexulifodiladilo kutya ngeenge Jesus oye Kalunga, osha yela kutya Maria oye ina yaKalunga. Mo 431 O.P., olaata ile oshoongalele shongeleka muEfeso oya li ya dimina okutambula ko ediladilo olo kutya Maria “Oina yaKalunga.” Okudja opo, ovanhu ova kala hava fimaneke nokwiilikana Maria. Mokweendelako kwefimbo, eshi ovo va li nale hava longele oikalunga va ninga oilyo yongeleka, kuvo oihongwafano i na sha naMaria oya enda tai pingene po oikalungakainhu yavo yoludalo yonale, ngaashi Artemis (Diana, shOvaroma) nosho yo Isis.

Mo 432 O.P., omupapa Sixtus III okwa li a yandja oshipango opo ku tungwe ongeleka muRoma oyo tai fimanekifa “Ina yaKalunga.” Oya li ya tungwa popepi nonhele opo pa li otembeli yotete oyo ya tungilwa Lucina, oshikalungakainhu sholudalo shOvaroma. Omushangi umwe okwa popya shi na sha nongeleka oyo kutya oi li “edidiliko filufilu kutya oshimhanga shokwiilikana Maria osho sha holoka po konima eshi Ovaroma va ninga Ovakriste osha tambula ko Omudalakadi Munene oo kwa li ha ilikanwa koimhanga yovapaani.” — Mary—The Complete Resource.

a Omalongelokalunga mahapu ohaa hongo kutya Maria oye ina yaKalunga. Otashi dulika omalongelokalunga oo e mu ifane “Ohambanghainhu yomeulu” ile Theotokos, oshitya sOshigreka osho tashi ti “Ou a dala Kalunga.”